Observando Mundo

Un Toro den un Tienda di Porselana

Na Ingles tin un dicho cu ta bisa di hende torpe cu nan ta manera un toro den un tienda di porselana. Bo a yega di puntra bo mes kico lo pasa si di berdad un toro drenta un luga di bende articulo di porselana? Wel, BBC News ta informa cu esei ta net loke a tuma luga. Un toro a hui for di un findishi di animal na Lancashire, Inglatera, y a core drenta un tienda di cosnan antiek. Un corant cu a duna informe di e incidente a bisa: “E tienda ta specialisa den porselana antiek y, manera bo por verwacht, e toro a trapa y kibra varios obra caro.” Despues cu autoridadnan a consulta cu doño di e toro y a considera e riesgonan envolvi pa purba captura e animal, nan a dicidi cu ta miho mata e toro. Pues polis a sera e area y a likida e toro cu ainda tawata den e tienda.

Campion Mundial den Cortamento di Lamper

E corant O Globo ta informa cu investigadonan cu ta analisa datonan di satellite a descubri cu “Brazil ta e pais caminda lamper ta corta mas tanto. Cada seconde ta tuma luga [na Brazil] entre dos pa tres descarga electrico, pa un total di 70 miyon pa aña.” Loke ta causa nan ta e enorme selvanan di yobida combina cu un clima cayente. Esakinan ta crea e ambiente perfecto pa e tantisimo tormentanan electrico. Ademas di exigi bida di rond di 100 Brasileño pa aña, lamper ta causa daño na balor di 200 miyon dollar na waya di telefon y coriente y tambe na fabricanan y otro edificionan. Y segun e cientifico Osmar Pinto Jr. di e Instituto Nacional pa Investigacion di Espacio, contrario na un creencia popular, “lamper por dal tres, cinco of te asta dies biaha na e mesun luga.”

Spionahe via Telefon Cellular

E corant Frankfurter Allgemeine Zeitung ta informa cu telefon cellular cu camara build-in ta formando un peliger pa asuntonan confidencial den comercio. Aunke un tempo nan a pensa cu camara build-in ta djis un aparato mas pa promove benta, e potretnan digital cu e generacion nobo aki di telefon cellular ta saca ta di hopi mas miho calidad y agentenan di siguridad di hopi compania ta mir’e como un problema creciente. Fuera di cu e telefon-camara aki no ta riparabel, distinto di camaranan convencional e por transmiti potret instantaneamente, locual ta hacie un herment perfecto pa spionahe industrial. Asta ora e intruso ser intercepta, ya e daño ta haci caba. Pa e motibonan aki, un cantidad di compania ya caba a prohibi uzo di telefon cellular cu camara build-in den areanan confidencial proteha pa sistemanan di siguridad, manera departamentonan di diseño y luganan caminda ta test productonan nobo.

Resultado Tragico di Accidente di Trafico

“Cada aña accidente di trafico ta mata miles di hende mas tanto cu crimen violento”, segun e corant Spaño El País. Na Europa, accidente di trafico ta causa 55.000 morto y 3,5 miyon herido pa aña. Na Spaña, 35 porshento di e mortonan ta di hende entre 15 pa 29 aña. Esei ta haci accidente di trafico e causa principal di morto pa e grupo aki. Jeanne Picard Mahaut, bosero pa La Ligue, un organisacion no gubernamental dedica na mehora siguridad riba caminda, ta bisa cu “esaki ta e problema di mas serio pa salubridad publico.” E ta agrega: “Si bo no ta kere mi, puntra e docternan cu ta atende casonan di emergencia tur fin di siman.” Como medida pa mehora siguridad, La Ligue y dos otro grupo Europeo ta haya cu fabricantenan di auto mester instala aparatonan cu ta limita velosidad y un ‘black box’ cu ta revela e posibel causa di un accidente.

Mal Aña pa Gletsjernan Alpino

E zomer sumamente cayente di 2003 tawata, “te asina leu cu hende por corda, e piyo temporada” pa e gletsjernan alpino, segun e corant Italiano Corriere della Sera. Segun cu zomernan a bira mas cayente y temperaturanan promedio a subi, e sneu y ijs cu tin acumula riba e seronan den nort di Italia a bin ta smelt “mas lihe cu nunca.” Entre e sorpresanan cu resientemente a surgi for di e ijs cu ta smelt, tawatin un cañon di 3.300 kilo traha na Austria. Nan a hay’e na un haltura di 3.178 meter riba nivel di lama. A uza e arma aki pa ataca posicionnan Italiano durante prome guera mundial. E articulo ta sigui bisa: “E tipo di hayasgonan aki a bira mas y mas frecuente durante e ultimo 20 añanan. E zomernan mas cayente ta pone nos gletsjernan smelt manera ora laga vriezer porta habri.”

E Problema di Suicidio di Sur Corea

The Korea Times ta informa cu desde 1999 suicidionan na Sur Corea ta aumentando barbaramente tur aña. E corant ta bisa cu “den lunanan resien casi tur dia tawatin casonan tristo di hende cu a kita nan bida, principalmente pa motibo di dificultadnan economico, manera debe di tarheta di credito, pero tambe pa motibo di desesperacion. Di acuerdo cu estadisticanan di e Agencia Nacional di Polis, un total di 13.055 persona a comete suicidio [na 2002], un aumento di 6,3 porshento compara cu 12.277 e aña anterior. Esaki ta nifica 36 suicidio pa dia y 1,5 pa ora.” Pero tin algo mas alarmante ainda. Times ta bisa: “Mayornan desespera ta dicidi di mata nan yiunan y despues nan mes ta mata curpa.” Un ehempel di esei ta di un señora di 37 aña di edad cu a comete suicidio despues cu el a haya sa cu su esposo a perde e ekivalente di 140.000 dollar riba mercado di balor. Nan a haya tur su dos yiunan—un yiu homber di 14 aña y un yiu mohe di 12 aña—tambe morto. E articulo ta conclui bisando: “Psicologonan ta bisa cu mas y mas hende ta bou di presion pa comete suicidio ya cu comunidad no ta dunando nan ningun speransa pa vence nan dificultadnan.”

Biaheronan Vulnerable pa Malesa

The Medical Post di Canada ta bisa cu “rond mundo, mas cu un den cada nuebe biahero ta haya nan cu problemanan respiratorio.” Un estudio cu GeoSentinel a haci a pone nan yega na e conclusion aki. GeoSentinel ta un asociacion di e Sosiedad Internacional di Remedi pa Biahe y e Centronan Mericano pa Control y Prevencion di Enfermedad. Via un red di comunicacion y coleccion di dato di 25 clinica rond mundo specialisa den remedi pa ora di biaha, nan ta reuni informacion tocante salu. Entre januari 1997 y december 2002, tawatin 18.817 biahero cu a bishita e clinicanan aki, y serca 2.173 biahero a constata cu nan tawatin problemanan respiratorio cu a varia for di dolor di garganta y horea y sinusitis te na pulmonia, bronkitis y infeccion di micobacteria. Biaheronan cu ta bishita paisnan caminda e riesgo ta halto ta ser conseha pa haci sigur cu ainda nan vacunanan ta valido y pa pensa riba e posibilidad di pasa hangua contra grip; no ta importa cua temporada di aña. Segun dr. Isabelle Nuttall, un specialista di malesa contagioso na e Organisacion Mundial di Salu, bon higiena ta e prome proteccion contra un enfermedad causa pa bacteria of virus. El a declara: “Si tin un mensahe cu nos no ta cansa di duna, anto esei ta pa ‘laba man.’”