E Punto di Bista Biblico

Cristiannan Mester Predica na Otro Hende?

KISAS bo criansa of cultura ta dicta cu no mester papia di religion pafo di e circulo di famia of di iglesia. Door di esei, lo bo por sinti bo irita si onverwacht un hende yama na bo cas cu Bijbel den man. Algun hende tin e punto di bista aki debi na e actonan violento cu a tuma luga den historia di religion bou di e pretexto di kier salba hende.

Hopi nacion su historia ta conta con hende a comberti masalmente, no pasobra amor pa Cristo a motiva nan, sino mas bien pasobra nan tawatin miedo di ser mata si nan no comberti. Hopi hende a prefera di bai sconde, di bandona nan cas y pais, of asta perde nan bida—tin di nan kima na staca—y no comberti na e religion di nan persiguidonan.

E bukinan inspira di Bijbel no ta apoya tal combertimento forsa. Pero esei ta nifica tambe cu bo no mester comparti bo creencianan religioso cu otro hende? Bijbel mes ta contesta esei.

Siña cu Autoridad

Prome, considera e ehempel cu Hesucristo a pone. E tawata un gran maestro cu a influencia e bida di esnan cu a scuch’e. (Huan 13:13, 15) Den e Sermon Riba Sero, su siñansa tawata simpel pero potente. E efecto tawata cu su oyentenan a “keda asombra di su siñansa; pasobra e tawata siña nan manera un hende cu tin autoridad.” (Mateo 7:28, 29) Despues di 2.000 aña, ainda su siñansanan ta influencia bida di esnan cu analisa nan. Confirmando e punto di bista aki, Profesor Hans Dieter Betz a remarca cu “e influencia cu e Sermon Riba Sero ta eherce ta bai hopi mas leu cu e fronteranan di hudaismo y cristianismo, of asta e cultura Occidental.”

Djis prome cu el a subi na shelo Hesus a duna un mandamento cu a garantisa cu despues cu e no t’ei mas e trabou di siña hende cu el a cuminsa cu ne lo a sigui y asta lo a prospera. (Huan 14:12) El a instrui su disipelnan pa bai na hende di tur nacion, y “siña nan pa cumpli cu tur loke” el a manda. E proposito principal di e asignacion aki a bira bisto ora cu den e mesun declaracion Hesus a bisa: “Pesei, bai y haci . . . disipel.”—Mateo 28:19, 20; Echonan 1:8.

Considera tambe e ehempel di apostel Pablo. Despues cu e mes a comberti na cristianismo, e no a basila pa comparti su fe nobo cu otronan. (Echonan 9:17-19, 22) Pablo tawatin e custumber di papia den sinagoga y duna prueba pa mustra “cu e Cristo mester a sufri y lanta for di e mortonan.” Den un forma habil “el a rasona cu nan for di e Scrituranan” afin di “combence Hudiu y Griego.” Segun un autoridad riba e tema, e palabra Griego traduci como “combence”, ta nifica “causa un cambio den e manera di pensa mediante e influencia di rasonamento of di consideracionnan moral.” E resultado di Pablo su rasonamento combencente tawata cu el a “combence masha hopi hende, y a haci nan desvia [cambia na otro opinion, NW].”—Echonan 15:3; 17:1-4, 17; 18:4; 19:26.

Obliga of Combence—Cua?

Den tempo moderno, hende ta uza e palabra “proselitismo” pa indica cu ta obliga hende comberti na algo. Bijbel no ta apoya tal practica. Al contrario, e ta siña cu hende a ser crea cu boluntad liber y cu e privilegio y responsabilidad di dicidi con nan lo hiba nan bida. Esaki ta inclui e decision con nan ta adora Dios.—Deuteronomio 30:19, 20; Hosue 24:15.

Hesus a respeta e derecho aki cu Dios a duna hende. Nunca el a uza su poder y autoridad extraordinario pa forsa, of obliga, un persona acepta loke el a bisa. (Huan 6:66-69) Cu e proposito di yega na curason di su oyentenan, el a motiva nan door di uza rasonamento logico, comparacion y pregunta pa haya nan punto di bista. (Mateo 13:34; 22:41-46; Lucas 10:36) Hesus a siña su disipelnan pa demostra e mesun respet aki na otro hende.—Mateo 10:14.

Ta bisto cu Pablo a sigui e ehempel di Hesus den su sirbishi. Aunke Pablo a combence su oyentenan cu rasonamento biblico solido, el a respeta nan sintimento y punto di bista. (Echonan 17:22, 23, 32) E tawata sa cu ta amor pa Dios y pa Cristo tin cu motiva nos pa sirbi nos Creador activamente. (Huan 3:16; 21:15-17) Pesei nos decision ta un decision personal.

Decision Personal

Ora hende na tino ta tuma decisionnan grandi den bida, manera por ehempel cua cas mester cumpra, unda pa traha y con pa cria yiu, nan no ta haci esei riba impulso. Talbes nan ta investiga e diferente posibilidadnan cu tin, ta medita riba loke nan a haya y probablemente ta pidi conseho. Ta despues di tuma tur e cosnan aki na cuenta nan ta tuma un decision.

E decision con nos mester adora Dios ta merece mas tempo y esfuerso cu cualkier otro decision den bida. Lo e tin un efecto riba e manera cu nos ta hiba nos bida awor, y mas importante, lo e tin un efecto riba nos speransa di bida eterno den futuro. E cristiannan di prome siglo na Berea a comprende esaki bon cla. Maske ta apostel Pablo a splica nan e bon nobo personalmente, toch nan a examina e Scritura tur dia pa haci sigur cu loke Pablo tawata siña nan tawata cierto. Como resultado, “hopi di nan” a bira creyente.—Echonan 17:11, 12.

Awe Testigonan di Yehova ta sigui cu e trabou cu Hesus a organisa, esta, siña hende y haci disipel. (Mateo 24:14) Nan ta respeta cada ken su derecho di tin su propio religion. Pero ora ta trata di comparti nan creencianan religioso cu otro hende, nan ta sigui e ehempelnan cu tin den Bijbel. Si, nan ta uza rasonamento honesto for di e Scritura pa haci loke nan ta considera un trabou cu ta salba bida.—Huan 17:3; 1 Timoteo 4:16.