KAPITULO TRES
‘Salitaen Mo ed Sikara Iyan Salita’
1. (a) Antoy pamparehoan nen Jesus tan si Jeremias? (b) Akin a nepeg tayon aligen si Jeremias diad ministeryo tayo?
SI Jesu-Kristo so manunan ehemplo tayo ed panangipulong na maong a balita. Balet, makapainteres ta nen inmunan siglo, walaray totoon akaimaton ed si Jesus ya inisip dan sikato si Jeremias. (Mat. 16:13, 14) Singa si Jesus, si Jeremias et inganggan na Dios a manpulong. Singa bilang, aminsan et inkuan na Dios ed sikato: “Salitaen mo naani ed sikara so saya a salita: Onia so kuan nen Jehova.” (Jer. 13:12, 13; Juan 12:49) Ontan met, impatnag nen Jeremias diad ministeryo to iray kualidad a mipara ed impatnag nen Jesus.
2. Akin a namparay pankaukolan na saray totoo natan tan saray Judio ed panaon nen Jeremias?
2 Balet, nayarin oniay ibaga na arum a Tasi: ‘Duma ed si Jeremias so kipapasen tayo, ta say pangipapasabian toy mensahe na Dios et totoon dedikado la ed Sikato. Balet sikatayo, say maslak a pupulongan tayo et agda kabat si Jehova.’ Tua itan, balet ta diad panaon nen Jeremias, maslak a Judio et nagmaliw lan “maatiw” tan tinaynan day tuan Dios. (Basaen so Jeremias 5:20-22.) Kaukolan day manguman pian awaten nen Jehova so panagdayew da. Ontan met, saray totoo natan, ibabaga da man a Kristiano ira odino andi, kaukolan dan aralen so ontakot ed si Jehova tan mandayew diad dugan paraan. Nengnengen tayo no panon itayon makapanlingkor ed tuan Dios tan natulongan so totoo diad pangalig ed si Jeremias.
‘DINIWIT NEN JEHOVA SO SANGIK’
3. Anto so nikadkaduman ginawa na Dios ed si Jeremias diad kagapoy kimey to, tan anto so alikna na propeta ed satan?
3 Nonoten a diad kagapoy kimey nen Jeremias bilang propeta, inkuan na Dios ed sikato: “Dia ed amin a pangibakian ko ed sika onla ka naani, tan anggan iner a pangigangganan ko ed sika mansalita ka. Agka antakot nisengeg ed sikara; ta wala ak ed sika pian ilaban ta ka, kuan nen Jehova.” (Jer. 1:7, 8) Insan walay ag-inilaloan a ginawa na Dios. Inkuan nen Jeremias: “Saman la si Jehova impaway to so lima to tan diniwit to so sangik; et sinalita ed siak nen Jehova: Nia, inyan ko so saray salitak ed sangim: Nengnengen mo, tan impasen ta ka ed saya ya agew.” (Jer. 1:9, 10) Manlapu la’d saman, amta la nen Jeremias a sikatoy sakey a pinagkasangiyan na Dios a Makapanyarin-amin.a Lapud sigpot a tinulongan na Dios, lalon sinmeseg si Jeremias ed sagradon panaglingkor.—Isa. 6:5-8.
