Pornografia Por Kibra Bo Matrimonio

Su esposa a descubri su secreto. El a keda pidi pordon, y el a priminti cu lo e stop. Pa un tempo, el a logra haci esey, pero despues el a haya un recaida. Y tur cos a bolbe cuminsa di nobo.

Bo tambe ta den un situacion asina? Si esey ta e caso, ta importante pa bo compronde con e echo cu bo ta wak pornografia ta afecta bo casa y con bo por stop cu e mal custumber ey unabes pa semper.a

Den e articulo aki nos lo trata lo siguiente:

• Loke bo mester sa

• Loke bo por haci

• Si bo esposo ta wak pornografia

Loke bo mester sa

Pornografia por kibra un matrimonio. E ta laga e persona inocente sinti rencor y pon’e perde confianza den su casa.b

Si un esposo ta wak pornografia, su esposa lo por tin e sintimentonan aki:

• Traicion. Un esposa cu yama Sarah ta bisa: “Tabata comosifuera mi esposo tabata comete adulterio bes tras bes.”

• No ta bal nada. Un esposa ta bisa cu e mal custumber di su esposo di wak pornografia a lag’e sinti “mahos y yen di berguensa.”

• Perde confianza. Un esposa cu yama Helen ta bisa: “Mi no ta confia nada cu mi casa ta haci.”

• Ansiedad. Un esposa cu yama Catherine ta reconoce: “E mal custumber di mi esposo constantemente ta pasa den mi mente. Mi no por stop di pensa riba dje.”

Pensa riba esaki: Bijbel ta bisa cu un esposo mester stima su esposa. (Efesionan 5:25) Un esposo ta stima su esposa di berdad si e ta laga su esposa sinti loke a ser menciona ariba?

Loke bo por haci

No ta facil pa stop di wak pornografia. Un esposa cu yama Stacey a bisa: “Mi esposo a stop di huma, uza marihuana y bebe, pero te ainda e ta lucha pa stop di wak pornografia.”

Si bo tambe ta den e situacion ey, wak con e siguiente sugerencianan por yuda bo vence bo adiccion na pornografia.

• Compronde dicon pornografia ta malo. Pornografia ta lanta deseonan egoista di un persona, y esey ta afecta e amor, confianza y lealtad cu mester tin den un matrimonio feliz. Ademas, e ta mustra falta di respet pa e Persona cu a establece matrimonio, esta, Jehova Dios.

  Principio di Bijbel: “Laga matrimonio ta honorabel.”—Hebreonan 13:4.

• Para responsabel pa bo accionnan. No bisa: “Si mi esposa tabata mas cariñoso, lo mi no tabatin cu wak pornografia.” No ta husto pa culpa bo esposa, esey ta djis un excuus pa bo bolbe wak pornografia ora bo esposa faya cu bo.

  Principio di Bijbel: “Cada hende ta ser poni na prueba ora e ser atrai y seduci pa su mes deseo.”—Santiago 1:14.

• Sea honesto cu bo casa. Un esposo cu yama Kevin ta bisa: “Mi ta conta mi casa tur dia con a bay cu mi. Mi ta cont’e tambe si algo provocativo a presenta mi dilanti, y si mi a keda wak e of mi a kita mi cara mesora. Ami cu mi casa ta comunica tur dia y nos no ta sconde nada pa otro.”

  Principio di Bijbel: “Nos kier comporta nos mes na un manera honesto den tur cos.” —Hebreonan 13:18.

• Semper keda alerta. Hasta si pa varios aña bo a domina e mal habito ey, bo por haya un recaida. Kevin, menciona anteriormente, ta bisa: “Mi a lucha cu pornografia pa dies aña largo y mi a kere cu mi a vence e problema. Pero e adiccion tabat’ey keto bay, wardando e momento oportuno pa bolbe presenta.”

  Principio di Bijbel: “Laga esun cu ta kere cu e ta para, tene cuidou pa e no cay.”—1 Corintionan 10:12.

• Si bo sinti tentacion, enfoca riba otro cos. Kisas bo no por evita deseo robes, pero bo por scoge si bo ta bay tras di e deseo ey of no. E tentacion lo pasa, e por pasa hasta mas lihe si bo siña enfoca bo pensamentonan riba otro cos.

  Principio di Bijbel: “Cada un di boso mester sa con pa domina su mes curpa den santidad y honor, no cu deseo sexual golos.”—1 Tesalonicensenan 4:4, 5.

• Evita situacion cu por bolbe pone bo cay den tentacion. E buki Willpower’s Not Enough ta bisa: “Unabes bo haya bo den un situacion vulnerabel ta manera bo a cende un suafel. Djis un tiki gasolin mester pa cende e candela.”

  Principio di Bijbel: “No laga nada malo domina mi.”—Salmo 119:133.

• No perde speransa. Kisas ta tuma tempo, hasta varios aña, pa bolbe gana e confianza di bo esposa. Pero experencia ta mustra cu esey ta posibel.

  Principio di Bijbel: “Amor tin pasenshi.”—1 Corintionan 13:4.