Pasa Bon Weekend!

CASI tur hende ta anhela pa e yega, y ora e yega, hopi bes e ta e parti mas dushi di e siman. Algun hende ta uz’e pa biaha, otronan ta uz’e pa dibirti, algun ta uz’e pa adora Dios y otronan ta uz’e pa keda cas y drumi.

Nos ta papiando aki di e lapso di tempo entre e fin di un siman di trabou (of di scol) y e comienso di e siguiente siman: weekend! Den e mundo Occidental, weekend ta cuminsa diabierna y ta dura te cu diadomingo. Pero di unda e idea di weekend a bini? Y si bo ta biba caminda un siman di cinco dia di trabou ta comun, con lo bo por uza bo weekend den un manera productivo?

For di un Dia di Sosiego pa Weekend

E leinan di sabat cu Dios a duna e nacion di Israel rond di 3.500 aña pasa a stipula: “Seis dia trabou mag wordo haci, ma e di shete dia tin un sabat di sosiego completo, santo na SEÑOR; ken cu haci cualke trabou riba dia di sabat mester wordo mata sigur.” (Exodo 31:15) Sabat tawata tambe un oportunidad pa mayornan Israelita atende e necesidadnan spiritual di nan famia.

E sabat Hudiu a core for di bahada di solo diabierna te bahada di solo diasabra. Sinembargo, segun The World Book Encyclopedia, e supuesto cristiannan “a haci diadomingo un dia pa adoracion special, pasobra, pa nan, Hesus a resusita riba e dia ei. Den siglo 3 A.D., tanto iglesia como estado a reconoce diadomingo oficialmente como e dia di sosiego na Europa.”

Ta interesante pa nota cu ta te poco tempo pasa numa a haci e periodo di sosiego mas largo cu un dia. Cuminsando na Bretania den e decada di 1870, e siman di trabou tawata caba diasabra 12 or di merdia. E traimerdia liber, combina cu diadomingo a forma e weekend. Segun e revista Atlantic Monthly, diasabra traimerdia a cuminsa cu un almuerso den famia, “sigui pa e baño di cada siman den un luga publico pa baña den bicindario.”

Na Merca, nan a rek e weekend asta mas ainda, y hacie dos dia completo. Di acuerdo cu un fuente, un fabrica na New England tawata e prome cu na 1908 a adopta un siman di trabou di cinco dia. E areglo a cumbini tanto e trahado Hudiu como esun “cristian” pasobra cada grupo tawatin su mes dia di sosiego—diasabra pa Hudiu y diadomingo pa “cristian.” E siman di trabou di cinco dia a haya acohida hopi lihe. E fabricante di auto Henry Ford a promove e idea, pasobra den su astucia el a conclui cu si famianan cuminsa sali mas den weekend, e demanda pa auto ta aumenta.

Bo Tin Algo Plania pa Weekend?

Awendia e weekend di dos dia a bira algo comun y coriente pa e mundo Occidental. Si bo ta biba den e parti ei di mundo, na fin di un siman di trabou bo coleganan di trabou tin chens di puntra bo, “Ki plan bo tin pa e weekend aki?” E pregunta ei ta habri caminda pa cosnan excitante.

Despues cu henter un siman bo doño di trabou a controla bo tempo, weekend ta duna bo chens di bolbe haya control riba bo bida. E por permiti bo disfruta di un pausa den bo rutina di tur siman. E por ta un oportunidad pa bo haya un poco sosiego necesario of pa pasa un rato hunto cu bo sernan keri. Of e por ta simplemente un chens pa participa den un di e distraicionnan mas popular di weekend—haci compras pa placer. “Ta dushi pa cana haci compras”, segun Brigitte, kende ta biba na Alemania.

Estudionan ta revela cu hopi hende ta prefera di uza nan tempo liber simplemente pa relaha. Pa hendenan cu ta echt gusta keda cas weekend, tin hopi posibel dibirticion: cuida mata y cura, colecciona stampia, toca of scucha muzik, wak video, cushina, skirbi carta, lesa, cose, brei, haci deporte y pinta, djis pa menciona algun. Algun ta prefera actividadnan cu ta permiti nan pasa tempo cu nan yiunan of casa, manera traha puzzel of haci spel.a

Bijbel ta condena tal uzo aparentemente sin sentido di bo tempo? No necesariamente. Salomon a skirbi: “Un man yen di sosiego ta miho cu dos mokete yen di trabou y coremento tras di biento.” (Eclesiastes 4:6) Wega, sosiego y relahamento den un forma modera definitivamente tin nan luga den bida di un cristian.

Algun Ta Haci di Mas

Di otro banda, demasiado di un cos, asta un bon cos, por ta contraproductivo y dañino. Por ehempel, entrenamento fisico tin su beneficionan. (1 Timoteo 4:8) Pero algun atleta di weekend ta practica deporte cu masha fervor. Dicidido pa sali triunfado door di desaroya e tecnica corecto, algun ta dedica demasiado tempo y placa na les serca instructor priva y ekiponan costoso di deporte.

