“Adicto” na Telefon Cellular

DI E CORESPONSAL DI SPIERTA! NA HAPON

“HOBENNAN Ta Casi Adicto na Telefon Cellular”, segun un titular di e corant The Daily Yomiuri di Hapon. Adicto? E corant a splica: “Ta parce cu hobennan ta considera nan telefon cellular como un parti di nan curpa y asta nan por drenta un panico si nan no tin nan telefon hunto cu nan.” Como cu nan tin miedo di keda for di contacto cu otro hobennan, hopi di nan ta laga nan telefon sendi tur ora y tur caminda. Si nan “no ricibi ningun mensahe riba nan telefon cellular, nan ta bira ansha y haya mal beis, y ta cuminsa sinti cu ningun hende no tin mester di nan.” E ansha aki ta pone cu mesora nan ta contesta tur mensahe cu nan haya, locual hopi bes no ta necesario.

Claro cu telefon cellular por ta bentahoso. De echo, nan a demostra di ta sumamente balioso den casonan di emergencia. Asta si un hende ta uza telefon cellular pa cosnan informal esei no ta necesariamente malo, tanten cu e ta ser haci na un manera balansa. Pero algun autoridad ta bisa cu ser “adicto” na telefon cellular lo por perhudica algun habilidad normal di comunica. Un juffrouw di scol secundario na Osaka ta precupa cu debi na uzo di telefon cellular “muchanan ta perdiendo e habilidad di interpreta expresion di cara, comportacion y tono di bos di otro hende. Un consecuencia di esaki ta cu muchanan ta mas agresivo cu otro y ta pasa por halto di sintimento di otro hende”, segun e corant.

E articulo a conclui: “Aparentemente lo ta inevitabel cu den futuro muchanan lo bai depende mas ainda riba telefon cellular. E unico manera pa limita e efectonan negativo di e tendencia aki ta door di haci sigur cu hende grandi ta pone un bon ehempel pa mucha den e manera cu nan ta uza telefon cellular.”