Makaibangat ed Saray Dumerengel Mo

PIAN makaibangat so presentasyon mo ed saray dumerengel mo, kaukolan mo so mas ni nen say pangibaga na makanakanan suheto. Tepetan moy inkasika: ‘Akin a kaukolan na sarayan dumerengel a dengelen iyan suheto? Antoy iparaan kon ibaga a liknaen na saray dumerengel a sikara so peteg a nagunggonaan ed nasingbat?’

Diad eskuelaan, no napabtangan kan mangidemostra no panon so pampulong ed sakey, say unabung so dumerengel mo. Diad arum a kipapasen, nayarin mansasalita ka ed interon kongregasyon.

No Anto so Kabat na Saray Dumerengel Mo. Tepetan moy inkasika, ‘Antoy kabat na saray dumerengel nipaakar ed suheto?’ Nepeg a satan so basiyan na panibukelan mo ed paliwawam. No mansasalita ka ed kongregasyon a walaray dakel a matakken a Kristiano, aglabat basta uliten iray manunan katuaan, a kaslakan ed saratan so kabat da la. Usaren irayan manunan katuaan bilang basiyan. Siempre, no wala ra met so dakel a balon interesadon inmatendi, nepeg mo met a konsideraen so kakaukolan na saratan grupo.

Iyarunsam so kapeles na paliwawam unong ed samay kabat la na saray dumerengel mo. No ilaktip moray detalyin nayarin kabisado na dakel, kobrian labat iraya a magano. Balet ta mantantan sano iprepresenta iray ideyan nayarin balo ed kaslakan a dumerengel mo ta pian saraya so natebek dan malinlinew.

No Anto so Ibangat. Agnaynay a kabaliksan na pagmaliw a makaibangat so kiwala na balon bengatlan ibaga. Arum a managpaliwawa et simple so paraan na pangipaliwawa ra ed saray agkabisadon katuaan pian sigpot iratan a natalosan na dakel ed saray dumerengel diad unonan pankanawnawa.

Diad lawak na ministeryo, aliwan magenap so pamitla ed sakey a balita pian ipabitar a manbibilay itayo la ed kaunoran iran agew. Usaren so Biblia pian ipalinew so kabaliksan na nagagawa. Saya so tuan makaibangat ed unabung. Mipadpara, no bitlaen so detalye nipaakar ed ley na inkapalsa odino nipaakar ed bilay na tanaman odino ayep, say kalat mo et say agpangipresenta na pigaran makapasagyat a katuaan nipaakar ed siensia ya agnin balot nadngel na unabung. Noag ingen, nepeg a say gagalam et say pangitekep ed ebidensya manlapud palsa diad saray balikas ed Biblia a mangipanengneng a wala so sakey a Manamalsan mangaaro ed sikatayo. Saya so ontulong ed unabung a makatebek ed pamaakaran manlapud balon panmoria.

Nayarin sakey ya angat so pangipresenta ed suheton nadngel lan aminpiga na saray dumerengel. Balet pian magmaliw ya epektibon managbangat, kaukolan mon aralen so matalonan panggawa ed saya. Panon a nagawaan itan?

Makatulong so pansukimat. Imbes a basta ilaktip mo’d paliwawam iray katuaan a tampol mon nanonotan, usaren iray palapagan ed pansukimat ya asingbat ed saray pahina 33 anggad 38. Nonoten iray suhestion a niiter nipaakar ed saray gagalam a panggugunaetan mon nadampot. Diad pansukimat mo, naromog mon say agtanto kabat ya agawa nipaakar ed awaran so direktan misiglaot ed suhetom. Odino nayarin nabasam so agano nin balita a mangipapanengneng ed punton implanom a singbaten.

