Isaias 41:10—“No Tene Miedo, Pasobra Mi Ta cu Bo”

“No tene miedo, pasobra mi ta cu bo. No sea ansha, pasobra mi ta bo Dios. Lo mi fortalece bo, si, lo mi yuda bo. Lo mi tene bo firmemente cu mi man drechi di husticia.”—Isaias 41:10, Traduccion di Mundo Nobo.

“No tene miedu, pasobra Mi ta ku bo, no wak asina spantá, pasobra Ami ta bo Dios. Mi ta duna bo forsa, yuda bo, sostené bo ku mi man viktorioso.”—Isaias 41:10, Beibel na papiamentu koriente.

Splicacion di Isaias 41:10

Den e texto ey, Jehovaa Dios ta sigura su fiel sirbidornan cu lo e yuda nan cu cualkier problema cu nan ta confronta.

“Mi ta cu bo.” Jehova ta duna su sirbidornan un bon motibo pakico nan no mester tin miedo: Nan no ta nan so. Jehova ta mira loke nan ta pasa aden y ta scucha nan oracionnan. Pesey, ta comosifuera e mes ta eynan hunto cu nan.—Salmo 34:15; 1 Pedro 3:12.

“Mi ta bo Dios.” Jehova ta trankilisa su sirbidornan recordando nan cu, sin importa nan situacion, e ta keda nan Dios y ta acepta nan como su sirbidornan. Nan por tin sigur cu ningun situacion lo stroba Dios di haci algo pa yuda nan.—Salmo 118:6; Romanonan 8:32; Hebreonan 13:6.

“Lo mi fortalece bo, si, lo mi yuda bo. Lo mi tene bo firmemente cu mi man drechi di husticia.” Jehova ta ripiti e mesun idea aki na tres diferente manera pa enfatisa cu lo e yuda su sirbidornan sigur. E ta papia di tene nan cu su “man” pa ilustra kico e ta haci pa su sirbidornan ora nan mester di yudansa. Si un di nan cay, Dios ta saca su man drechi pa yud’e lanta para.—Isaias 41:13.

E manera principal cu Dios ta fortalece y yuda su sirbidornan ta mediante su Palabra, Bijbel. (Josue 1:8; Hebreonan 4:12) Por ehempel, Bijbel ta duna conseho practico na hende cu ta enfrenta situacion dificil, manera pobreza, maleza of morto di un ser keri. (Proverbionan 2:6, 7) Ademas, Dios por uza su spirito santo, of forsa activo, pa duna su sirbidornan forsa emocional y mental cu nan mester pa trata cu situacion dificil.—Isaias 40:29; Lucas 11:13.

Contexto di Isaias 41:10

E palabranan aki a consola e Hudiunan fiel cu mas despues a ser hiba preso na Babilonia. Jehova a bisa di antemano cu na final di e exilio ey, e Hudiunan lo a tende noticia tocante un enemigo poderoso cu lo a destrui e nacionnan bisiña y menasa Babilonia. (Isaias 41:2-4; 44:1-4) Mientras cu Babilonia y e nacionnan bisiña tabata tembla di miedo pa motibo di e noticia ey, e Hudiunan no mester a preocupa, pasobra Jehova lo a proteha nan. Tres biaha, el a trankilisa nan cu e palabranan: “No tene miedo.”—Isaias 41:5, 6, 10, 13, 14.

Na prome instante, e palabranan ey di Isaias 41:10 a ser dirigi na e Hudiunan fiel cu tabata den exilio na Babilonia, pero Jehova Dios a preserva e palabranan ey te awe pa por consola tur su sirbidornan. (Isaias 40:8; Romanonan 15:4) Jehova ta yuda su sirbidornan di awe, mescos cu el a yuda su sirbidornan den pasado.