Ki Efecto Tecnologia Tin Riba Bo Amistad Cu Otro Hende?

Sinembargo, pa algun hende tecnologia a bira e manera principal pa comunica cu nan amigonan. E hendenan ey por haya nan cu e siguiente problemanan:

• Nan ta mustra menos empatia pa nan amigonan.

• Nan ta sinti nan mes so y bashi.

• Nan ta enfoca mas riba nan mes cu riba otro hende.

LOKE TA BON PA BO SA

MUSTRA EMPATIA

Pa nos por demostra empatia, nos mester para keto un rato y pensa riba sintimento di otro hende. Esey por parce dificil pa haci si constantemente nos ta manda y lesa mensahe di telefon y ta pasa hopi tempo ta wak cos riba red social.

Si bo ta laga tecnologia controla bo, contesta un mensahe di bo amigo lo por parce otro tarea mas cu bo tin cu cumpli cu ne. Lo bo prefera di djis contesta tur mensahe lihe lihe y e ora ey por bira dificil pa ripara cu un amigo tin mester di yudansa.

PENSA RIBA ESAKI: Con bo por mustra bo amigonan cu di berdad bo ta interesa den nan ora bo ta manda nan mensahe electronico?—1 PEDRO 3:8.

SINTI BASHI

Un investigacion a mustra cu hende ta sinti nan pio despues cu nan pasa tempo riba red social. E cientificonan a yega na e conclusion cu ora un hende sinta wak potret di loke otro hende ta haci, “e por sinti cu e mes no a haci nada significante.”

Ademas, ora hende sinta wak potret excitante cu otro hende a pone, nan por sinti cu nan bida no ta mesun excitante. Si, red social por duna e impresion cu tur otro hende semper ta pasa bon, mientras abo ta pasa laf.

PENSA RIBA ESAKI: Con bo por evita di compara bo mes cu otro hende ora bo ta uza red social?—GALATIONAN 6:4.

ENFOCA MUCHO RIBA BO MES

Un juffrouw a skirbi cu algun di su alumnonan tabata egoista y tabata interesa solamente den amigo cu ta haci cos pa nan. Nan tabata enfoca riba loke nan por saca for di e amistad. Un persona por cuminsa trata su amigonan manera un app cu e por habri ora e tin mester di dje y cera ora e no tin mester di dje.

PENSA RIBA ESAKI: Loke bo ta pone online ta mustra cu bo tin e tendencia di competi cu otro hende of di enfoca demasiado riba bo mes?—GALATIONAN 5:26.

LOKE BO POR HACI

ANALISA CON BO TA UZA TECNOLOGIA

Ora bo ta controla tecnologia y no ta lag’e controla bo, bo por keda den contacto cu bo amigonan y hasta fortalece bo amistad cu nan.

Marca cua di e sugerencianan akibou bo tin gana di aplica, of skirbi algo otro cu bo kier haci.

• Purba di papia personalmente cu hende en bes di djis manda mensahe of e-mail

• Warda mi telefon (of pon’e riba silencio) ora mi ta combersa cu otro hende

• Pone un limite na e cantidad di tempo cu mi ta pasa riba red social

• Bira un mihor scuchado

• Tuma contacto cu un amigo cu ta pasando den tempo dificil