Legan ya uusisaen moy materyal, liing moy dilin nonot mo diad pangitepet na anto? akin? kapigan? iner? siopa? tan panon? Alimbawa: Akin a tua iya? Panon kon napaneknekan itan? Antoran popular a sisisiaen so makasengeg ed mairap a panebek na arum ed katuaan na Biblia? Akin ya importante itan? Panon iyan mangapekta ed bilay na sakey a too? Anton ehemplo so mangipanengneng ed gunggona na pangiyaplika ed satan? Antoy ipaparungtal na sayan katuaan na Biblia nipaakar ed personalidad nen Jehova? Depende ed materyal a sisingbaten mo, nayarin itepet mo: Kapigan so inkagawa na saya? Panon tayon niyaplikan praktikal iyan materyal natan? Nayarin napabilay mo ni ingen so panangipaliwawam diad pantepet tan pangebat ed arum ed saratan a tepet sano manpapaliwawa ka.

Nayarin kakaukolan na paliwawam so pangusar ed saray tekston kabisado na saray dumerengel mo. Antoy nagawaan mo ta pian makaibangat so pangiparungtal mo ed saraya? Agbasta basaen iratan; ipaliwawa iratan.

Say pangisingbat ed sakey a tekston kabisado so nayarin magmaliw a lalon makaibangat no isalaysay ya unona so sakey a parte na teksto insan onla ed sananey a parte, ya ibiig iray porsyon a misiglaotan ed tema na paliwawam insan saraya so isalaysay. Imanoen iray kalinewan na sakey a teksto a singa say Miqueas 6:8 diad New World Translation. Anto so “inkahustisya”? Siopan estandarte na inkahustisya so nasisingbat? Panon mon iyilustra so kabaliksan na “pangagamil ed inkahustisya”? Odino no panon mon iyilustra so kabaliksan na “pangaro ed panangasi”? Anto so kapaabebaan? Panon mon iyaplika so materyal diad kipapasen na sakey a toon matakken? Siempre, say aktual ya usaren mon materyal so nepeg a nadetermina diad saray sengegan a singa say temam, say gagalam, saray dumerengel mo, tan say nipabtang a panaon.

Saray simplin uker na termino so mabetbet a makatulong. Parad arum a totoo, makasurprisa tan makaibangat so pakaamta ed kabaliksan na “panarian” ya atukoy ed Mateo 6:10. Lapud napapanonotan ed sakey a depinasyon et natulongan ni ingen so sakey ya abayag lan Kristiano a lalon makatebek a susto ed peteg ya ibabaga na sakey a teksto. Saya so malinew sano basaen tayo so 2 Pedro 1:5-8 insan ukeran so nanduruman aspekto ya asalambit ed saratan a bersikulo: pananisia, kamaongan, pikakabat, dangka, panagsungdo, maridios a debosyon, inaagin panangaro, tan aro. No nausar ed parehon konteksto iray salitan mantukoyan ed kabaliksan, say panguker mo ed saratan so ontulong a mangiduma ed sakey a salita manlapud sananey. Tua itan ed saray termino a singa say kakabatan, pikakabat, pakatebek, tan pakatalos, a singa nausar ed Uliran 2:1-6.

Nayarin satan so natebek na saray dumerengel mo a makaibangat no basta manrason ka ed sakey a teksto. Onkelaw so dakel a totoo sano namoria ran unona a diad Genesis 2:7 ed arum a patalos na Biblia, si Adan so nibagan sakey a kamarerwan mabilay tan unong ed Ezequiel 18:4, saray kamarerwa so ompatey. Diad sakey ya inkagawa, sinurprisa nen Jesus iray Saduceo diad impanukoy to ed Exodo 3:6, ya ibabaga ran sisiaen da, insan satan so inyaplika to diad kioli na inaatey.​—Luc. 20:37, 38.

