E Punto di Bista Biblico

Bo Personalidad Ta Ser Determina pa Bo Grupo di Sanger?

DEN algun pais ta masha comun pa determina personalidad di un persona a base di su grupo of tipo di sanger. Na Japon por ehempel, no ta nada straño pa un persona cuminsa un combersacion door di puntra: “Ki tipo di sanger bo tin?” Esnan cu ta kere den e concepto aki ta bisa cu hende cu tin e tipo di sanger A ta hende trankil, responsabel y desconfia; esnan cu tin sanger B ta hende sinsero y generoso, cu beis, facil pa gaña; y asina nos por sigui. Tambe nan ta bisa cu si un persona tin un cierto tipo di sanger kisas ta dificil—of facil—pa e bai bon cu un persona cu tin un otro tipo di sanger.

A base di e concepto aki, algun hende ta considera tipo di sanger como un factor importante ora di forma grupo di studiante na scol, selecta ehecutivonan den compania of asta ora di scohe hende pa casa cu ne. Tin cualkier prueba cu nos tipo of grupo di sanger ta determina nos personalidad? Tin cualkier siñansa biblico relaciona cu e asunto aki?

Kico Ta Tipo di Sanger?

The World Book Multimedia Encyclopedia ta splica: “E membrananan di cel cora di sanger ta contene proteina cu yama antigene. Hende a identifica mas cu 300 antigene di cel cora.” Tin cierto antigene cu algun hende tin, pero cu otronan si no tin, y tin algun antigene cu no por existi hunto. Pesei e enciclopedia ta sigui bisa: “Basa riba presencia of ausencia di cierto antigene en particular, cientificonan a clasifica hende su sanger den varios grupo.”

E sistema di tipo di sanger cu generalmente hende ta acepta ta e sistema ABO, cu ta clasifica hende su sanger den cuater tipo: A, B, AB y O. Ademas, tin tambe e sistema Rh [rhesus factor] cu generalmente hende sa uza. En realidad, tin rond di 20 sistema conoci di agrupa sanger. Ta obvio anto cu sanger ta masha complica. E Encyclopædia Britannica ta declara: “E gran variedad di antigene di cel cora cu ta existi, ta haci e chens pa hende—fuera di dos persona morocho identico—tin e mesun coleccion di substancia cu tin den un grupo di sanger, masha chikito.”

Bon bisa, esaki ta indica cu cada persona tin un ‘grupo of tipo di sanger’ unico. Pues e argumento di cu hende cu tin e mesun tipo di sanger tin e mesun caracteristicanan di personalidad, no tin base. Evidentemente, tin varios factor cu ta determina nos personalidad.

Kico Ta Determina Nos Personalidad?

E Encyclopædia Britannica ta splica cu un persona su “personalidad ta e caracteristicanan di conducta di cada persona—cu el a nace cu ne of a cultiva—cu ta distinguie for di otro persona.” Si, ademas di e cosnan cu nos a hereda, tin otro factornan—manera ambiente familiar, educacion, bon y mal experencia—cu tin influencia riba desaroyo di nos personalidad. Pesei anto, nos composicion genetico no ta e unico factor cu ta determina nos personalidad. Hopi bes bo por haya cu asta morochonan identico, cu tin e mesun composicion genetico, por tin personalidad distinto.

Un otro factor importante ta cu un persona su personalidad por cambia of ser cambia. Apostel Pablo a enfatisa e poder cu siñansanan cristian tin pa cambia hende. El a skirbi: “Pone un banda e hende [“personalidad”, NW] bieu cu su practicanan malbado, y bisti e hende [“personalidad”, NW] nobo cu ta wordo renoba den un conocemento berdadero segun e imagen di Esun cu a cre’e.” (Colosensenan 3:9, 10) Cristiannan ta reconoce cu nan ta pecado y cu nan a hereda tendencianan pecaminoso. Pa Dios acepta nan, nan tin cu cambia nan personalidad.

Kico ta haci e cambionan ei posibel? Esei ta e poder di e palabra of mensahe di Dios. Relaciona cu e influencia poderoso di e palabra di Dios, cu awor ta den Bijbel, Pablo a skirbi: “E palabra di Dios ta bibo y activo y mas skerpi cu cualkier spada di dos filo, y ta penetra te na e division di alma y spirito, y di scarnir y tuti, y ta capas pa husga e pensamentonan y intencionnan di curason.” (Hebreonan 4:12) Ora un persona somete su mes na e influencia di e spirito di Dios y ta purba di biba na harmonia cu e normanan moral cu Bijbel ta describi, gradualmente su personalidad por cambia. E personalidad cristian cu ta na harmonia cu normanan di Bijbel ta encera entre otro, un “curason di compasion, cariño, humildad, mansedumbre y pasenshi.”—Colosensenan 3:12.

Cristiannan Mester Ta Rasonabel

Nos tin cu admiti si cu no tin ningun principio di Bijbel cu ta prohibi hende di analisa grupo di sanger. Pero cu esaki por tin cualkier relacion cu e manera cu hende ta comporta nan mes ta un otro asunto. Manera ta e caso cu tur cos den bida, nos tin cu laga e Palabra di Dios guia nos pasonan. (Salmo 119:105) Ta masha importante pa nos ta rasonabel.—Filipensenan 4:5.

Siguramente, lo ta masha irasonabel pa un persona uza su grupo of tipo di sanger como un excuse pa e no haci esfuerso pa corigi fayonan den su personalidad. Sin importa nan composicion genetico, cristiannan tin cu sigui progresa den moldea nan personalidad pa nan refleha e cualidadnan di Yehova y Hesus mas tanto posibel.—Efesionan 5:1.

Ademas, cristiannan ta haci esfuerso pa mira otro hende manera Yehova ta mira nan. “Dios no ta haci distincion di persona.” (Echonan 10:34, 35) Cu goso Yehova ta acepta tur clase di hende. Pues lo ta un proceder irasonabel y no cristian pa hui of evita compania di cierto personanan djis pa motibo di nan tipo of grupo di sanger. Esei lo ta e caso tambe si un persona ta asocia exclusivamente cu hende cu tin un tipo di sanger cu ta “compatibel” cu esun di dje. Bijbel ta spierta: “Si boso haci distincion di persona, boso ta comete pica.”—Santiago 2:9.

Segun cu ciencia y tecnologia ta avansa, nan ta descubri hopi teoria y cos nobo tocante e curpa di hende. Ta natural cu e conceptonan aki ta fasina hende. Sinembargo, cristiannan ta haci bon di laga Bijbel—y no teoria di hende—guia nan manera di pensa. Den tur aspecto y situacion di bida, cristiannan mester “samina tur cos” y “tene duro na loke ta bon.”—1 Tesalonicensenan 5:21.