Duara ya Balon Membro na Mananguley ya Ulop

NEN annual meeting ya agawa nen Oktubre 5, 2024, walay espisyal ya anunsio: Si Brother Jody Jedele tan Jacob Rumph et aturo bilang membro na Mananguley ya Ulop na Saray Tasi nen Jehova. Pareho ira ya abaybayag lan matoor ya manlilingkor ed si Jehova.

Si Brother Jedele et inyanak ed Missouri, U.S.A., tan binmaleg ed katuaan. Manaayam so pamilya ra ed lugar ya daiset labat so Tasi, tan baleg so pankaukolan ditan. Kanian akabat nen Brother Jedele so dakel ya agagi ya oonla ditan pian ontulong ed panagpulong. Pambiliban toy aroan tan pankakasakey da. Sikatoy abautismoan nen Oktubre 15, 1983, nen tinedyer ni labat. Labalabay toy manpulong kanian nan-regular payunir nen Setyembre 1989. Diad saman et kakka-graduate to ni labat ed high school.

Nen ugaw ni Brother Jedele tan samay agi ton bii, ipapasyar ira na saray atateng da ed Bethel. Lapud satan, in-goal dan sanagi so panlingkor ed Bethel. Tan asabi panaon, agawaan da itan ya goal da! Atawag si Brother Jedele ed Bethel diad Wallkill nen Setyembre 1990. Say unonan asainmin to et diad Cleaning Department, insan niyasain ed Medical Services.

Diad saman met lanlamang ya panaon, agaylay iyaaligwas na saray Spanish congregation ya asingger ed Wallkill. Kakkaukolan iray brother ya mangidaulo. Kanian tinmulong si Brother Jedele ed sakey ed saratan ya kongregasyon tan nanaral na Spanish. Ag-abayag, akabat toy Sister Damaris, sakey ya payunir ya ka-sirkito to. Nen nankasal ira, saniba ran nanlingkor diad Bethel.

Nen 2005, kaukolan dan taynanan so asainmin da ed Bethel pian naasikaso da iray matoor ya atateng da. Pero nanregular payunir iran dua. Kaleganan to man, nagmaliw ya instruktor si Brother Jedele ed Pioneer Service School, tan nanlingkor bilang membro na Hospital Liaison Committee tan Regional Building Committee ed lugar da.

Nen 2013, atawag lamet si Brother tan Sister Jedele ed Bethel parad samay construction project ed Warwick. Manlapud saman, asali da met so nanlingkor ed Bethel diad Patterson tan Wallkill. Niyasain si Brother Jedele ed Local Design/Construction Department tan diad Hospital Information Services. Nen Marso 2023, sikatoy aturo bilang katulongan na Service Committee. No pawilen to kuno iray nanduruman asainmin to, oniay nibaga to: “No makaawat kay balon asainmin, ompan mannerbiyos ka. Pero tandaan mo ya tsansam itan pian nipanengneng moy talek mo ed si Jehova. Pagmaliwen to ka ed labay ton pagmaliwan mo.”

Si Brother Rumph et inyanak ed California, U.S.A. Nen ugaw ni, inaktibo si nanay to, pero imbangat to nin siansia ed si Brother Rumph so katuaan. Tinaon met ya bibisitaen nen Brother Rumph so bai to ya maseseg ya Tasi. Lanang ya iistoryaen nen bai to so nipaakar ed Biblia kanian lalo ton naamtaan so katuaan. Nen 13 so taon to, nampaiyaral na Biblia ya anggad abautismoan nen Setyembre 27, 1992. Makapaliket ta nagmaliw lamet ya aktibo ed panaglingkor si nanay to. Anggan si tatay to tan saray agagi to et nampaiyaral na Biblia ya anggad abautismoan ira.

Nen kabataan ni Brother Rumph, anengneng ton mismo ya maliket so bilay na saray payunir. Kanian ka-graduate tod high school, nen Setyembre 1995, ginmapo ya nampayunir. Nen 2000, linmad Ecuador pian ontulong ed lugar ya daiset so Tasi. Ditan to akabat si Sister Inga, sakey ya payunir ya nanlapud Canada. Nen nankasal ira, tinmulong ira ed sakey ya baley na Ecuador ya ditan et walay melag ya grupo na saray agagi. Natan et wala lay matmaaligwas ya kongregasyon ed satan ya baley!

Asabi panaon, niyasain si Brother tan Sister Rumph bilang espisyal payunir, insan ira nanlingkor ed sirkito. Tan nen 2011, naimbitaan ira ya manaral ed koma-132 ya klase na Gilead. Ka-graduate da ed Gilead, nanlingkor ira ed nanduruman bansa tan nandurumay asainmin da—nagmaliw iran Bethelite, misionero, tan niyasain met ira diad kimey ed sirkito. Asali met nen Brother Rumph so nagmaliw ya instruktor ed School for Kingdom Evangelizers.

Pero nen COVID-19 pandemic, pinmawil si Brother tan Sister Rumph ed United States. Naimbitaan iran manlingkor ed Bethel diad Wallkill, tan nan-training si Brother Rumph ed Service Department. Ag-abayag, pinmawil ira ed Ecuador branch, tan niyasain si Brother Rumph ya manlingkor bilang membro na Branch Committee. Insan nen 2023, atawag ira ed Warwick. Tan nen Enero 2024, aturo si Brother Rumph ya manlingkor bilang katulongan na Service Committee. No isipen to kuno iray nanduruman asainmin ya naawat to, oniay nibaga to: “Aga akadepende ed lugar pian nibagan espisyal so sakey ya asainmin. Anggan iner so asainmin tayo, espisyal itan lapud saray totoon nakakaiba tayo ed panaglingkor.”

Misatsalamat tayo ed agnatawalan ya kuli na sarayan brother. ‘Itultuloy tayo sirin ya pablien iray ontan ya lalaki.’—Fil. 2:29.