Calco—Algo Tipico di e Islanan

Di un escritor di Spierta! na Bahamas

“Cuater snack di calco!” “Un calco gegrill y dos salada di calco!”

Esakinan ta e maneranan tipico cu clientenan hambra ta pidi cuminda pa bai cu ne na restaurantnan local aki na Bahamas. E aroma iresistibel di calco hasa ta mescla cu e aire salo, y ta lanta e apetit. Pero kico calco ta eigenlijk?

CALCO ta un molusco marino cu ta biba den un concha, e ta un slak di lama. Tin varios tipo di e molusco aki, entre nan, calco hala di halcon, calco lechi, calco rabo di gai, calco boxdo y calco reina of ros. E tipo cu specialmente nan ta gusta como cuminda akinan ta calco reina. Su nomber Latin ta Strombus gigas y bo ta hay’e principalmente den lama cayente for di Florida te Brazil. Calco reina su concha ta grandi, forma di spiral, cu un “lip” hancho cu ta basha na un banda. E calco adulto ta midi entre 20 pa 25 centimeter largo.

Con Ta Coi y Uz’e

Basil ta corda con na hoben e cu su tata tawata sali cu boto pa bai coi calco. E ta conta: “Mi tata tawata uza un hemchi grandi cu bom di glas y cu tawata hancho abou y smal ariba. Tambe e tawatin un palo largo cu dos hak na e punta. E tawata hinca e hemchi den lama pa asina e por a wak abou y haya sa unda tin calco. Segun cu e tawata tene e hemchi cu un man, e tawata uza su otro man pa hak e calco na e palo y hal’e den boto.”

Awendia e metodo popular ta pa un hende sambuya bai abou y bin ariba cu e calco na man. Ora nan ta sambuya den awa mas hundo, nan ta uza un snorkel of si nan tin permit di gobierno, un compressor di aire.

Pa saca e calco, nan ta bora un buraco na e base di e concha. Caba nan ta hinca un cuchiu door di e buraco pa pui e calco pa e bai na entrada di e concha di manera cu nan por hal’e afo. Calco tin cuater parti principal: e cabes, e organonan interno, e mantel (flishi) y e pia muscular. Na e pia tin un klep maron pega manera un cacho, un operculo. E pia ta e parti cu hende ta come, y e tin un cuero diki riba dje. Nan ta kita e cuero y tur e otro partinan cu bo no por come, y ta laga e dushi carni blanco.

Calco ta un excelente fuente di proteina. E ta sigui gosa di gran reconocemento debi na su balor curativo. Hopi hende ta conta con nan salu a mehora remarcablemente despues cu nan a sigui un dieta di come hopi calco.

Awendia tin un industria progresivo den hoyanan traha di concha di calco. E concha, cu su “lip” ros cu ta basha na un banda, ta bunita y masha popular entre coleccionistanan di concha. Sinembargo, e uzo mas grandi di calco ta pa satisface e paladar. Atrabes di añanan, cokinan inovativo a inventa un variedad di manera sabroso pa prepara e plato exkisito aki.

Un Cuminda Cu Ta Pone Bo Boca Baba

Antes, prome cu nos tawatin frishider akinan, nan tawata conserva calco door di sec’e. Prome, nan tawata hacie moli door di batie cu un martiu di palo. Caba nan tawata colga e carni den solo pa un par di dia pa e seca of pa sal’e. Prome cu cushna e carni nan tawata lag’e para trek den awa pa un par di ora pa e bira moli. Hopi hende te ainda ta gusta e sabor di calco conserva den e manera aki.

Un plato faborito tanto pa hende local como bishitante ta salada di calco, anto esei ta traha di calco curu. Bo ta saca e carni for di e concha, y cort’e na pida chikito. Caba bo ta mescla e calco cu selder, promenton, promente, siboyo y tomati. Ta agrega salo, lamunchi fresco y juice di apelsina. Si bo curpa ta coi ril ora bo pensa riba come cuminda di lama curu, no worry, tin hopi receta den cua ta cushna e calco. Pero ata un palabra di advertencia. Ora bo ta cushna calco, bo tin cu batie prome cu un martiu di palo pa hacie moli. Si bo no haci esei, e calco lo ta duro y stijf.

Bo por cushna calco gesmor, stoba, estilo di yorki, gegrill, estilo di cutlet, na balchi, bruha den aros of sopi, y asina nos por sigui. Como aperitivo, hopi bes hende ta sirbi kroket di calco of sopi di calco. Recetanan basico pa prepara e platonan aki ta pasa di un generacion pa otro. Pesei ora bo bishita e bunita islanan di Bahamas, no bai cas bek sin purba calco. Lo bo a purba algo tipico di e islanan.

[Cuadro/Plachi na pagina 15]

Calco Cutlet (Plachi te abou)

Sandra, un esposa y mama local, ta describi con e ta prepara un sabroso calco cutlet: “Prome, bati e calco hacie bon moli. E ora ei pas’e den hariña sasona cu salo cu peper, y caba pas’e den webo bati. Hasa e calco den azeta cayente te ora cu e ta maron color di oro. Lag’e scuri riba papel di seca man, y primi lamunchi riba dje.”

Por lo general nan ta sirbi calco prepara asina cu batata hasa y hopi kechup of cu aros moro. Tambe por com’e cu sous di tartar (mayones bruha cu augurk). Hopi bes nan ta exporta calco gevries, pues kisas lo bo por haya calco den bo area. Dicon bo no ta purb’e? Kisas lo bo gust’e masha.

[Plachinan na pagina 15]

Segun direccion di holoshi: Concha di calco reina; piscado di calco uzando un hemchi cu bom di glas y un palo; sacando e calco; sopi di calco; salada di calco; kroket di calco; calco gegrill cu banana hasa y yuca