Tambe tin riesgonan di salu pa hende cu ta forsa nan curpa cu ta for di condicion pa bai mas aleu cu su capasidad. Un revista noticiero a papia di ‘hende cu ta dedica nan mes energicamente na deporte den weekend’, kendenan, determina pa recupera e curpa cu nan tawatin na jong, ta haya nan cu spierverrekking, corta y lesion. Otronan ta risca nan bida of expone nan curpa na lesion serio den deportenan peligroso.b Pues, e conseho di Bijbel pa ta “modera” ta hopi apropia. (Tito 2:2) Ehercicio mester refresca, no agota bo of pone bo bida na peliger.

Pues, algun ta prefera di disfruta di ehercicio fisico menos severo. Por ehempel na Alemania, hopi hende ta gusta cana. De echo, un pasatempo masha popular na Europa ta pa cana, no pa competi contra otro hende, sino contra oloshi. E idea ta pa cubri un ruta cu ta pasa den un zona di cunucu den un cierto tempo limita. Esei sigur ta un manera placentero pa haci ehercicio y na mesun tempo disfruta di panorama bunita. Y e ta algo cu henter e famia por disfruta di dje.

Weekend Demasiado Druk

Tin biaha hende ta pone asina tanto cos di haci den un weekend cu al final nan no a disfruta di casi ningun di nan. Ora e siman nobo cuminsa, nan ta sinti nan, no refresca, sino hopi cansa. E revista Aleman Focus a informa di un estudio den cua 27 porshento di esnan encuesta a haya cu nan tawatin demasiado cos di haci den nan tempo liber y cu esei a causa stress.

“Sosiego ta proteha eficiencia”, segun revista Time. Hesucristo tambe a compronde e necesidad cu nos tin pa descansa y relaha. Marco 6:31 ta informa cu Hesus a bisa su disipelnan: “‘Ban cu mi, boso so, na un luga solitario y sosega un rato.’ Pasobra tawatin hopi hende ta bai bin, y nan no tawatin ni tempo pa come.” Pues, aunke ta bon pa haci ehercicio, haci compras y cosnan por estilo den weekend, saca tempo tambe pa lesa pa placer, sosega of drumi. Cosnan asina por refresca bo bastante. Sinembargo, tin algo mas cu por yuda bo gosa di cualkier weekend.

Necesidad Spiritual

Hesus a bisa den su Sermon Riba Sero: “Felis ta esnan cu ta conciente di nan necesidad spiritual.” (Mateo 5:3, NW) Un di e propositonan di e dia di descanso di sabat den su forma original tawata pa permiti hende atende nan necesidad spiritual. Nos por uza weekend pa e mesun proposito awe? Tuma por ehempel Testigonan di Yehova. Mayoria di nan congregacionnan tin nan reunionnan cristian principal riba sea diasabra of diadomingo. Nan reunionnan mas grandi, manera asamblea of congreso tambe nan ta tene den weekend. Hopi Testigo di Yehova ta dedica tempo den weekend na bai di cas pa cas y papia over di Bijbel cu nan prohimo.

Claro cu mescos cu tur otro hende, Testigonan di Yehova tin nan trabou, cas y famia pa cuida. Pues ora ta posibel, nan tambe ta plania actividad di tempo liber pa nan mes y nan famia. Pero nan ta duna prioridad na cosnan spiritual. Esei ta cansa nan? Considera e experencianan di e siguiente personanan.

Prome cu Jürgen y Doris, un pareha Aleman, a bira Testigo di Yehova, nan tawata pasa nan weekend trahando den un club di deporte. Melle y Helena tawata pasa nan tempo bishitando galerianan di arte. Pa un homber cu yama Helmut, weekend tawata tempo pa sali bai disfruta di naturalesa. Y un mohe cu yama Silvia tawata pasa su weekendnan den discoteca. Sinembargo, for di tempo cu e personanan aki a bira Testigo di Yehova, nan custumbernan di tempo liber a cambia drasticamente.

Jürgen y Doris ta splica: “Door di nos actividadnan di tempo liber, nos no tawatin un bida laf, pero bo no por a bisa tampoco cu e cosnan aki a enrikece nos bida. Awendia, yuda otro hende compronde Bijbel ta duna tanto nos bida como bida di otro hende nificacion y proposito.” Kico di Melle cu Helena? “Bijbel ta duna guia pa e miho caminda di bida, y door di papia cu otro hende tocante dje nos ta haya hopi goso.” Pakico Helmut ta haya hopi mas satisfaccion den bida awor? “Mi sa cu loke mi ta haciendo den e ministerio publico ta importante pa Yehova”, e ta bisa. Y Silvia ta comenta: “Predica ta nifica topa hende y hiba combersacion interesante, y mi ta gusta tur dos.”

Pakico no papia cu Testigonan di Yehova e siguiente biaha cu nan yama na bo cas? Un combersacion cortico cu un di nan lo por ta e prome paso pa bo logra mas proposito den bida, no djis weekend sino tur dia di siman!

Sea cual sea e actividadnan di tempo liber cu bo ta prefera, haci bo weekend edificante y agradabel. Si bo ta biba den un pais cu ta papia Aleman, nos ta desea bo “schönes Wochenende.” Si ta Spaño bo ta papia, e ora ei, “¡Buen fin de semana!” Si ta Ucraniano, nos lo por bisa, “Бажаю вам приємно провести вихідні.” Unda cu bo ta biba, y sin importa kico cu bo ta haciendo, pasa bon weekend!

[Nota]

[Komentario na pagina 21]

Un weekend agradabel ta un mescla saludabel di sosiego, recreo y actividad spiritual