E Punto di Bista Biblico

Diborcio Ta e Solucion?

NA Gran Bretania, un pasto ta yama e presentenan bonbini na un ceremonia. Dilanti di e pasto tin un pareha para hunto cu un grupo intimo di amigo y yiunan. Ta un otro casamento felis? Di ningun manera! E ceremonia aki ta pa reconoce e fin di nan matrimonio. Si, diborcio a bira asina comun cu awor algun iglesia ta tene ceremonianan di diborcio!

Abo tin pensa di diborcia? Den tal caso, poniendo un fin na bo matrimonio realmente lo hiba na un bida mas felis? Tin pasonan practico cu bo por dal pa logra felicidad cu bo casa?

“Nan Lo Bira Un Carni”

Ora cu Dios a casa e prome pareha, el a declara cu un homber “lo uni cu su esposa. Y nan lo bira un carni.” (Genesis 2:24) Pues, matrimonio lo mester tawata un union permanente. Ta pesei despues Hesus a bisa cu e unico base pa diborcio biblico cu e posibilidad di casa di nobo ta “pa motibo di inmoralidad sexual.”—Mateo 19:3-9.a

Esaki ta enfatisa con necesario ta pa parehanan tin un compromiso pa cu nan matrimonio. Pero kico si e problemanan den bo matrimonio ta hopi serio?

Diborcio Ta e Proceder Sabi?

Hesus a duna un principio mediante cua nos por evalua nos accionnan ora el a bisa: “Sabiduria ta wordo hustifica pa medio di su obranan.” (Mateo 11:19) Kico e resultadonan di e gran cantidad di diborcio sin un base solido ta indica?

“Hende a exagera e beneficionan”, segun Profesor Linda Waite, sociologo di Universidad di Chicago, kende a encabesa un team di experto cu a analisa matrimonionan infelis. Profesor Michael Argyle di Universidad di Oxford, despues di a pasa 11 aña analisando e contestanan di miles di persona, tambe a descubri cu “e hendenan menos felis den sosiedad tawata esnan cu a diborcia of separa.” Kico lo por ta e motibo?

Wel, aunke diborcio kisas ta elimina algun problema, e por habri caminda tambe pa un serie di suseso traumatico riba cua lo bo tin masha tiki control. De echo, investigacion ta mustra cu diborcio por lo general no ta reduci e sintomanan di depresion ni ta laga hende haya mas balor propio.

Asta si bo no tin e “matrimonio perfecto”, bo por saca beneficio door di keda cu bo casa. Hopi hende cu ta dicidido pa haci esei ta haya felicidad. Profesor Waite a declara: “Tin hopi problema cu ta ser resolve cu transcurso di tempo, y hende casa tin e tendencia di bira mas felis.” De echo, un estudio a demostra cu casi 8 di cada 10 hende cu tawata “hopi infelis” cu nan matrimonio pero cu a evita di diborcia, despues di cinco aña a haya cu nan tawata “felismente casa.” Pues anto, asta ora tin problemanan grave, ta bon pa parehanan no core diborcia.

Pasonan Practico

Personanan cu tin pensa di diborcia mester puntra nan mes si nan expectativanan pa cu matrimonio ta realistico. Medionan di comunicacion a promove e imagen di un relacion romantico cu ta culmina den un casamento extrabagante cu un final manera den sprookje. Despues di casamento, ora cu expectativanan halto keda sin cristalisa, e decepcion cu esei ta trece cu ne por stimula conflicto. Segun cu tension ta crece, ta desaroya un situacion den cua sintimentonan ofendi ta domina emocion. E amor ta marchita y, cu tempo, ta ser remplasa pa rabia y odio. Den tal circunstancia, hopi hende por sinti cu e unico opcion ta diborcio.—Proverbionan 13:12.

Pero en bes di permiti sintimentonan negativo afecta bo punto di bista, asocia cu personanan cu tin un compromiso fuerte pa cu nan matrimonio. Bijbel ta urgi cristiannan pa sigui “curasha otro y edifica otro.” (1 Tesalonicensenan 5:11) Pesei, esnan cu tin problema den matrimonio definitivamente tin mester di encurashamento di nan rumannan den fe.

E Importancia di Cualidadnan Cu Ta Agrada Dios

Apostel Pablo a conseha: “Bisti un curason di compasion, cariño, humildad, mansedumbre y pasenshi.” (Colosensenan 3:12) Cualidadnan cu ta agrada Dios por proteha e union matrimonial durante periodonan turbulento.

Por ehempel, Pablo a skirbi: “Boso soporta otro y pordona otro, si un di boso tin un keho contra un otro.” (Colosensenan 3:13) Christopher Peterson, psicologo di Universidad di Michigan, a bisa: “Pordon ta e caracteristica mas fuertemente liga na felicidad.”

Cariño, ternura y pordon ta hiba na amor, “e laso perfecto di unidad.” (Colosensenan 3:14) Muy probablemente, un tempo boso tawata felismente enamora di otro. Ta posibel pa boso recupera e amor cu un tempo boso tawata sinti? Sin importa con dificil bo circunstancia por ta, cobra animo. Tin speransa. De echo, keda hunto y aplica principionan biblico por resulta den un grado di felicidad cu kisas ta mas di loke bo a imagina. Bo esfuersonan relaciona cu esaki, definitivamente lo haci Yehova Dios, e Creador di matrimonio, contento.—Proverbionan 15:20.

[Nota]