“E Hotel di Mil Streya”

DI UN ESCRITOR DI SPIERTA! NA FRANCIA

TIN hopi hende mescos cu mi cu boluntariamente lo cambia un anochi den un hotel di cuater streya pa un anochi den desierto, caminda cu admiracion nan por sinta contempla shelo yen di streya. Ta asina mi a sinti despues di mi biahe na e parti magnifico den suit di Tunisia, Nort Africa. Einan mi a disfruta di e comodidadnan di e asina yama hotel di mil streya: e tent di desierto di un wardado di bestia cu ta nomada.

Atrabes di henter historia humano, miyones di hende for di luganan cu ta masha leu for di otro—manera e sabananan di Asia, di Sahara y di Norte America—a biba den e tipo di “hotelnan di mil streya” ei. Aunke durante e ultimo siglo cantidad di tribu a haya nan forsa ta bandona nan tent, ainda tin miles di nomada ta biaha den desierto. Nan famoso hospitalidad ta haci un dia den nan compania un experencia inolvidabel.

“Cas di Cabei”

Pa nos por a bishita un campamento di nomada—un douar manera nan ta yam’e na Nort Africa—ami cu mi guia a core den desierto den un Land Rover bieu. Despues di puntra direccion serca algun wardado di bestia, nos porfin a mira leu aya e silueta di varios tent maron scur. Unabes nos a baha for di auto, nos a keda impresiona cu e silencio profundo cu ta reina den desierto. E Beduinonan ta bisa cu e silencio aki ta claria bo mente. Nos anfitrion a cuminda nos calorosamente, y a invita nos pa drenta den su tent. E tent ta 12 meter largo, 5 meter hancho y 2 meter halto. Nos a drenta den e seccion di e tent cu ta reserva pa hende homber y huespet, y nos a cai sinta riba tapijtnan bunita. E otro banda di e tent ta reserva pa e famia y pa cushinamento, anto ora tin bishita nan ta pone un cortina pa tap’e for di bista. Segun cu nos tawata papia, nos anfitriona a trece te tradicional di menta pa nos, mientras cu e yiu mohenan cu a keda den e parti di cushina di e tent, tawata mansa hariña pa traha algo manera arepa. Nan ta hasa e arepanan sabroso aki riba fogon den comchi hundo di klei.

Den transcurso di nos combersacion, mi a puntra e anfitrion con nan ta traha e dak y e bandanan di e tent. Gustosamente el a conta nos. Eigenlijk nan no ta uza un solo pida tela pa e tent, sino mas bien varios repi di aproximadamente 15 meter largo y 50 centimeter hancho, cu nan ta cose na otro. Algun tent mas grandi tin 12 of 13 repi di tela. Con nan ta traha e repinan di tela aki?

Durante atardi ora cu solo tawata halto ainda, mi a mira un di e yiu mohenan di mi anfitrion sinta den santo dilanti di e tent cu un careta pa hila den su man, y cu habilidad el a transforma cabei di bestia den un hilo diki. E hilo aki nan ta weef den repinan largo di tela riba e stacanan di weef cu ta poni abou horizontal riba tera. Door di weef e tela un tiki los nan lo haya bon ventilacion. Sinembargo, ora awasero yobe, e hilonan ta zet uit y ta haci e tela mas sera y e tela ta bira waterproof. No tin duda cu e nomber Arabir pa un tent bait esh-shaar, cu ta nifica “cas di cabei”, ta na su luga.

Mantencion di e Tent

Cuanto tempo un tent ta dura? E nomadanan ta cuida nan casnan di desierto bon. Mi anfitrion a conta mi cu e hende mohenan di su cas ta weef por lo menos un repi largo di tela pa aña. Por lo general, tur aña nan ta cambia e repi mas gasta pa un repi nobo. Pues un tent cu ta consisti di ocho repi ta keda completamente renoba cada ocho aña. Den algun luga nan ta los e repinan y bira nan di manera cu e banda parti paden cu ta mas miho conserva ta bai parti pafo.

Kico ta wanta e tent? Tin cuater staca traha di palo di apricot ta sostene e parti meimei di e tent, aunke tin biaha nan sa uza otro tipo di palo tambe. E dos stacanan central ta mas o menos 2,5 meter largo. Nan ta claba un banda di e staca den tera, mientras cu e otro banda di cada staca ta pas den un palo duro decora cu ta 45 pa 60 centimeter largo y cu nan ta uza como nok di e tent. E palo di nok ta un tiki curva, locual ta duna e tent e forma di un lomba di camel. Nan ta wanta e bandanan y parti patras di e tent cu varios staca mas chikito. Nos a bai pafo pa wak con nan tin e tent mara, anto nos a mira cu nan ta uza cabuya, traha di cabei di cabrito, pa hancra e tela di e tent na suela.

Tras di e tent tin un cura hancho traha di mata seco y e ta duna proteccion contra bestia salbahe. No mucho leu for di e tent e famia tin un burico mara na un pida palo. Un poco mas leu, den un cura rondo, tin un tou di carne cu cabrito, bon cuida pa e yiu mohenan di nos anfitrion.

Un Bida Simpel

Pa ora nos a caba di wak e tent e arepanan tawata cla, y nan a baha bon ora bo dop nan den un azeta di oleifi cu un sabor manera di fruta. Ora mi tawata wak rond, mi a keda impresiona pa e bida simpel di e nomadanan. Como mueble, nan tin solamente un bahul di palo y algun saco, tapijt y clechi cu nan a weef. Orguyosamente e yiu mohenan di mi anfitrion a mustra mi e ekipo simpel cu nan ta uza pa peña y limpia lana y tambe pa hila lana. Pero fuera di esei, nan tin masha tiki pocesion material. Esaki a pone mi corda riba e dicho sabi di David, e poeta wardado di carne kende a biba pa un tempo den tent: “[Hende] ta montona rikesanan y no sa ken lo recohe nan.”—Salmo 39:6.

Hopi nomada—probablemente inspira door di nan ambiente—ta poeta, y nan gusta participa den competencianan di poesia. Tambe nan gusta cuenta y dicho. Ami, di mi parti, a cita algun dicho for di e Santo Scritura cu ta yen di e sabiduria perfecto di Esun cu “ta extende e shelonan manera un cortina, y ta span nan manera un tent pa biba aden.”—Isaias 40:22.

Anto a yega ora pa mi bai laga mi anfitrionnan. Mi a gradici nan masha tanto pa nan hospitalidad y tawata puntra mi mes ki dia lo mi bolbe tin un chens pa keda den un di e “hotelnan di mil streya” aki sumamente encantador.

[Plachi na pagina 16]

Arepa hasando riba confo

[Reconocemento pa Potret na pagina 16]

Musée du Sahara à Douz, avec l’aimable autorisation de l’Agence de mise en valeur du patrimoine et de promotion culturelle de Tunisie; camel: ZEFA/ROBERTSTOCK.COM