No maminsan et makaibangat so pangipalinew ed konteksto na sakey a teksto, saray sirkumstansyan akapaliber ed akasulat, tan say pakabidbiran ed nampaliwawa odino ed dinmengel. Kabisadon maong na saray Fariseo so Salmo 110. Siansia nin impaimano nen Jesus ed sikara so importantin detalye a naromog ed unonan bersikulo. Intepet to: “‘Anto so isipen yo nipaakar ed Kristo? Siopay akan-anak ed sikato?’ Inkuan da ed sikato: ‘Si David.’ Imbaga to ed sikara: ‘Panon, sirin, a si David diad panamegley na puyan et tinawag to na “Katawan,” a kuanto, “Inkuan nen Jehova ed Katawan ko: ‘Yurong ka ed nikawanan ko ya anggad saray kakabusol mo so ipasen ko ed silong na saray salim’”? No, sirin, sikato so tinawag nen David na “Katawan,” panon a sikato so anak to?’” (Mat. 22:41-45, NW) Sano manrason ka ed Kasulatan a singa ginawa nen Jesus, natulongan moray totoon manbasan lalon maalwar ed Salita na Dios.

Sano imbaga na sakey a managpaliwawa so panaon na inkisulat na sakey a libro na Biblia odino ed say panaon na inkagawa na sakey ya agawa, nepeg met a deskribien toray kipapasen ed saman a panaon. Diad ontan, lalon malinew a natebek na saray dumerengel so kaimportantian na libro odino say agawa.

Ontulong iray panangipareng a lalon makaibangat so ibagam. Nayarin pandumaan mo so sakey a popular a panmoria ed saman so ibabaga na Biblia ed parehon punto. Odino nayarin pamparengen mo so duaran manparan salaysay na Biblia. Kasin walaray pandumaan? Akin? Anto so naaralan tayo ed saratan? Naikdan moray dumerengel mo na balon panmoria ed tema diad panggawam na onia.

No napabtangan kan mangisingbat ed arum ya aspekto na Kristianon ministeryo, nayarin naparakep moy presentasyon mo diad pangigapo ed sakey a sumaryo. Singbaten no anto so gawaen, no akin a kaukolan a gawaen itan, tan no panon a misiglaot ed interamentin kalat tayo bilang Tastasi nen Jehova. Insan ipaliwawa no iner, no kapigan, tan no panon so panggawa ed kimey.

Anto no kakaukolanen na paliwawam a singbaten so arum “ed saray kaaralman na bengatla na Dios”? (1 Cor. 2:10) No igapom diad pangipabidbir tan pangisalaysay ed arum iran manunan elemento na suheto, saray detalye so lalon mainomay a natalosan. Tan no manampot ka ed asegek a sumaryo na materyal mo, nayarin napenepenek so liknaan na saray dumerengel mo a talagan walay naaralan da.

Simbawa ed Kristianon Panagbilay. Nagkalalo lan nagunggonaan iray dumerengel no tulongan mo ran mantalos no panon a say impormasyon ed paliwawam so onaplika ed bilay da. Legan ya usisaen moray teksto ed nipabtang ed sikan materyal, tepetan moy inkasika, ‘Akin a sayan impormasyon so nipreserba ed Kasulatan ya anggad panaon tayo?’ (Roma 15:4; 1 Cor. 10:11) Isipen so nipaakar ed saray kipapasen ed bilay ya aarapen na saray dumerengel mo. Konsideraen iray kipapasen a mismo diad liwawa na simbawa tan saray prinsipyo ed Kasulatan. Diad paliwawam, manrason manlapud Kasulatan ya ipanengneng no panon so pakatulong da ed sakey a too diad pangarap ton makabat ed ontan iran kipapasen. Paliisan so panaglawin inkalapagan. Singbaten iray espesipikon awawey tan kiwakiwas.

Diad pangigapo, iyaplika so sakey odino duaran suhestion ed tagey diad paliwawan ipaparaan mo. Legan a makakagamor ka na eksperiensya, iyaplika so dakel ed saratan. Nasabi panaon et naromog mon mantalaran iray dumerengel mo ed saray paliwawam, a mailalon makadngel ira na bengatlan pakagunggonaan da.