4. Mangisalaysay kayo pa na alay abig iran alimbawa na inkaseseg ed panagpulong.
4 Natan et agla gagawaen nen Jehova imay singa ginawa to ed si Jeremias, imbes et iikdan toy masanton espiritu iray lingkor to pian pakiwasen iran manpulong. Dakel ed sikara so talagan maseseg. Imanoen pay alimbawa nen Maruja a taga España. Masulok lan 40 taon a paralisadoy lima tan sali to. Sikatoy naiirapan a mankabkaabungan, kanian nanggawa ni arum a paraan pian aktibon makapibiang ed ministeryo. Sakey lay panagpulong panamegley na sulat. Ididikta nen Maruja ed anak ton bii iray labay ton paisulat ed sikato. Legan na sakey-bulan a kampanya, si Maruja tan say “sekretarya” to so akapangipawit na 150 a sulat, a kada sobre et walay kalaktip ton tract. Lapud impansagpot da, apasabian na maong a balita so maslak a kaabungan diad asingger a baryo. Oniay inkuan nen Maruja ed anak to, “No walay maptek-impanpuson makaawat na sakey ed saray sulat ta, ikdan to ta nen Jehova na iyaralay Biblia.” Oniay insulat na sakey ya elder, “Misasalamat ak ed si Jehova ta walaray agagin singa si Maruja, a babangatan day arum a pablien iray bengatla a talagan importante.”
5. (a) Panon ya apansiansia nen Jeremias so seseg to anggaman dakel so ag-interesado? (b) Panon mon napansiansiay seseg mo ed panangipulong na maong a balita?
5 Diad panaon nen Jeremias, maslak a taga Jerusalem et “anggapo so liket da” ed katuaan a nanlapud Dios. Tinmunda la kasin manpulong si Jeremias lapud dakel so ag-interesado ed mensahe to? Andi! Oniay inkuan to: “Napno ak na sanok nen Jehova; naksawan ak ed impanbemben ko.” (Jer. 6:10, 11) Panon mon napansiansia so ontan ya inkaseseg? Say sakey a paraan et diad pandalepdep ed agnaparaan a pribilehyom bilang mangirerepresenta ed tuan Dios. Antam a saray prominentin totoo ed sayan mundo et papabandayen day ngaran na tuan Dios. Isipen pa met no panon a pinalikdo na saray lider na relihyon iray totoo ed teritorya yo, a singa ginawa na saray saserdote ed panaon nen Jeremias. (Basaen so Jeremias 2:8, 26, 27.) Balet diad tua, say maong a balita na Panarian na Dios ya ipupulong mo et panangipatnag na Dios ed kaabigan to’d totoo. (Tag. 3:31, 32) On, say pannonot ed saratan et ontulong ed sika pian napansiansiay seseg mo ed panangipulong na maong a balita tan pananulong ed kinmarneron totoo.
6. Antoran mairap a subok so inarap nen Jeremias?
6 Nayarin onabobon ka ya aliwan naynay a mainomay so pamasiansiay seseg diad ministeryo tayo. Wala met iray mairap a subok ya inarap nen Jeremias legan ton manlilingkor ed Dios, kaiba laray palson propeta. Sakey la imay nabasam diad Jeremias kapitulo 28. Maslak a totoo et agdinmengel ed mensahe to, tan no maminsan, say pakalikna to et bukbukor to la. (Jer. 6:16, 17; 15:17) Sakey ni, walay panaon a kinaukolan to met a sungdoan iray kakabusol a malabay a mamatey ed sikato.—Jer. 26:11.
Akin a nailaloan mo a tulongan ka nen Jehova a natalonaan iray subok legan mon ipupulong so maong a balita?
‘O JEHOVA, PINATULOK MO AK’
7, 8. Akin a nibagan makagunggona so ‘impamatulok’ na Dios ed si Jeremias?
7 Walay panaon a si Jeremias so inagew-agew a binabalaw tan ininsulto, kanian imbesngaw toy liknaan to ed Dios. Panon mon nibaga a “pinatulok” nen Jehova so matoor a propeta to, unong ya asalambit ed Jeremias 20:7, 8?—Basaen.
8 Say ‘impamatulok’ na Dios ed propeta to et positibo tan makagunggona. Inisip nen Jeremias a grabe lay isusumpa ed sikato, a no diad sikaton bukor et agto la nasumpal so kimey ton nanlapud Dios. Balet lapud sinuportaan tan tinulongan na Makapanyarin-amin, asumpal to itan. Kanian nibagan tinmalona ed sikato si Jehova, a mangipapanengneng labat a Sikatoy mas mabiskeg nen si Jeremias tan saray liknaan to. Sanen liknaen na sayan propeta na Dios ya asabi lay anggaan na panaanos to tan agto la sarag, inusar nen Jehova so pakayari ton mamakiwas kanian singano apatulok si Jeremias. Apaneknekan a mas mabiskeg so Dios nen saray kakapuyan na sayan propeta. Si Jeremias et akapantultuloy a nampulong anggano dakel so ag-interesado, agmangawat, tan sikatoy duduksaen da.
