Caha Di Pregunta

◼ Ki principionan di Bijbel ta aplicabel pa loke ta uzo di telefon celular durante reunion cristian y den sirbishi?

“Tin un Tempo Stipula pa Tur Cos.” (Ecl. 3:1): Telefon celular ta haci posibel pa hende papia cu otro of manda mensahe na casi tur momento. Sinembargo, tin ocasionnan cu cristiannan no kier pa nan telefon distrae nan. Por ehempel, na nos reunionnan nos ta adora Jehova, ricibi instruccion spiritual y disfruta di un intercambio di estimulo. (Deu. 31:12; Sal. 22:22; Rom. 1:11, 12) Pues, tin posibilidad cu nos por paga nos telefon ora nos yega Salon y check nos mensahenan despues cu nos sali for di reunion? Si nos tin cu laga nos telefon cendi pa un caso di emergencia, nos mester haci sigur cu e no ta stroba otro hende.

“Haci Tur Cos pa Causa di e Bon Noticia.” (1 Cor. 9:23): Tin biaha tin motibonan valido pa uza telefon celular den sirbishi. Por ehempel, e ruman cu ta dirigi e grupo por uz’e pa yama wak con ta bay cu e publicadornan cu ta predicando na otro parti di e teritorio. Tin publicador cu ta uza nan telefon pa yama un rebishita of un studiante prome cu nan bay cerca dje, specialmente si e ta biba un poco leu. Si nos tin un telefon hunto cu nos, nos tin cu percura pa e no stroba nos ora nos ta combersa cu e doño di cas. (2 Cor. 6:3) Ora nos tin cu warda riba otro publicador, en bes di yama of manda mensahe pa un amigo, no ta mihor pa nos concentra riba nos sirbishi y keda pendiente di esnan cu ta traha hunto cu nos?

Tene Consideracion cu Otronan. (1 Cor. 10:24; Flp. 2:4): Nos no kier neglisha e importancia di yega na tempo pa e reunion di sirbishi di veld pensando cu toch nos por yama of manda un mensahe pa un ruman pa haya sa na unda e grupo ta predicando. Si nos yega laat pa e reunion, hopi biaha mester reorganisa e grupo. Claro, por tin circunstancianan fuera di nos control cu por pone nos yega laat. Pero, si nos ta haci esfuerso pa semper nos yega na ora, nos ta mustra consideracion pa Jehova su areglo, e ruman cu ta dirigi e grupo y otro publicadornan.