E Dia Cu un Planta Kimico A Explota
DI E CORESPONSAL DI SPIERTA! NA FRANCIA
DIA 21 DI SEPTEMBER 2001, dies dia so despues di e atake contra World Trade Center na New York, un enorme explosion den un planta kimico causa accidentalmente, a destrosa e barionan pafo di e stad di Toulouse, den parti suitwest di Francia. Esaki tawata loke e revista noticiero Frances Le Point a describi como “e piyo desaster industrial na Francia desde fin di Segundo Guera Mundial.”
Un 300 ton di mest a explota, lagando un buraco di 50 meter hancho y 15 meter hundo. E explosion y e ola di cayente y presion di aire cu el a genera, a mata 30 persona y herida mas cu 2.200 hende. Un 2.000 cas a ser destrui y 27.000 cas den un rayo di ocho kilometer a sufri daño. A surgi panico como cu e hendenan a kere cu tawata trata di un atake terorista, y cu un nubia di gas venenoso a sali for di e planta.
Varios Testigo di Yehova a ser lesiona door di e explosion, y hopi di nan a ser afecta den otro maneranan. Amor cristian a motiva e otro Testigonan pa bin duna nan un man mesora. (Huan 13:34, 35) Lo siguiente ta un relato di e actividadnan di ausilio.
“No A Keda Nada di e Edificio”
Khoudir ta un di e sobrevivientenan cu tawata traha na e planta kimico. E explosion y fragmentonan cu tawata bula rond a dal e pon’e perde conocemento, fractura su cachete y saca su sleutelbeen for di luga. Benjamin, kende ta traha den un edificio banda di e planta kimico, a ser benta contra muraya, tres meter leu for di caminda e tawata para. Glas cu a spat for di otro a cort’e varios caminda y a bora su wowo drechi, dañando su bista. El a bisa: “Mi ta di bon cu mi no tawata sinta na mi luga. Alrededor di 600 kilo di bloki a cai riba mi stul.”
Alain, docente na un scol cu ta keda 200 meter for di e planta, tawata sacando fotocopia ora cu e explosion a tuma luga. El a bisa: “No a keda nada di e edificio; solamente pidanan di staal. Ningun muraya, ningun dak, nada. Pidanan di glas a dal mi. Mi cara a keda tur corta. Tawata como si fuera un hende a dal mi cu bate den mi cara.” Alain a perde un wowo y el a keda parcialmente sordo door di e explosion.
Ausilio Rapido
Rapidamente, ancianonan di e 11 congregacionnan di Testigonan di Yehova afecta door di e desaster a tuma contacto cu cada miembro di e congregacion pa wak si nan a sufri lesion of daño. Mesora a manda boluntario serca esnan cu tawatin mas mester di yudansa. E boluntarionan a haya sa cu mas o menos 60 cas di Testigo a sufri daño, y nan a yuda rond di dies famia haya un otro caminda pa biba. Tambe e boluntarionan a yuda drecha dos Salon di Reino cu a sufri daño. Fuera di esei, nan a duna yudansa practico na esnan cu mester a yena claim di seguro, mustrando nan con pa hacie.
Catherine cu Michel ta biba djis dilanti di e planta. Catherine tawata den auto na momento di e explosion. El a splica: “Na prome instante nos a sinti algo manera un temblor. Un par di seconde despues, nos a tende e explosion. Anto nos a mira huma ta bolter. Mi a core bai na mi bario; el a keda manera un zona di guera. Tur e casnan tawata destrosa, y e bentananan di negoshi kibra. Hende tawata core riba caya. Otronan tawata sinta abou of drumi riba caminda ta grita of yora. Na cas, e explosion a bula tur nos bentananan y asta nos kozijnnan, y no a sobra ningun porta. Nos rumannan cristian a bin yuda nos rapidamente. Ya pa traimerdia un team di e congregacion a bini cu hemchi y basora y tambe cu tapol pa tapa e bentananan.”
Alain cu Liliane tambe ta biba banda di e planta. E explosion a destrui nan apartamento. Alain a bisa: “Tur cos a keda na werki. E muraya- y mosaiconan a scheur, y tur bentana, porta y mueble a ser destrui. No a keda nada nada. Mesora nos rumannan cristian a bin yuda nos. Nan a limpia tur e ruina y tambe a yuda limpia e otro apartamentonan den e edificio. Nos biciñanan a keda hopi sorprendi ora nan a mira cuanto hende a bin yuda nos.” E mainta ei prome cu e explosion, un studiante di Bijbel a bel Alain pidie bin studi’e. Liliane tambe a sali bai haci un rospondi. Pues, ningun di dos no tawata na cas ora e explosion a tuma luga.
E yudansa cu e Testigonan a duna no tawata limita na miembronan di e congregacion. Despues cu nan a yuda otro, nan a yuda nan biciñanan, sacando tur cos destrui for di e apartamentonan y tapando e bentananan kibra. Biciñanan a keda masha gradicido y asombra cu nan no a cobra pa esei.
Tambe e Testigonan a ofrece pa duna un man na autoridadnan local, kendenan a keda tolondra ora nan a mira con grandi e daño tawata. Testigonan a limpia scolnan y otro edificionan publico. Den un bario, e autoridadnan local a manda boluntarionan Testigo bai di cas pa cas pa evalua ki necesidad e hendenan tawatin.
Percurando Yudansa Spiritual
Fuera di yudansa material, hopi Testigo den e area di e explosion tawatin mester di yudansa spiritual. Pesei, superintendentenan biahero hunto cu e ancianonan local a bishita tur esnan afecta door di e desaster. E rumannan a aprecia e sosten aki masha hopi. Catherine a bisa: “E ancianonan a uni pa sostene nos. Nan a bin encurasha nos. Realmente, esei ta loke nos tawatin mester, mas cu yudansa material.”
E amor cristian cu a keda demostra cu echo direct despues di e desaster aki, a causa algun comentario interesante. Un Testigo cu tawata seriamente lesiona, a bisa: “Nos no sa kico lo pasa mañan. Nos tin cu sirbi Yehova constantemente como si fuera awe ta nos ultimo dia.” (Santiago 4:13-15) Un otro Testigo a conclui: “Tur esaki a yuda nos realisa cu nos no mester ta mucho pega na cosnan material. Loke ta di berdadero balor ta pa nos ta den e pueblo di Yehova.”
[Plachi na pagina 22]
Benjamin y Khoudir
[Plachi na pagina 22]
Alain
[Plachi na pagina 23]
Toulouse, e dia despues di e explosion
[Reconocemento]
© LE SEGRETAIN PASCAL/CORBIS SYGMA
[Plachi na pagina 23]
Alain y Liliane