9. Akin a mamabiskeg ed liknaan mo iray salita ed Jeremias 20:11?
9 Si Jehova et singa “sakey a makapanyari tan sakey a makapataktakot” a walad abay nen Jeremias tan ontutulong ed sikato. (Jer. 20:11) Sarag na Dios a pabiskegen ka met pian napansiansiam so seseg mo ed tuan panagdayew tan makapantultuloy ka anggaman ed angkabaleg iran problema. Nayarim met ya ipasen itan a singa ed samay impaneskribe na sananey a patalos—si Jehova et “sakey a mabiskeg a sundalo” a walad abay mo.—Contemporary English Version.
10. Antoy determinadon gawaen mo sano nipaarap ka ed isusumpa?
10 Indanet nen apostol Pablo itan a punto sanen pinaseseg to iray Kristiano a nipapaarap ed isusumpa. Insulat to: “Manugali kayo komon ya onnepeg ed maong a balita nipaakar ed Kristo ta pian . . . narengelan ko so nipaakar ed sikayo, ya ontatalindeg kayo ed sakey ya espiritu tan nankakasakey kayon mansasagpot parad pananisia ed maong a balita, tan agkayon balot natataktakot ed saray kalaban yo.” (Fil. 1:27, 28) Singa si Jeremias tan saray Kristiano nen inmunan siglo, sarag mo met tan nepeg kan manmatalek ed Makapanyarin-amin a Dios legan mon susumpalen so ministeryom. No walaray mamalaw odino mamasakit ed sika, tandaan mon walad abay mo si Jehova tan sarag to kan ikdan na biskeg. Ontan so ginawa to ed si Jeremias tan ed dakel nin agagim; kanian, sarag to met a gawaen itan ed sika. Mikasi ka ed sikato a tulongan to ka, tan manmatalek kan ebatan toy pikakasim. Nayarin naliknam met a singa ka ‘papatuloken’ na Dios legan to kan papabiskegen pian makmakpel mon natalonaan iray subok, imbes a natatakot. On, nagawaan mo iramay abaloan mon agmo sarag.—Basaen so Gawa 4:29-31.
11, 12. (a) Antoran pananguman so nayarin gawaen mo pian mas dakel a totoo so napulongan mo? (b) Antoray nayarin gawaen mo diad lugar yo unong ya isusuheri na litrato diad pahina 39?
11 Say salaysay nipaakar ed impanlingkor nen Jeremias et makatulong diad nanduruman paraan pian magmaliw itayon mas epektibon ministro na maong a balita. Kayari na masulok a 20 taon ya impanlingkor to bilang propeta nen Jehova, oniay nikuan to: “Sinalitak ed sikayo, a binmangon ak ya asasakbay tan nansalita ak; balet agyo tinalineng.” (Jer. 25:3) On, sikatoy masaksakbay ya onggagapo, aliwan atrasado. Wala ta’y naaralan tayo ed saya? Diad dakel a kongregasyon, walaray manangipalapag a masaksakbay ya ombabangon pian napulongan iray totoo diad istasyon na bus tan tren. Diad kabaryoan, dakel a Tasi so mangabkabuasan pian napulongan iray dumaralos tan arum nira a mankikimey la ed saratan ya oras. Wala ta niray paraan a naisip mo pian niyaplikam iyan leksion manlapud matoor a panaglingkor nen Jeremias? Singa bilang, sarag mo kasi ombangon a masakbay pian presente ka sano onggapoy miting antis na kapapaway?
