Hobennan Cu sin Miedo Ta Papia di Nan Creencia Religioso

ENTRE Testigonan di Yehova tin hopi hoben. Nan ta stima Dios y ta haci esfuerso pa biba na harmonia cu su normanan describi den Bijbel. E hobennan aki ta orguyoso di nan creencia religioso, y ta papia libremente cu otro hende tocante dje na scol. Considera algun ehempel.

◼ Tempo cu Holly tawata den zesde klas, su klas a haya e tarea pa skirbi un opstel riba e pregunta: “Con abo lo a soluciona e problema di terorismo sin uza violencia?” Holly a probecha di e oportunidad aki pa skirbi tocante su speransa pa futuro basa riba Bijbel. El a splica cu atrabes di henter historia “hende a eherce autoridad riba un otro hende pa su daño.” (Eclesiastes 8:9) Caba el a dirigi atencion na e unico speransa real pa humanidad: e Reino di Dios. El a skirbi: “Ya cu Hesus ta e Rei nombra di e Reino ei, lo e elimina tur problema, incluso terorismo.” Anto Holly a elabora riba e manera cu Hesus lo realisa loke ningun gobernante humano por haci. El a skirbi: “Tempo cu Hesus tawata riba tera el a demostra ki clase di gobernante lo e ta. E tawata amoroso, y a percura pa hende. El a demostra e poder cu e tawatin door di cura malesa y door di resusita e mortonan. Ningun gobierno humano por duna bida bek na hende cu a muri. Pero e Reino di Dios si lo hacie.” Holly a conclui su opstel cu e declaracion: “E solucion ta serca Dios, no serca hende.”

Holly su maestra a skirbi bou di su opstel: “Wauw! Hopi combencente, Holly. Y masha bon pensa.” E maestra a keda impresiona tambe cu Holly su referencianan biblico. Esaki a duna Holly chens di papia cu su maestra tocante e Scol di Ministerio Teocratico, un programa semanal cu Testigonan di Yehova tin cu ta trata tocante con pa papia cu hende y siña nan. Su maestra gustosamente a acepta un ehemplar di e buki di instruccion cu nan ta uza den e Scol di Ministerio.

◼ Jessica tambe a haya chens di papia tocante su creencia religioso ora di skirbi opstel. El a bisa: “Mi tawatin e oportunidad di skirbi tres opstel tocante mi creencianan. Uno tawata tocante Testigonan di Yehova y derecho religioso. E maestra a pon’e den biblioteca di scol ya asina ken cu a desea di les’e por a haci esei. Poco tempo pasa mi a skirbi un opstel tocante mi bautismo y con importante e dia ei tawata pa mi. E alumnonan sa laga otro lesa e klad di nan opstel prome cu nan finalis’e, pues e muchanan di mi klas a haya chens di lesa esun di mi. Un mucha mohe a bisa mi: ‘Bon trabou. Ta great pa sa kico ta bo deber como un Testigo di Yehova. Pabien cu bo bautismo!’ Un otro mucha mohe a declara: ‘Bo relato tawata impresionante! Mi ta contento cu bo fe ta asina fuerte!’ Un mucha homber a skirbi simplemente: ‘Bo ta uza bo cabes bon. Pabien.’”

◼ Tempo cu Melissa tawatin 11 aña, el a haya un oportunidad unico pa papia tocante su creencia religioso. “E verpleegster di scol a bin den les di biologia pa papia tocante nos sistema di inmunidad. E tema di transfusion di sanger a bin dilanti. Despues di les mi a conta mi maestro di biologia tocante un di nos videonan tocante sanger. Mi a bin scol cu ne e siguiente dia, y mi maestro a bai cas cu ne y a wak e video cu su famia. E siguiente dia el bin scol cu e video y a laga dos klas wak e, incluso mi klas. Caba el a papia bon di Testigonan di Yehova, bisando cu si no tawata pa nos, lo no tawata asina facil pa haya alternativanan pa transfusion di sanger. Ora cu el a duna mi e video bek, el a puntra: ‘Con mi por haya un di e videonan ei pa e biblioteca di scol?’ Mi a dun’e uno. E tawata hopi entusiasma cu ne, y ami tambe!”

Holly, Jessica y Melissa ta entre e tantisimo Testigonan di Yehova hoben cu ta sigui e conseho biblico pa nan corda riba nan Creador. (Eclesiastes 12:1) Abo tambe ta haciendo esei? Si ta asina, bo por tin sigur cu bo ta haci Yehova su curason contento.—Proverbionan 27:11; Hebreonan 6:10.

Hobennan, ora boso ta papia tocante boso creencia religioso cu compañeronan di scol y cu maestronan, esei ta duna un bon testimonio tocante Yehova Dios y su proposito. Esei ta fortalece boso fe tambe, y ta desaroya den boso e orguyo sano di tin e privilegio di ta un di e sirbidonan di Dios. (Yeremias 9:24) Predica na scol ta sirbi tambe como un proteccion. Jessica a describie asin’aki: “Un di e beneficionan di papia tocante mi creencia ta cu e alumnonan no ta purba pone presion riba mi pa haci cosnan cu no ta na harmonia cu loke Bijbel ta bisa.”

[Plachi na pagina 24]

Holly

[Plachinan na pagina 24, 25]

Jessica

[Plachinan na pagina 24]

Melissa