“Pansiansia Yon Maabig so Ugali Yo ed Limog na Saray Totoo ed Mundo”

1. Akin et importante ya pansiansiaen tayoy maabig ya kondukta diad manasingger ya regional a kombension?

¹ Naaalay imano na totoo legan na saray kombension tayo kada taon, kanian importante ya diad ugali tayo et nirepresenta so Dios ya dadayewen tayo. (Lev. 20:26) Nepeg a napatnagan ya sikatayoy tuan papatumbok na Kristo diad maabig ya kondukta tayo tan anggan diad panangawes tan panag-ayos tayo. Diad iyatendi tayo ed manasingger ya regional a kombension, panon tayon ‘pansiansiaen so maabig ya ugali tayo ed limog na saray totoo ed mundo’ pian nidayew so Ama tayod tawen?—1 Ped. 2:12.

2. Anto ray pankanawnawa ya nipatnag tayoy Kristianon personalidad legan na kombension?

² Ipatnag so Kristianon Personalidad: Say aro ya ipapanengneng tayod balang sakey tan say paraan na pidedeneng tayod “saramay walad paway” et midumaan ed ugali na mundo. (Col. 3:10; 4:5; 2 Tim. 3:1-5) No mamangan tayod restawran, nepeg ya maomaong tan maanos tayo anggano wala ray onlesan problema. Say maabig ya kondukta so mamakiwas met ed sikatayon mangiter na tip parad saramay manserbid sikatayo.

3. Antoy panonot ed saray ateng, tan akin?

³ Kaukolan ya imanoen a maong na atateng iray anak da diad pankombensionan, restawran, tan diad saray pampupundoan da. (Uli. 29:15) Oniay imbaga na manager na sakey a hotel ed sakey a sanasawa: “Labalabay mi kayo. Maomaong tan marespeto iray pamilya tan ananak yo. Pantotongtongan kayo na amin ya staff mi. Komon ta wadia kayo kada weekend.”

4. Legan a walad lugar na pankombensionan, antoy nepeg tayon ikonsidera ed itsura tayo?

⁴ Masimpit a Panangawes: Nepeg ya matukoy tan masimpit so kawes tayo legan na kombension, ya ag-ipapatnag so alablabas ya estilo ya uso ed sayan mundo. (1 Tim. 2:9) Antis tan kayari na sesyon, labay tayo met ya paliisan so masyadon kasual odino akulastay ya panangawes. Diad ontan et proud tayon mangisulong na badge tayo tan agtayo nababaingan ya mantasi no walay pankanawnawa tayo. Say itsura tan maong ya ugali tayo diad manasingger iran kombension et aglabat makasagyat ed saray matuan-impanpuson totoo ya amtaey mensahe na Biblia a makapangiliktar na bilay, noagta mamaliket met itan ed si Jehova.—Sof. 3:17.

Saray Panonot ed 2014 ya Regional a Kombension

◼ Oras na Programa: Diad taloran agew, onggapo so programa ed alas 8:20 na kabuasan. Diad satan, nepeg ya onyurong tayo lan amin pian nigapoy programa ed mauksoy a paraan. No Biernes tan Sabado, onggapo so pansaran kanta tan pikakasi diad alas 3:55 na ngarem, tan alas 2:50 na ngarem no Simba.

◼ Pangireserba na Yurongan: Kalukas na pankombensionan kada kabuasan, ipangasin agmanaapuran onlad saray labay yon yurongan a singano miuunaan ed saray arum ya onatendi. Say inkamasakripisyo tayo ya mamapakiwas ed sikatayon iyuna so pankaabigan na arum et pakabidbiran ya tuan Kristiano itayo tan napakiwas so arum a makakaimano ya idayew so Dios. (Juan 13:34, 35; 1 Cor. 13:4, 5; 1 Ped. 2:12) Say nayari labat ya ireserbaan yoy yurongan et saray kaiba yod abung o kaiba yon nambiahe, odino saray iyaaralan yo na Biblia. Wala ray nitaryan panyurongan parad saray maedad la tan walay liliknaen. Lapud limitado irayan yurongan, sakey odino duara labat so mangasisti ya onyurong ed abay na maedad la odino walay liliknaen.

◼ Panangugto: Ipangasin mangawit kayo lay pangugtoan yo imbes ya ompaway ni pian mangaliw. Nayarin usaren so melag a pananginan a sarag ton iyabay ed salian yo. Saray angkakabaleg a pananginan tan napisit iran kargaan et agnaabuloyan ed pankombensionan.

◼ Donasyon: Nipatnag tayoy apresasyon tayo ed saray uksoyan na kombension diad pangiter na boluntaryo iran kontribusyon parad sankamundoan a kimey diad pankombensionan. No walay mandonasyon na tseke, nepeg ya ingaran itan ed Watch Tower.

◼ Tambal: No wala ray tambal ya iinumen yo, ipangasin agyo lilingwanan so mangawit na magenap, lapud anggapo iraya ed kombension.

◼ Please Follow Up (S-43) Form: Nepeg ya usaren iyan form a pangisulatan na impormasyon nipaakar ed siopaman ya interesado diad impormal ya impantasi tayo legan na kombension. Saray asulatan a form et nayarin iter ed Book Room odino ed sekretaryo na kongregasyon yo kasempet yo.

◼ Restawran: Igalang so ngaran nen Jehova panamegley na maabig a kondukta yo diad saray restawran. Say panangawes yo et nepeg a mangipanengneng a Kristianon ministro kayo. Mangiter na tip, no apasalan itan ed satan a lugar.

◼ Pamboluntaryo: Siopaman a labay toy manboluntaryo et kaukolan a manpalista ed Volunteer Service Department diad kombension. Saray kalangweran ya anggapo ni 16 años da et nayari met ya mankimey kaibay balanglan ateng da, say mangaasikasod sikara, odino arum ya wala lad edad ya nakaiba ran inyabuloy na ateng o manangasikaso ra.