Kico Por Yuda Mi Ta un Bon Tata?

Den e articulo aki nos lo trata

• Kico ta rol di un tata?

• Dicon e rol di un tata ta unico?

• Kico un yiu muher por siña di su tata?

• Conseho pa tatanan

Kico ta rol di un tata?

• Prome cu bo yiu nace. E tipo di esposo cu bo ta awor ta mustra ki tipo di tata lo bo bira despues cu bo yiu nace. E buki Do Fathers Matter? ta bisa:

  “Ora un tata yuda su esposa durante su embaraso pa cumpra tur loke tin mester, bay cu ne ora e tin afspraak cu dokter, wak e ultrasonido (echoscopie) cu e dokter ta haci di su baby y ta scucha su curason bati, lo sintie mas cerca di su casa y su baby ora e nace.”

  “Durante e embaraso di mi esposa, mi no tabata kier pa e sinti cu e tin cu haci tur cos su so, pesey mi tabata yud’e cu tur loke mi tabata por. Entre otro, nos a prepara e baby su camber hunto. Nos tabata kier pa tur cos ta cla pa ora e baby nace. Esaki tabata un tempo masha bunita y special pa nos.”—James.

  Principio di Bijbel: “No busca boso mes interes so, ma tambe interes di otro hende.”—Filipensenan 2:4.

• Ora bo yiu nace. Pa boso por haya amor pa otro, ta hopi importante pa bo carga bo yiu y hunga cu ne. Ademas, ta bon pa bo yuda bo casa cuida e baby. Loke bo haci como tata lo tin un impacto grandi riba desaroyo di bo yiu. E amistad cu bo ta forma cu bo yiu ta mustra cu bo yiu ta hopi importante pa bo.

  “No tuma bo mes mucho na serio. Sinta abou cu bo yiu pa hunga cu ne, haci co’i loco y pasa pret. No lubida, abo como mayor ta un di e prome personanan cu ta siñ’e kico ta amor.”—Richard.

  

  Principio di Bijbel: “Yiu ta un regalo di Jehova, si, fruta di bariga ta un recompensa di Dios.”—Salmo 127:3.

• Segun cu bo yiu ta bira grandi. Tin estudio cu ta mustra cu yiunan cu tin un bon relacion cu nan tata, ta siña mihor na scol, tin menos problema emocional y tin menos chens pa uza droga of pa comete crimen. Pues, pasa tempo cu bo yiu pa forma un bon amistad cu ne.

  “Mi yiu homber a bisa mi cu ora e bay biba riba su mes, loke e lo haya mas falta di dje ta e combersacionnan cu nos tin ora di come of ora nos ta core den auto. Algun di e combersacionnan di mas importante cu mi tabatin cu mi yiu ta ora menos mi a spera esey. Nos tabatin e tipo di combersacionnan ey pasobra nos tabata pasa hopi tempo hunto.”—Dennis.

  

  Principio di Bijbel: “Paga bon tino pa e manera cu boso ta cana no ta manera hende imprudente sino manera hende sabi, uzando boso tempo di e mihor manera.”—Efesionan 5:15, 16.

Dicon e rol di un tata ta unico?

Mayoria di hende ta verwacht cu un tata lo proteha su famia y percura materialmente pa nan, y cu un mama lo zorg pa e necesidad emocional di e famia. (Deuteronomio 1:31; Isaias 49:15) Pero den algun famia esey no semper ta e caso. Tin biaha e tata lo haci cos cu normalmente e mama ta haci y tin biaha e mama lo haci cos cu normalmente e tata ta haci. Sinembargo, expertonan riba tereno di famia ta bisa cu tanto e mama como e tata ta contribui cu algo unico na e famia.a

Un experto riba tereno di famia cu yama Judith Wallerstein a conta un experencia personal pa ilustra e punto ey. El a bisa: “Auto a dal mi yiu muher di 12 aña, y ora ambulance mester a hib’e hospital, e tabata kier pa su tata ta hunto cu ne pasobra el a sinti cu lo e por yud’e mas mihor den e situacion ey. Pero mas despues, ora e tabata den hospital riba su cama, e tabata kier pa ami sinta band’i dje henter dia pa consol’e.”b

“Un tata por yuda un famia pa nan por sinti nan sigur y stabiel, esaki lo ta algo mas dificil pa un mama logra su so. Y como cu e mama por lo general ta un bon scuchado, e yiunan ta sinti cu e ta compronde nan y ta stima nan. Pues, tanto e mama como e tata ta traha hunto como team.”—Daniel.

Principio di Bijbel: “Mi yiu, tende di bo tata y haci caso ora e ta siña bo y corigi bo, y no keda sin haci caso di loke bo mama ta siña bo.”—Proverbionan 1:8.

Kico un yiu muher por siña di su tata?

Como tata, bo ta siña bo yiu muher con hende homber mester trat’e. Laga nos wak dos manera cu e por siña esey:

• Door di wak con abo ta trata su mama. Si bo ta stima y respeta bo esposa, bo yiu muher ta siña ki cualidad e mester busca den un futuro casa.—1 Pedro 3:7.

  

• Door di wak con bo ta trat’e. Ora bo mustra respet na bo yiu muher, bo ta siñ’e pa e respeta su mes. Ademas, e ta siña cu otro hende homber tambe mester trat’e cu respet.

  Pero si constantemente bo ta critica bo yiu muher, bo por lag’e sinti cu e no ta bal nada. Y como consecuencia e por busca aprobacion di otro hende homber, cu kisas tin mal intencion.

  “Un yiu muher cu tin un tata cu ta stim’e y ta sosten’e lo no namora facilmente di un homber cu no tin e cualidadnan pa ta un bon casa.”—Wayne.