Dicon Tin Asina Tanto Odio?

Dicon tin asina tanto odio den mundo awe? Pa haya sa e contesta, nos tin cu compronde kico odio ta, dicon hende ta cuminsa odia otro hende y dicon tin odio tur caminda.

Kico Odio Ta?

Odio ta un sintimento profundo di disgusto of rabia pa un persona of grupo di hende. E no ta djis un sintimento di rabia temporal; e ta un sintimento cu ta persisti.

DICON UN PERSONA TA CUMINSA ODIA OTRO HENDE?

Tin varios motibo. Hopi bes, un persona ta cuminsa odia otro hende no pa motibo di loke nan a haci, sino pa motibo di ken nan ta. Kisas nan ta odia e hendenan ey, pasobra nan ta pensa cu e hendenan ey ta malbado of peligroso, y cu nan no por cambia. Nan por mira hende cu nan ta odia como inferior, un menasa y e causa di nan problemanan. Un persona cu ta odia otro hende kisas tambe a yega di ta victima di violencia, inhusticia of algo otro cu a pone e persona cultiva un rabia profundo.

DICON TIN ODIO TUR CAMINDA?

Un persona por odia hende cu nunca e no a yega di conoce. Por ehempel, sin cu un persona sa, e por adopta e punto di bista di hende cu e ta respeta of di su famia- y amigonan. Pesey, si un persona cuminsa odia un grupo di hende, mas hende por adopta su punto di bista, y nan tambe ta cuminsa odia e grupo di hende ey.

Ora nos compronde con facil ta pa un persona influencia un otro persona pa cuminsa odia un grupo di hende, e ora ey nos ta compronde dicon mundo ta yen di odio. Sinembargo, pa vence odio nos mester haya sa con odio a cuminsa. Bijbel por yuda nos cu esey.

BIJBEL TA BISA NOS CON ODIO A CUMINSA

Un diagram cu dos pijl cu ta draai den otro su direccion ta yuda nos compronde kico ta contribui na odio. 1. Informacion robes, incluso famia y amigo, red social y noticia. 2. Ignorancia di cultura, nacionalidad of religion. 3. Miedo di cambio, perde algo of loke nos no sa. 4. Odio, incluso prehuicio, discriminacion y violencia.

NO TA HENDE A CUMINSA ODIA PROME. Odio a cuminsa ora un angel den cielo a rebeldia contra Dios. Na e momento ey, el a ser yama Satanas e Diabel. Diabel “tabata un matado for di cuminsamento” di su rebelion. E ta “un gañado y e tata di mentira”, y el a sigui promove odio y violencia. (Juan 8:44; 1 Juan 3:11, 12) Segun Bijbel, Satanas ta malicioso, rabia y agresivo.—Job 2:7; Revelacion 12:9, 12, 17.

DI NATURALEZA, HENDE IMPERFECTO TIN E INCLINACION PA ODIA OTRO HENDE. E prome homber, Adam, a sigui Satanas su rebelion. Como resultado, tur hende a hereda pica y imperfeccion. (Romanonan 5:12) Adam su prome yiu homber, Cain, a mata su mes ruman homber Abel pa motibo di odio. (1 Juan 3:12) Ta berdad cu awe tin hopi hende cu ta mustra amor y compasion. Pero, como cu tur hende a hereda pica, hopi hende ta egoista, envidioso y orguyoso. E cualidadnan ey ta hiba na odio.—2 Timoteo 3:1-5.

INTOLERANCIA TA HIBA NA MAS ODIO AINDA. E mundo cu nos ta biba aden ta fomenta odio door di promove actitud y comportacion di hende cu ta sin misericordia y cu ta causa otro daño. Intolerancia, prehuicio, palabra ofensivo, termento y vandalismo ta sigui bira mas popular pasobra “henter mundo ta den poder di e Malbado”, Satanas e Diabel.—1 Juan 5:19.

Sinembargo, Bijbel ta haci mas cu djis bisa nos con odio a cuminsa. E ta mustra nos tambe kico ta e solucion.