E Punto di Bista Biblico

Dios Ta Bendiciona Nos cu Rikesa?

“Ta e bendicion di SEÑOR ta haci rico, y e no ta agrega tristesa na dje.”—PROVERBIONAN 10:22.

E TEXTO biblico menciona aki riba ta nifica cu Dios ta bendiciona su sirbidonan cu rikesa material? Tin hende ta pensa cu si. Wak kico un autor Australiano cu ta predicado pentecostal a bisa: “Den [mi] buki mi ta bai conta boso dicon boso tin mester di mas placa y tambe con boso por logra haya mas placa . . . Si boso por cambia boso manera di pensa y haya un actitud corecto relaciona cu placa, mi ta kere cu boso lo cana den e bendicion y prosperidad di Dios y boso lo no tin problema cu placa nunca mas.”

Esei lo nifica cu hende pober no tin e fabor di Dios. Pero prosperidad material realmente ta un indicacion cu un hende tin e bendicion di Dios?

Bendiciona pa un Cierto Proposito

Bijbel ta menciona casonan den cua Dios a bendiciona sirbidonan fiel cu rikesa. Por ehempel, ora Yacob a bai for di su cas, el a bai cu su garoti so pero 20 aña despues el a regresa cu suficiente carne, baca y burico pa forma dos campamento. Segun Bijbel, Yacob su prosperidad tawata un regalo for di Dios. (Genesis 32:10) Wak un otro ehempel: Maske Job a perde tur su pocesionnan, Yehova a bendicion’e despues cu “diescuater mil carne, seis mil camel, mil yugo di buei y mil burico yewa.” (Job 42:12) Y den e caso di Rei Salomon, Yehova a dun’e asina tanto rikesa cu te awe ainda hende ta papia tocante esaki.—1 Reinan 3:13.

Di otro banda, Bijbel ta papia di varios adorado di Dios cu tawata fiel y obediente, pero toch pober. Definitivamente, Dios no tawata castiga algun hende cu pobresa mientras e tawata bendiciona otronan cu prosperidad. Pero, dicon Dios tawata duna hende rikesa den algun caso?

Cada caso tin un contesta diferente. Yacob su pocesionnan material a forma un base pa edifica un nacion, como preparacion pa e binida di e Simiña priminti. (Genesis 22:17, 18) Job su prosperidad a indica claramente ta ken a trece calamidad riba Job y di e manera ei Yehova su nomber a wordo santifica. (Santiago 5:11) Y Salomon a uza un gran cantidad di e rikesa cu Dios a yud’e haya, pa traha un tempel magnifico. (1 Reinan 7:47-51) Ta interesante pa mira cu Yehova a uza Salomon tambe pa skirbi di experencia tocante e balor limita di rikesa.—Eclesiastes 2:3-11; 5:10; 7:12.

E Manera Cu Dios Ta Bendiciona Nos

Hesus a siña su siguidonan pa nan tin un actitud sano relaciona cu placa ora el a bisa nan pa “no precupa” tocante cos material. El a rasona cu nan cu ni Salomon den tur su gloria no tawata bisti manera e lelinan di sabana. Ademas, Hesus a bisa: ‘Si Dios ta bisti e yerba di sabana, lo e no haci mucho mas pa boso, o hendenan di poco fe?’ Hesus a sigura su siguidonan cu si nan busca e Reino y Dios su husticia prome, e ora ei cuminda, paña y luga di biba lo wordo añadi na nan. (Mateo 6:25, 28-33) Con e promesa ei ta ser cumpli?

Ora cristiannan ta sigui e conseho di Bijbel, esei lo resulta principalmente den bendicionnan spiritual. (Proverbionan 10:22) Pero tambe e ta trece otro beneficionan. Por ehempel, e Palabra di Dios ta instrui cristiannan: “Laga esun cu ta horta, no horta mas; ma mas bien, lag’e traha.” (Efesionan 4:28) Tambe Bijbel ta bisa cu “esun cu traha cu man negligente ta bira pober, ma man di e balente ta haci rico.” (Proverbionan 10:4) Hopi bes doñonan di trabou ta prefera cristiannan honesto y trahado cu ta sigui e conseho biblico aki. Esaki por ta un bendicion.

Ademas Bijbel ta siña cristiannan pa no hunga wega di placa ya cu esaki ta pone hende bira haragan, no huma pasobra esaki ta contamina hende, no bebe di mas pasobra esaki ta haci un hende debil. (1 Corintionan 6:9, 10; 2 Corintionan 7:1; Efesionan 5:5, BPK) Esnan cu sigui e conseho aki lo ripara cu nan gastonan ta baha y nan salu ta mehora.

Mas Balioso cu Plata y Oro

Toch hende no por depende riba prosperidad material como e unico indicacion di Dios su aprobacion of bendicion. Por ehempel, Hesus a mustra cu e condicion spiritual di algun cristian na Laodicea no tawata bon ora el a bisa nan: “Bo ta bisa: ‘Mi ta rico, mi ta bon para y no tin mester di nada’, y bo no sa cu bo ta deplorabel y miserabel, pober, ciego y sunu.” (Revelacion 3:17) Di otro banda, na e cristiannan di Smirna cu tawata materialmente pober pero spiritualmente bon, Hesus a bisa: “Mi conoce bo tribulacion y bo pobresa—sinembargo, bo ta rico.” (Revelacion 2:9) E cristiannan aki probablemente a sufri perdida financiero na man di nan persiguidonan pa motibo di nan fieldad, pero nan tawatin rikesa mucho mas balioso cu plata y oro.—Proverbionan 22:1; Hebreonan 10:34.

Yehova Dios ta bendiciona e esfuerso di esnan cu ta haci nan best pa cumpli cu su boluntad. (Salmo 1:2, 3) E ta duna nan e forsa y sosten necesario pa trata cu problema, pa percura pa nan famia y pa busca su Reino prome. (Salmo 37:25; Mateo 6:31-33; Filipensenan 4:12, 13) Kiermen, en bes di mira cosnan material como Dios su bendicion principal, cristiannan berdadero ta haci esfuerso pa ta “rico den bon obra.” Door di cultiva un relacion intimo cu e Creador, cristiannan ta “montona pa nan mes e tesoro di un bon fundeshi pa futuro.”—1 Timoteo 6:17-19; Marco 12:42-44.