Nipaseseg so Panangusar ed Biblia

SAY pilalek tayo et say pangipaarap ed imano na amin diad Salita na Dios, say Biblia. Satan a sagradon libro so basiyan na mensahen ipupulong tayo, tan kaliktan tayon namoria na totoo a say ibabaga tayo so agnanlapu ed sikatayon dili, noagta nanlapud Dios. Nakaukolan a bayuboan na totoo so talek da ed Biblia.

Diad Lawak na Ministeryo. Sano manpaparaan a manpulong, naynay a mamili na sakey odino onsulok nin teksto ya inabang ed totoon mabulos ya ondengel. Anggano iplaplanom so manggawa na antikey a presentasyon ed literatura na Biblia, mabetbet a makagunggona so pamasa na sakey a matukoy a teksto ed Biblia. Say Biblia so walaan na babaleg a pakayarin mangiwanwan ed kinmarneron totoo nen say antokaman a nayarin nibaga tayo. No talagan imposible so pamasa ed mismon Biblia, nayarin mangaon ka ed satan. Nen inmunan siglo, daiset ni iray kopya na lukot na Kasulatan. Ingen, si Jesus tan saray apostol to so malaknab ya angaon manlapud Kasulatan. Nepeg a manseet itayo met a mangipatlep ed saray teksto tan usaren iratan a matukoy ed ministeryo tayo tan no maminsan et aonen labat iratan.

No nayarian moy mangibasa ed Biblia, bembenan mo ta pian natumbok na unabung legan a babasaen mo. No subaybayan na unabung ed mismon Biblia to, nayarin nagkalalon paborabli so ikiwas to ed walan binasa to.

Anggaman ontan, nepeg mon isipen ya arum a managpatalos na Biblia so ag-anumbok a mapeget ed Salita na Dios. Saray patalos da so nayarin agbalot mitukoyan ed amin na saraman so wala ed orihinal iran lenguahe na Biblia. Pigaran modernon patalos so angekal ed personal a ngaran na Dios, a kinilot da so ibabaga na orihinal a lenguahen teksto nipaakar ed kipapasen na inaatey, tan inyamot da so ibabaga na Biblia nipaakar ed gagala na Dios diad dalin. Ta pian nipanengneng ed sakey a too so agawa, nayarian mon ikompara iray manunan teksto manlapud nanduruman Biblia odino manlapud saray akadkaunan patalos ed parehon lenguahe. Parad pigaran tema, say Reasoning From the Scriptures so mangitatarya na panangikompara ed saray paraan na impangipatalos na nanduruman patalos ed saray manunan balikas diad saray bersikulon mabetbet a nauusar. Siopaman a mangaaro ed katuaan so misalsalamat lapud pikakabat ed saray katuaan.

Diad Saray Miting ed Kongregasyon. Amin so napaseseg a mangusar ed Biblia ra diad saray miting ed kongregasyon. Maabig so nagawaan na saya diad pigaran dalan. Pansiansiaen na satan so imano na saray dumerengel ed walan sisingbaten. Mangaarum na nanengneng a biskeg ed instruksion ya isasalita na managpaliwawa. Tan ipapasesep na satan ed kanonotan na saray balobalon interesado a say Biblia so tuan lapuan na saray sisisiaen tayo.

Mandependin tuloy diad panamaseseg mo no kasin susubaybayan na saray dumerengel mo so pangibabasam ed saray teksto na Kasulatan diad mismon Biblia ra. Sakey ed saray sankaabigan a metodo et say direktan pangimbita.

Responsabilidad mon managpaliwawa a desidien no dinan iran teksto so labay mon idanet pian paanap iratan ed saray dumerengel. Sankaabigan so pamasa ed saray teksto a makatulong ed pakatibukel mo na saray manunan puntom. Insan, no wala ni oras, mangiyarum ni na pigara a manuporta ed argumentom.

Siempre, kaslakan et agmagenap so basta pangisitas ed teksto odino say basta pangibaga ed saray dumerengel ya anapen da so sakey a teksto. No basaen mo so sakey a teksto insan onla ka ed sananey anta agni anggan aromog na saray dumerengel mo imay inmuna, agmanbayag et nadismaya la ra tan ontunda la ran mangitumbok ed Biblia ra. Magmaliw a maimano. Sano aromog la na karaklan so teksto, basaen la itan.

Manisip a masakbay. Isitas mo lan unona so teksto insan basaen. Agla tanto nadarak so panaon lapud panalagar ni ed saray dumerengel a mananap ed teksto. Anggaman daiset a materyal so nakobrian no paanap mo ni ed saray dumerengel so teksto, saray gunggona so manggawa’d satan a makanakana.