E Fasinacion cu Vuurwerk

SEA ta apertura di un exposicion of ta Weganan Olimpico, vuurwerk a bira sinonimo cu celebracion. Explocion di lus ta conmemora Dia di Independencia na Merca, cu ne ta celebra Dia di Bastille na Francia, y e ta ilumina shelo den casi tur stad grandi na mundo tur bispo di Aña Nobo.

Pero for di ki tempo hende su fasinacion cu vuurwerk a cuminsa? Y ki ingeniosidad ta envolvi den crea e espectaculonan impresionante aki?

Un Tradicion Oriental

Mayoria historiado ta di acuerdo cu ta Chinesnan a inventa vuurwerk rond di siglo 10 di nos era, tempo cu kimiconan Oriental a descubri cu ora combina salpeter (kaliumnitraat) cu sulfur y carbon, esei ta produci un substancia explosivo. Exploradonan Occidental—manera Marco Polo—of podise comerciantenan Arabir tawata esnan cu a trece e substancia explosivo aki na Europa, y pa siglo 14, shownan espectacular di vuurwerk tawata deleita e publico Europeo.

Pero e puiro cu a percura asina un bunita dibirticion tambe a cambia e rumbo di historia Europeo. Militarnan a uza e substancia ei, cu despues a bira conoci como polvo, pa tira bala di chumbo, pa bula muraya di kasteel y pa destrosa podernan politico. Encyclopædia Britannica ta declara: “Durante e Edad Medio di Europa, uzo di vuurwerk a compaña e uzo di explosivonan militar segun cu esaki a plama bai den direccion west for di Oriente, y na Europa nan tawata exigi di e experto militar di explosivo pa duna show di vuurwerk pa celebra victoria y pas.”

Mientrastanto, a parce cu e Chinesnan casi no tawata worry cu e posibilidad di uza polvo como arma. Den siglo 16, Matteo Ricci, un Italiano misionero hesuita na China, a skirbi: “E Chinesnan no ta experto den uza scopet ni artiyeria y nan ta haci masha tiki uzo di esakinan den guera. Sinembargo, nan ta uza cantidad di salpeter pa traha vuurwerk pa duna show durante weganan publico y riba dianan di fiesta. Chinesnan ta gosa sin fin di e shownan ei . . . Nan habilidad pa traha vuurwerk ta realmente extraordinario.”

Secreto di e Espectaculo

E prome trahadonan di vuurwerk sin duda lo tawatin mester di tanto habilidad como curashi segun cu nan a desaroya diferente show. Nan a descubri cu pipitanan grandi di polvo ta kima relativamente pocopoco, mientras cu pipitanan fini ta kima cu un explosion. Nan a crea vuurpijl door di sera un banda di un pida bambu of tubo di papel y yena e parti mas abou cu pipitanan grandi di polvo. Ora cu sende e polvo, gasnan cu ta expande rapidamente ta pusha sali for di punta di e tubo cu ta habri, y esei ta manda e proyectil bai laira. (Esaki ta e principio basico cu hende ta uza awe pa manda astronaut den espacio.) Nan tawata yena e parti ariba di e vuurpijl cu polvo fini ya asina e proyectil lo a explota—si tur cos a bai bon—ora cu e tawata serca di yega na e punto maximo di su trayecto.

Tecnicamente vuurwerk no a cambia hopi atrabes di siglonan. Sinembargo, tawatin algun mehoransa si. E Orientalnan originalmente tawata sa con pa produci solamente vuurwerk blanco of colo di oro. Ta Italianonan a agrega colo na vuurwerk. Na principio di siglo 19, e Italianonan a descubri cu ora nan agrega clorato di potasio (kaliumchloraat) na polvo, e mescla ta bira asina cayente cu e por comberti metal den gas, y door di esei ta duna colo na e vlam. Awendia, nan ta agrega e elemento carbonato di estroncio (strontiumcarbonaat) pa produci vlam cora. Vlam blanco briyante ta ser produci door di titanio, aluminio y magnesia; vlam blou door di un mescla di coper; vlam berde door di agrega nitratonan di bario (bariumnitraat); y vlam geel door di un mescla cu ta contene oxalato di sodio (natriumoxalaat).

Computer a agrega un otro dimension na shownan di vuurwerk. En bes di sende vuurwerk na man, tecniconan por time nan show perfectamente door di programa computer pa sende vuurwerk electronicamente pa asina nan explota riba ritmo di un presentacion musical.

Un Conexion Religioso

Manera e misionero hesuita Ricci a menciona, vuurwerk tawata un parti integral di celebracion religioso di e Chinesnan. E revista Popular Mechanics ta splica cu ‘Chinesnan a inventa vuurwerk pa core cu demoño for di Aña Nobo y otro ocasionnan ceremonial.’ Den su buki Days and Customs of All Faiths (Dianan Festivo y Custumbernan di Tur Religion), Howard V. Harper a declara: “For di principio di tempo pagano, hende tawata cana cu flambeu y sende candela grandi na ocasionnan religioso importante. Lo mas natural tawata pa agrega e lusnan di colo espectacular di vuurwerk—cu a parce di ta move nan so—na e festividadnan ei.”

Poco despues cu hende cristian pa nomber a cuminsa uza vuurwerk, e trahadonan di vuurwerk a haya un santo como nan patrona. The Columbia Encyclopedia ta bisa: ‘Supuestamente tata di Santa Barbara a ser’e den un toren y despues a laga mat’e pasobra e tawata un cristian. Lamper a dal e tata mata, y debi na e manera ardiente cu su tata a muri, Santa Barbara a bira patrona di trahado- y uzadonan di arma di candela y vuurwerk.’

Hende No Ta Worry Cuanto e Costa

Sea ta pa celebracionnan religioso of no, ta parce cu e publico tin un deseo insasiabel pa shownan di vuurwerk mas grandi y mas miho. Den un descripcion cu Ricci a duna di un show di vuurwerk na China den siglo 16, el a skirbi: “Tempo mi tawata na Nankin mi a mira un show di vuurwerk pa celebra e prome luna di aña, cu ta nan fiesta mas importante. Na e ocasion aki mi a calcula cu e cantidad di polvo cu nan a uza tawata suficiente pa bringa un guera basta grandi pa varios aña.” Relaciona cu e gasto di e show aki, el a bisa: “Ta parce cu ora ta trata di vuurwerk, nan no ta worry cuanto e costa.”

E situacion casi no a cambia durante tur e siglonan cu a pasa. Na aña 2000, den un solo celebracion cu nan a tene riba e Brug di Haf di Sydney, nan a sende 20 ton di vuurwerk pa entretene un publico di un miyon of mas hende cu a reuni na canto di e haf. Durante e mesun aña ei, na Merca, nan a gasta 625 miyon dollar na casi 70 miyon kilo di vuurwerk. Un cos ta sigur, hopi cultura ta sigui ta fasina cu vuurwerk, y ainda bo por bisa: “Ta parce cu ora ta trata di vuurwerk, nan no ta worry cuanto e costa.”