12 Niarum ni, diad dakel a pasen et mabetbet ya alay abig met iray resulta na panagkabkaabungan no ngarem tan mansirunget. Wala ni ingen iray manpupulong no labi, a lalaen da iramay walad gasolinaan, restawran, tan arum niran pasen na negosyo a 24-oras a lukas. Sarag mo kasin umanen so eskedyul mo pian makapanpulong ka ed oras a nasabim so maslak a totoo diad abung odino arum nin pasen?
Akin a matalek kan tutulongan ka nen Jehova legan mon ipupulong so mensahe to?
13, 14. (a) Panon ya onaplika so alimbawa nen Jeremias diad kimey a panagpawil? (b) Anto so mangipanengneng a kaukolan tayon tooren so sipan tayon ompawil?
13 Walaray panaon ya inganggan nen Jehova si Jeremias a mangiyabawag na saray propesiya diad saray wangalan na templo odino na Jerusalem. (Jer. 7:2; 17:19, 20) Lapud ditan so angiyabawagan nen Jeremias, dakdakel so totoon apasabian toy salita nen Jehova. Tan lapud ditan so naynay a dadalanan na dakel a totoo, a singa saray prominente ed syudad tan saray negosyante, nayarin walaray aminpiga ton apitongtongan diad gunaet ton natulongan ira a natalosan iramay nadngel da la. Antoy naaralan tayo ed saya nipaakar ed panagpawil ed saramay interesado?
14 Amta nen Jeremias a bilay so nalalanor ed kimey to bilang propeta na Dios. Aminsan, sanen agto nagawaan so ingganggan na Dios ed sikaton mitongtong ed totoo, say kaaro ton si Baruc so imbaki to. (Basaen so Jeremias 36:5-8.) Panon tayon naalig si Jeremias ed saya? No imbaga tayo ed unabung ya ompawil tayo, kasin totooren tayo itan? No agtayo nagawaan so sipan tayon ompawil odino mangiyaral na Biblia, kasin mangibabaki itayo na kasandi? Inkuan nen Jesus: “Komon ta say imbaga yon On et On.” (Mat. 5:37) Importantin tooren tayoy salita tayo lapud say irerepresenta tayo et Dios na katuaan tan uksoy.—1 Cor. 14:33, 40.
Kasin itutukoy-tukoy moy eskedyul tan paraan na panagpulong mo pian mas dakel so napulongan mo?
15, 16. (a) Panon ya inalig na dakel so alimbawa nen Jeremias diad pamapalaknab day ministeryo ra? (b) Antoy naaralan mo ed samay eksperiensya na agin taga Chile, a nanengneng ed litrato diad pahina 40?
15 Pinaseseg nen Jeremias iray Judio ed Babilonia sanen sinulat to ra nipaakar ed ‘maong a salita’ nen Jehova a pangipawil to ed sikara. (Jer. 29:1-4, 10) Natan, say ‘maong a salita’ nipaakar ed magano lan gawaen nen Jehova et epektibo met a nipasabi panamegley na sulat tan telepono. Sarag mo kasin usaren irayan paraan pian natulongan iray kanayon mo tan arum nira a walad arawin pasen odino mairap a nasabi?
16 Lapud aaligen na dakel a manangipalapag na Panarian so alimbawa nen Jeremias, diad kaslakan et maabig iray resulta na sagpot da. Walay agin taga Chile ya inasinggeran toy sakey a biin papaway ed istasyon na tren. Malikeliket iyan bii sanen nadngel toy mensahe na Biblia tan inmabuloy ya ituloy so tongtongan da diad abung to. Balet ta ag-insulat na agi so address na sayan bii. Kayari na satan, amoria ton importante a bayuboan toy interes na bii ed katuaan, kanian kinmerew na tulong ed si Jehova diad pikakasi. Kaimbuasan to, pinmawil so agi ed istasyon diad parehon oras. Anengneng to lamet imay bii. Diad sayan pankanawnawa et sineguro to lan nisulat so address na bii, insan to nila diad abung pian tulongan ton natalosan so Biblia. Agla manbayag et ukomen la na Dios so mundo nen Satanas. Balet, walay ilalo na saramay magbabawi tan mangipatnag na pananisia ed maong a balita. (Basaen so Tagleey 3:31-33.) Ipanengneng tayo komon sirin a kombinsido tayon tua itan diad maseet tayon pampulong diad teritorya tayo.
