Telefon Cellular—Amigo of Enemigo?

DI UN ESCRITOR DI SPIERTA! NA AUSTRALIA

ALGUN aña pasa, nan tawata yama telefon cellular “portable” of “mobil”, pero esei no tawata un descripcion corecto. Telefon tawata “portable” (portatil of movibel) solamente si bo tawatin hopi forsa of si bo a instala un den bo auto, ya cu nan baterianan tawata sumamente pisa. E telefonnan ei tawata mas grandi cu caha di sapato, y nan a costa miles di dollar.

Awe tin alrededor di 1,35 mil miyon telefon cellular. Den algun pais mas cu mitar di e poblacion tin cellular. Mayoria di nan ta pas den bo planta di man, y tin biaha bo por haya nan asta gratis.a E revista Australiano The Bulletin ta informa: “Tin casi mes tanto di e aparatonan aki den uzo [cu e cantidad combina di] aparato di television y di computer personal.” Den mas cu 20 pais, tin awor mas telefon cellular cu tin liñanan di telefon fiho. Un experto di e industria ta describi telefon cellular como no simplemente un maraviya di tecnologia sino tambe “un fenomeno social.”

Ki efecto telefonnan cellular tin riba sosiedad? Nan ta amigo of enemigo, es decir, nan ta beneficioso of perhudicial?

Un Gran Beneficio pa Negoshi

E aumento drastico den benta di telefon cellular ta un gran beneficio pa hopi negoshi. Un compania grandi a declara: “E mercado di telefon cellular ta e categoria mas grandi di productonan electronico pa consumido.” Cu otro palabra, aworaki hende ta gasta mas placa na telefon cellular cu na cualkier otro aparato electronico den pasado.

Por ehempel, na Australia mas cu 15 miyon di e 20 miyon habitantenan tin un telefon cellular. E clientenan di solamente un di e tantisimo companianan di telefon cu tin den e pais ei a haci 7,5 mil miyon yamada di telefon cellular den un aña resien. Mundialmente, telefonnan cellular ta genera miles di miyones di florin pa aña pa companianan di telecomunicacion. Ta facil pa compronde dicon negoshinan grandi ta mira telefon cellular como un amigo.

Creando un Idioma Nobo

Hopi di e miyones di mensahenan cu ta ser intercambia entre e aparatonan sofistica aki no ta den forma di abla, sino den forma di palabra skirbi. En bes di papia na telefon, un creciente cantidad di uzado di telefon cellular—specialmente hobennan—ta uza e servicio cu yama Short Message Service (Servicio di Mensahe Cortico; SMS). E servicio aki ta permiti nan (pa un suma relativamente chikito) type y manda mensahenan breve pa otro. Como cu pa comunica den e manera aki bo mester type un mensahe riba e teclanan chikitico di e telefon, fanaticonan di SMS ta uza un forma abrevia di idioma cu ta combina letter cu number pa crea zonido di palabra.b Apesar di e inconvenencia di formula y type un mensahe, na contraste cu papia cu e recipiente, hende ta intercambia tur luna rond di 30 mil miyon mensahe mundialmente.

Over di kico tur e mensahenan aki ta bai? Un estudio Britanico a descubri cu 42 porshento di hobennan entre 18 pa 24 aña ta uza SMS pa flirt, 20 porshento ta uza e forma chic aki di comunicacion pa pidi un persona di e sexo opuesto pa bai sali cu nan, y 13 porshento a yega di uza SMS pa pone fin na un relacion.

Algun analista di tendencianan social ta precupa cu e manera mancaron di uza ortografia y di formula frase den mensahenan di SMS ta perhudicando e habilidad di lesa y skirbi di hobennan. Tin otro personanan cu no ta di acuerdo cu esei, y nan ta bisa cu e fenomeno di SMS ta “creando interes pa skirbi den un generacion nobo.” Un bosero di un empresa cu ta produci un diccionario Australiano a bisa e corant Sun-Herald: “No ta hopi biaha nos ta haya e oportunidad pa desaroya henter un estilo nobo [di idioma] . . . e combinacion di manda mensahe skirbi [SMS] y Internet ta nifica cu hobennan ta skirbiendo hopi mas tanto. [Nan] mester por ta expresa nan mes suficiente facil y cla pa por siña e estilo y domina e palabranan popular y e simbolonan . . . di e manera di skirbi en particular aki.”

Algun Desaroyo Desfaborabel

Mientras cu telefon cellular ta un herment util pa socialisa y pa haci negoshi, pa hopi empleado e aparatonan aki lo por parce tin biaha mas manera un cadena cu un amigo; nan ta sinti nan mara na nan oficina. Un sondeo a revela cu 80 porshento di empleado den ramo di propaganda y 60 porshento di trahado den construccion ta sinti nan presiona pa ta disponibel tur momento, sea pa nan dunado di trabou of pa cliente. E presion cu hende ta sinti pa contesta un yamada di telefon cellular sin importa unda nan ta of kico nan ta haciendo, ta creando loke un investigado ta yama un “cultura di interupcion.” Consecuentemente, ingenieronan a desaroya un tipo di material di construccion pa uza den restaurant y teater cu por blokia e señalnan di telefon cellular.—Wak e cuadro “Algun Sugerencia pa Uzo di Cellular.”

