Dicon Hende No Ta Trata Otro na un Manera Decente Mas?—⁠Kico Bijbel Ta Bisa?

Cada dia tin menos hende ta comporta nan mes na un manera decente. Pashent cu tin mal manera ta grita dokter; hende cu ta come na restaurant ta trata e waiternan sin respet; algun pasahero for di control riba avion ta ataca stewardess; mucha mala mucha ta haci cherche di, menasa y ataca nan maestronan y algun politico ta haci cos inapropia y ofensivo mientras cu otro politico ta purba di hala atencion na con decente nan ta.

Bijbel ta un guia confiabel cu ta yuda nos compronde kico trata hende na un manera decente ta nifica. Ademas, e ta splica dicon asina tanto hende awe no ta trata otro na un manera decente.

Dicon hende no ta trata otro na un manera decente mas?

Rond mundo awe tin cada bes menos hende cu ta comporta nan mes na un manera decente, esta, cu ta sigui normanan moral y cu ta comporta nan mes na un manera cu ta bon y aceptabel.

• Un encuesta cu un compania conoci a haci na Merca a mustra cu norma y balor di hende na Merca ta di mas abou cu el a yega di ta den e ultimo 22 añanan.

• Un otro encuesta a ser haci cu mas cu 32.000 hende na 28 pais, 65 porciento di e hendenan ey a haya cu tin menos hende awe cu ta comporta nan mes na un manera decente cu nunca prome.

Bijbel a bisa cu hende lo comporta nan mes asina den nos tempo.

• “Den e ultimo dianan lo bin temponan critico, dificil pa trata cu ne. Pasobra hende lo stima nan mes, stima placa; nan lo ta bromado, arogante, blasfemado, desobediente na mayornan, malagradecido, ... sin cariño, [y] feroz.”—2 Timoteo 3:1-3.

Pa mas informacion tocante con e profecia aki ta cumpli awe, lesa e articulo “Beibel A Bisa Kon Hende Lo Pensa i Aktua den Nos Tempu?”

Un guia confiabel cu por yuda nos compronde kico comporta nos mes na un manera decente ta nifica

Aunke nos ta biba den un mundo caminda cada dia tin menos hende ta comporta nan mes na un manera decente, tin miyones di hende cu a ripara cu Bijbel por ta un bon guia pa yuda nan sa kico ta bon comportacion. E guia cu Bijbel ta duna relaciona cu loke ta bon y loke ta malo ta “confiabel, awor y pa semper.” (Salmo 111:8) Wak algun ehempel:

• Loke Bijbel ta bisa: “Tur loke boso kier pa hende haci cu boso, boso tambe mester haci cu nan.”—Mateo 7:12.

  Loke esaki ta encera: Nos mester trata hende na un manera amabel y cu respet, mescos cu nos kier pa nan trata nos.

• Loke Bijbel ta bisa: “Awor cu boso a pone gañamento un banda, boso cada un papia berdad cu su prohimo.”—Efesionan 4:25.

  Loke esaki ta encera: Nos mester ta honesto den tur loke nos ta bisa y haci.

Pa mas informacion tocante e topico aki, bo por lesa:

• E edicion di E Toren di Vigilancia cu tin e titulo “Bon y Malo—Guia Cu Bo Por Confia.”

• E articulo “Con Bijbel Por Yuda Nos Tolera Otro Hende.”