Gagawaen mo kasi amin a paraan pian nabayuboan so interes ya impanengneng na saray totoo?
‘AGLA PIGAN ONDENGEL IRA, TAN IKAINDAN DAY MAUGES A PANAGBILAY DA’
17. Diad teritorya yo, panon mon naalig so paraan na impanumpal nen Jeremias ed ministeryo to?
17 Aglabay nen Jehova a naderal iray totoo. Manga samploy taon antis a naderal so Jerusalem, inusar toy Jeremias a mangipasabi na mensahe na ilalo ed saramay niyakar ed Babilonia. Oniay nabasa tayo: “Inengneng ko naani so saray matak ed sikara nipaakar ed maong, tan yakar ko ra lamet ed saya a dalin; et sikara naani ipaalagey ko, ya agko ra ipaabeba; et itanem ko ra naani: ya agko ra naani bagoten.” Inkuan nen Jeremias ed sikara: “Wala so ilalo a nipaakar ed unor a kasumpalan mo.” (Jer. 24:6; 26:3; 31:17) Inalig nen Jeremias so panmoriay Dios ed totoo. Walay peteg a panangiyansakit to ed totoo, ya ipapasabi to ed sikara so kerew nen Jehova: “Ombeneg kayo natan balang too ed mauges a dalan to, tan paabigen yo so saray gawa yo.” (Jer. 35:15) Wala ta ni nanonotan mon paraan a nipanengneng moy peteg ya interes ed saray totoo ed teritorya yo?
18, 19. (a) Anton awawey so nepeg tayon ipulisay diad panangipulong tayoy maong a balita? (b) Anton awawey nen Jeremias so nepeg tayon aligen?
18 Agbalot binmetel so aralem a panangaro nen Jeremias ed totoo. Anggan sanen aderal lay Jerusalem, siansia ni panangabagey to ed sikara. (Basaen so Tagleey 2:11.) Diad tua, saray Judio lanlamang so natetel ed asagmak da. Balet, ag-ira binagaan nen Jeremias na: ‘Ibabagak la’d sikayo.’ Imbes, nanermenan ton maong itan. Mipadpara, agkomon magmamaliw a rotina labat lay ministeryo tayo, a singa naoobliga tayo labat. Nepeg a napatnagan ed panagpulong tayo ya inad-aro tayo so alay abig a Dios tayo pati saray totoo, a ginawa unong ed indengan to.
Kasin ipapatnag mo’d totoo ya interesado ka ed pankaabigan da?
19 Anggapoy niyopresi na sayan mundo a pribilehyo odino posisyon a magmaong nen say pagmaliw a tasi na tuan Dios. Ontan so alikna nen Jeremias sanen insulat to: “Saray salitam aromog ira, et kinan ko ra; et saray salitam sikara nensaman ed siak so sakey a liket tan gayaga na pusok: ta natawag ak ed panamegley na ngaran mo, O Jehova.” (Jer. 15:16) Legan tayon ipupulong so maong a balita, komon ta dakel ni so makapikabat tan mangaro ed samay akautangan day bilay da. No walay panangaro tan seseg tayo a manlilingkor, a singa si Jeremias, sakey tayo’d saray makatulong ed sikara.
Base ed ehemplo nen Jeremias, anto niray arum a paraan pian nipasabim so ‘maong a salita’ nen Jehova?
a Singa ed sayan alimbawa, si Jehova et mabetbet a mangibabaki na saray anghel to a mangipasabi na mensahe a singano Sikatoy mansasalita.—Uko. 13:15, 22; Gal. 3:19.