For di Nos Lectornan

Pornografia Danki pa e serie “Pornografia—Inofensivo of Perhudicial?” (8 di augustus 2003) Mi tawatin mester di e conseho franco aki. Prome cu mi a bira un cristian, pa hopi tempo mi a wak pornografia. E articulonan a yuda mi mira mas cla cu nunca con perhudicial e ta y ki pasonan decisivo bo tin cu tuma pa bo libra bo mes di e adiccion aki.

E. P., Merca

Dos aña pasa mi matrimonio felis di 22 aña a caba na diborcio. Pornografia literalmente a ranca un esposo maraviyoso y tata amoroso for di nos. E adiccion teribel aki a pone un persona cu tawata bondadoso y amabel bira crepchi, mentiroso y bestial. Mi tawata sinti cu ta mi so ta victima di pornografia, pero awor mi ta realisa cu e ta un crisis cu ta afecta hopi hende. Danki pa boso articulonan informativo.

L. T., Merca

Prome cu mi a studia Bijbel, mi tawata adicto na pornografia pa mas cu 10 aña. Apesar di kico cu esnan cu ta boga p’e ta pretende, no tin nada nada positivo den dje. Prome cu mi a bira un Testigo di Yehova, mi tawata adicto na casi tur droga principal. Di tur mi adiccionnan, pornografia tawata esun di mas dificil pa vence. Sea asina bon di sigui publica e tipo di articulonan aki.

J. A., Merca

Hobennan Sa Puntra Mi ta gradici boso di henter mi curason pa e articulo “Hobennan Sa Puntra . . . Dicon Mi Ta Sinti Cu Mi Mester Ta Perfecto?” (8 di augustus 2003) Mi ta un predicado di tempo completo di 25 aña di edad. For di tempo mi tawata chikito, mi tawata compara mi mes cu mi ruman mohe cu ta cuater aña mas grandi cu mi, y cu mi ruman homber cu ta tres aña mas grandi cu mi. Mi a lucha cu un compleho di inferioridad, pensando cu mi no ta bal nada. Pa combati e sintimentonan aki, mi a purba di ta perfecto. E articulo aki a describi exactamente con mi ta sinti. Mi kier cambia mi manera di pensa.

M. Y., Japon

Mi tin 16 aña, y docternan a caba di diagnostica cu mi ta sufri di depresion. Semper mi a purba di haci cosnan a la perfeccion, y hopi bes mi ta condena mi mes como un hoben fracasa. E articulo aki a yega net na ora. Ora mi tawata les’e, mi no por a stop di yora. Nunca mi a realisa cu hopi otro hende ta lucha cu e mesun sintimentonan. Danki pa e serie “Hobennan Sa Puntra.” Mi ta ansioso pa haya e siguiente articulo.

L. S., Merca

Uzo di Droga Masha danki pa e serie “Kico Bo Por Haci si Bo Famia Ta Uza Droga?” (8 di april 2003) Mi ta studiando Bijbel cu Testigonan di Yehova pa algun tempo caba, pero debi na e problema aki mi no por a progresa spiritualmente. Ora mi a lesa e cuadro “Yudansa pa Uzadonan di Droga Cu Ta Recuperando”, mi a realisa cu si mi kier logra den mi esfuersonan pa recupera, mi tin cu lesa Bijbel tur dia y aplica su principionan. Tambe, e echo cu mi sa cu Dios tin interes den mi a conmove mi.

R.S.A., Brazil

Edicionnan Mas Bieu Resientemente docternan a constata cu mi yiu mohe adulto tin e malesa di Parkinson. Mi a haya un articulo cu ta trata e malesa aki den e Spierta! [na Spaño] di 8 di januari 1988. Henter nos famia a lesa e articulo varios biaha hunto cu mi yiu mohe. Door di esei, nos a logra enfrenta nos situacion na un manera calmo. Aunke e articulo aki a ser skirbi mas cu 15 aña pasa, nos a beneficia hopi for di dje. De bes en cuando, Spierta! a splica tocante malesanan cu nunca nos no a tende di dje, y e articulonan aki mester ta un tremendo animacion pa esnan cu ta sufri di e malesanan ei. Mi ta gradici boso di curason pa e trabou cu boso ta haci.

E. M., Japon