Observando Mundo

Dicon Harimento Ta Laga Bo Sinti Bon

Dicon bo ta sinti bo asina bon ora bo hari? Segun un informe di e corant The Vancouver Sun, investigacion ta mustra cu humor ta activa no solamente partinan di e celebro liga cu idea y idioma, sino tambe e nucleus accumbens, e parti di celebro cu docternan ta conecta cu felicidad y euforia. Di acuerdo cu Dr. Allan Reiss di Universidad di Stanford, e area aki di e sistema nervioso ta “un subsistema celebral masha potente.” Reiss ta kere cu un estudio di humor por yuda docternan haya un miho comprondemento di comportacion social. Dr. Reiss a bisa: “Hopi bes, ta nos sentido di humor ta dicta si nos ta sera amistad y asta establece relacionnan romantico duradero, con nos ta hacie y cu ken. Tambe humor ta un manera universal cu [hende] ta uza pa trata cu tur sorto di stress.”

‘E Malesa Nobo di Siglo 21’

Asina algun psikiatra a describi e “adiccion” nobo na telefon cellular. E corant di Spaña El Pais a informa cu segun un estudio di CETRAS (Centro Spesifico di Tratamento y Rehabilitacion di Adiccionnan Social), e personanan mas vulnerable ta “hende mohe soltero entre 16-25 aña, cu ta timido, inmadura y frustra.” E “adiccion” ta hiba na “un necesidad insasiabel di uza telefon cellular pa yama y ricibi mensahe”, segun e psikiatra Blas Bombin. Ora nan no por uza nan telefon cellular, nan ta sufri di “ansiedad y mal beis.” “Adiccion” na telefon cellular no solamente ta afecta relacion cu otro hende sino e ta un bicio caro tambe. CETRAS ta menciona casonan di pashentnan cu tin ocho telefon cellular pareu y cu debe “asta 800€ [1.800 florin] pa luna na resibo di telefon.”

Barionan Margina na Mundo Ta Aumenta

Si cos sigui manera e ta bai actualmente, “aki 30 aña un di cada tres persona na mundo lo ta biba den barionan margina”, e corant The Guardian di London a bisa, citando un informe di Nacionnan Uni (ONU). Lamentablemente, “940 miyon hende—casi un sexto parti di e poblacion mundial—ya caba ta biba den areanan sushi y insaludabel, mayoria di nan sin awa, sin servicionan sanitario ni publico y sin siguridad huridico.” Den e districto Kibera di Nairobi, Kenia, tin rond di 600.000 hende ta biba den bario margina. Anna Tibaijuka, directora di ONU su programa di establecimento di poblacion humano ONU-habitat, a bisa: “Desigualdad y desempleo extremo ta hiba hende na comportacion antisocial. Barionan margina ta luga caminda tur maldad ta topa, caminda ta dificil pa haya pas y siguridad y caminda no por proteha hobennan.”

China Su Problema cu Luga di Parker

Crecemento economico rapido na China a haci posibel cu miyones di hende por tin nan propio auto. Pero tin un problema: unda nan mester parker. Hopi cura di edificionan residencial cu nan a traha durante e ultimo 25 añanan no tin luga di parker pasobra masha tiki hende tawatin auto tempo cu nan a traha e residencianan. Barionan residencial mas bieu tin cayanan smal yen di bocht, locual ta pone cu ta casi imposibel pa parker auto den nan. Mientrastanto, “e cantidad di auto na Beijing a surpasa 2 miyon, y e capasidad di parker ta apenas 600.000”, segun un informe di China Today. Na nivel nacional, ta solamente 20 porshento di doñonan di auto tin un luga di parker legal. Un otro indicacion cu e cantidad di auto a crece ta e aumento di e demanda pa petrolio. Segun China Today, “pronto China lo tuma e luga di Japon, como e di dos consumido mas grandi di petrolio.”

Hobennan cu Lesion Debi na Movemento Ripititivo

Un cantidad creciente di hobennan ta busca tratamento pa lesionnan debi na movemento ripititivo (RSI), segun The Globe and Mail di Canada. E corant a bisa: “Docternan y fisioterapistanan ta bisa cu nan pashentnan ta hopi mas jong cu antes pasobra muchanan inactivo ta pasa mas tempo riba computer, tanto na cas como na scol.” Segun Globe, e typemento constante of e clickmento constante riba e aparato cu ta controla un wega di video por hiba na e dolor y hinchamento cu ta comun serca hende cu ta sufri di RSI. Un conseho ta bai pa mayornan pa vigila postura di nan yiunan y pa ta alerta pa e siguiente sintomanan di RSI: un mucha cu ta blo frega su elleboog of pols, of cu ta keha cu nan ta doof of ta kima.

Luga di Empleo Ta Forma un Peliger?

The Wall Street Journal a informa cu segun un estudio Sueco, “traha cu hende di e sexo opuesto ta peligroso pa bo matrimonio.” Yvonne Aberg, autor di e estudio, a repasa registronan gubernamental di diborcio y di empleo y el a descubri cu “traha cu coleganan kendenan tur ta di e sexo opuesto ta aumenta e porsentahe di diborcio spantosamente cu un 70%, compara cu un oficina caminda tur colega ta di e mesun sexo.” Aberg a descubri tambe cu no a haci diferencia si e coleganan ta casa of no. E estudio cu a dura shete aña, y cu a envolve 37.000 trahado na 1.500 sitio, ta basa riba datonan di estadistica en bes di riba informenan personal, locual sa ta menos exacto. E articulo a bisa cu un manera pa reduci e riesgo di diborcio cu 50 porshento ta di traha den e mesun oficina cu bo casa.

Domi sin Fe

Un domi luterano a haya hopi atencion aña pasa pasobra el a bisa cu “no tin un Dios celestial, no tin bida eterno, no tin resureccion.” BBC News a informa cu despues di a keda suspendi pa un tempo cortico, e tawatin mag di bolbe bai traha como domi. Segun Obispo Lise-Lotte Rebel di e diocesis Helsingør, domi Thorkild Grosbøl di parokia Tårbæk pega cu Kopenhagen, “a pidi despensa pa su comentarionan” y a reconoce su obligacion pa cu iglesia. Sinembargo, Grosbøl a sigui predica e mesun ideanan. Na juni 2004, e obispo a declara cu si Grosbøl nenga di tuma su retiro, nan lo bai corte pa determina si lo e por sigui como domi.

Inscripcion Antiguo di Evangelio

Pa prome bes, investigadonan a haya un versiculo for di e Scritura Griego Cristian inscribi riba un graf di antiguedad den e Rooi di Kedron serca di Herusalem, segun e corant Aleman Frankfurter Allgemeine Zeitung. Pa casualidad nan a haya un inscripcion riba loke a bira conoci como e Graf di Absalon. E lus suave cu tawatin den un potret cu nan a saca segun cu tawata bira scur atardi laat, a revela na antropologo Joe Zias loke a parce un inscripcion gasta. Nan a aplica un simpel capa di papier-mache na e area, y nan por a descifra e versiculo di Bijbel. E inscripcion ta saca for di Lucas 2:25 y ta coresponde cu e Codecs Sinaitico di siglo 4. E descubrimento ta remarcabel pasobra en general uzo di textonan biblico riba graf a bira popular rond di aña 1000 di nos era.