Mas cu djis crea interferencia iritante, e aparatonan aki cu ta tur caminda, tin e potencial di bira un enemigo publico. Un estudio Canades a descubri cu uzamento di cellular mientras cu bo ta core auto ta mesun peligroso cu core auto bou di influencia di alcohol. Profesor Mark Stevenson, di e Centro di Investigacion di Lesion na Universidad di Western Australia, ta splica cu ta hopi mas dificil pa tene un combersacion na telefon cu djis tene un combersacion cu un persona den auto. Apesar di e peligernan y e echo cu na algun luga polis por boet chauffeurnan cu tin telefon den man, un sondeo resien a revela cu 1 di cada 5 chauffeur Australiano ta manda mensahe di SMS y un tercera parti ta bel of ricibi yamada cu nan cellular den man mientras cu nan ta na wiel.

E peliger di uzo inapropiado di cellular ta existi tambe durante biahe cu avion. Aunke e sistema electrico den avionnan mas nobo ta ser proteha contra di señalnan di cellular, ainda tin avion den servicio cu segun informe ta vulnerable pa interferencia. New Scientist ta informa: “Den testnan abordo di dos avion, Autoridad Civil di Aviacion di Gran Bretania [CAA] a confirma cu radiacion di telefon cellular ta interferi cu ekipo electronico cu ta crucial pa un avion bula safe.” Identificando un menasa importante cu telefonnan ta forma, un bosero di CAA a bisa: “Mas leu un telefon cellular ta for di un mast di telefon, mas potencia e ta saca. Pues segun cu e avion ta subi despues cu e lanta, e señal di e cellular ta bira mas potente, y asina e ta aumenta e nivel di interferencia na un momento critico di un buelo.” Un estudio Australiano a revela cu aparatonan electronico personal, entre nan telefon cellular, a causa varios incidente caminda avionnan comercial a haya problema durante buelo debi cu pasaheronan a ignora e advertencia pa paga e aparatonan ei tanten cu nan ta na bordo.

Telefon Cellular y Cancer

Un controversia cu ainda ta reina ta si e frecuencianan di radio cu telefon cellular y e mastnan di telefon ta saca, por causa cancer den hende. Debi cu ta cientos di miyones di hende ta uza e aparatonan aki, asta si ta solamente un porsentahe chikito lo mester desaroya problema di salu, esei lo nifica un peliger grandi pa salubridad. Pesei decenas di estudio cientifico profundo a investiga e efecto di radiacion di telefon cellular riba tehido bibo. Na ki conclusion nan a yega?

E Grupo di Experto Independiente Relaciona cu Telefon Cellular (IEGMP) a publica un informe cu ta bisa: “E Grupo di Experto ta kere cu a base di e evidencia actualmente disponibel, no tin motibo pa e poblacion general precupa pa e uzo di telefon cellular.” New Scientist tambe a informa: “Apesar di e historianan pa spanta hende den e ultimo añanan, mayoria di evidencia te cu awor ta parce di indica cu ser exponi na e frecuencia di radio di telefon cellular no tin mal efecto riba salu. Estudionan cu a demostra cu tawatin un efecto, a resulta dificil pa reproduci.”

Pero como cu e duda ta keda tocante e efectonan di telefon cellular riba salu, companianan ta sigui hinca miyones di florin den mas investigacion. Tanten cu no haya un contesta definitivo, IEGMP ta recomenda lo siguiente: “Uza telefon [cellular] pa un periodo mas cortico posibel. Uza telefon cu tin nivelnan abou di indice di absorbacion spesifico di energia (SAR). Uza esnan cu tin speaker of earphone y otro aparatonan basta cu a keda proba cu nan ta reduci SAR.”c E Grupo di Experto ta recomenda tambe cu “mester descurasha mucha bou di diesseis aña di uza telefon cellular”, ya cu e sistema nervioso di mucha cu ta desaroyando lo haci nan “mas vulnerable pa peliger di salu cu ainda no a ser identifica.”

Aunke ataca pa controversia, telefon cellular ta haciendo un impacto profundo tanto riba tereno economico como social. Mescos cu su primonan electronico—television y computer personal—telefon cellular tin e potencial pa ta sea un esclabo util of un doño exigente. E poder pa determina si e ta bira un amigo of enemigo, literalmente ta den man di e uzado.

[Nota]

[Cuadro/Plachi na pagina 19]

ALGUN SUGERENCIA PA UZO DI CELLULAR

1. Baha bo stem si bo ta uzando bo telefon den un luga publico. E microfon di e telefon ta hopi sensitivo, y probablemente hende rondo di bo no ta interesa den bo combersacion priva.

2. Paga e telefon of pon’e na silent of na e funcion di vibra ora bo ta na reunionnan religioso, di negoshi of den cine of na otro evenemento publico of den un restaurant.

3. No uza un telefon di tene den man ora bo ta na wiel.

[Plachi na pagina 18]

Mundialmente, hende ta manda rond di 30 mil miyon mensahe skirbi tur luna

[Plachi na pagina 20]

Uza un cellular na wiel por ta mesun peligroso cu core auto bou di influencia di alcohol