Hobennan Sa Puntra . . .

Con Mi Por Bai Bon cu Mi Compañero di Cuarto?

“Ami tawata kier un cushina limpi. Pero mi compañeranan no tawatin cu nes. Pa nan, tawata algo normal si no a warda tayo of si a laga cos riba stoof. Hewon esei no tawata importante.”—Lynn.a

COMPAÑERO DI CUARTO. “Nan por ta bon amigo di otro of piyo enemigo di otro”, segun e escritor Kevin Scoleri. Kisas abo no tin sintimentonan asina intenso, pero nos no por nenga cu biba cu un hende por ta un berdadero reto.b Conflicto entre compañeronan di cuarto ta asina comun serca studiantenan di universidad cu segun U.S.News & World Report, hopi scol ta haci “esfuerso extenso” pa yuda compañeronan di cuarto bai bon cu otro, entre otro mediante “programanan di mediacion di conflicto” y door di tene seminario.

Asta pa cristiannan hoben cu a sali for di cas pa participa den e trabou di predicacion full time, por ta dificil pa comparti apartamento cu un otro hende. Pero e bon noticia ta cu door di aplica principionan biblico y mustra “sabiduria sano”, hopi bes boso por resolve conflictonan cu surgi.—Proverbionan 2:7.

Siña Conoce Otro

Despues cu e excitacion di e mudansa pasa, kisas lo bo cuminsa anhela e manera cu cosnan tawata bai na cas. (Numbernan 11:4, 5) Sinembargo, ta bira mas duro pa bo ahusta si constantemente bo ta pensa riba pasado. Eclesiastes 7:10 ta duna e conseho aki: “No bisa: ‘Pakico e dianan di antes tawata miho cu esakinan?’ Pasobra no ta for di sabiduria bo ta puntra esaki.” Si, miho bo purba haci bo situacion actual mas placentero posibel.

Cuminsa cu haci esfuerso pa siña conoce bo compañero di cuarto. Ta cierto cu no ta necesario pa compañeronan di cuarto ta amigo intimo. De echo, bo compañero di cuarto kisas no ta un persona cu bo ta sinti bo masha atrai na dje. Pero una bes bo tin cu biba cu e persona ei, no ta logico pa boso tin un relacion mas amical posibel?

Filipensenan 2:4 ta bisa nos pa “no busca [nos] interes personal so, ma busca tambe interes di otronan.” Sin lag’e sinti cu bo ta interog’e, lo bo por puntra bo compañero di cuarto tocante e antecedente di su famia, kico ta interes’e, su metanan y preferencianan. Duna informacion tocante bo mes. Mas boso sa di otro, mas boso lo cuminsa comprende otro.

De bes en cuando, traha plan pa boso haci cos hunto. Lee ta bisa: “Tin biaha ami cu mi compañeranan tawata sali bai come of nos tawata bai bishita un galeria di arte hunto.” Compañeronan di cuarto cristian tin un manera asta mas eficas pa haci nan amistad mas fuerte. Esei ta door di haci cosnan spiritual hunto, por ehempel prepara pa reunionnan di congregacion of traha hunto den e trabou di predica.

David ta bisa: “Dia mi compañero di cuarto a duna un discurso publico, mi a asisti na su congregacion pa dun’e apoyo.” Aunke David cu su compañero di cuarto su gustonan no ta mescos pa loke ta trata deporte y musica, nan amor pa cosnan spiritual a crea un amistad. Segun David: “Nos tin hopi combersacion spiritual. Eigenlijk nos por papia oranan largo tocante cosnan spiritual.”

Pero tene cuidou: No bira asina pega na un compañero di cuarto cu bo no ta sera ningun otro amistad sano. Si bo compañero di cuarto ta sinti cu e mester invita bo tur biaha cu e ta bai un caminda, lo e por cuminsa sinti su mes benout. Bijbel ta conseha pa “habri” bo mes pa mas amistad.—2 Corintionan 6:13.

Biba Segun e Regla di Oro

Ta claro cu segun cu boso ta siña conoce otro, boso lo ripara e diferencianan cu boso tin pa loke ta custumber, gusto y punto di bista. Manera e hoben Mark ta spierta, “bo mester spera imperfeccion.” Ser inflexibel of egoista ta causa stress y tension. Esei ta e caso tambe si bo ta spera pa bo compañero di cuarto haci cambionan grandi djis pa agrada abo.

Pa loke ta ser un compañero di cuarto, Fernando a siña esaki: “Bo mester ta inegoista y no consentra riba bo mes.” Su comentario ta na harmonia cu e famoso Regla di Oro, cu ta bisa: “Pesei, tur loke boso kier pa hende haci pa boso, haci mescos pa nan.” (Mateo 7:12) Por ehempel, Fernando a ripara despues di poco tempo cu e y su compañero di cuarto tawata clash riba e temperatura di camber; e tawata gusta camber cayente, pero su compañero di cuarto a prefera di drumi den friu. E solucion? Segun Fernando: “Mi a busca un deken.” Si, manera Mark a bisa, “sea flexibel. Bo no tin cu leumai tur loke bo ta gusta, pero lo bo tin cu leumai un of dos cos si.”

At’aki un otro tereno caminda bo por aplica e Regla di Oro: Siña tolera e gustonan di bo compañero di cuarto. Bo no gusta su musica? Wel, probablemente e tambe ta pensa mescos di bo musica. Pesei si bo compañero di cuarto su gusto di musica no ta moralmente degrada, purba toler’e. Fernando ta bisa: “Lo mi a prefera pa mi compañero di cuarto gusta otro tipo di musica. Pero mi a cuminsa custumbra cu su gusto.” Di otro banda, un persona por gosa di su musica uzando headphone ya asina e no ta stroba su compañero di cuarto, cu kisas ta studiando.

Sigui e Regla di Oro tambe por preveni pleito innecesario tocante pocesionnan material. Por ehempel, si bo tin e custumber di cohe tur loke cu tin den frishider sin pidi—anto masha poco bes abo ta pone cos aden—esei por causa malcontento. Di otro banda, si bo ta rabia of wak bo compañero di cuarto cu mal wowo ora e cohe algo cu abo a cumpra, esei lo no echt yuda pa boso tin un bon relacion. Bijbel ta anima nos pa “ta generoso y dispuesto pa comparti.” (1 Timoteo 6:18) Si bo ta sinti cu bo compañero ta probecha di bo, no sera bo mes y keda sin papia. Expresa bo keho na un manera calmo y bondadoso.

Respeta otro su pocesionnan personal. Ta tribi di bo parti pa fia algo sin pidi. (Proverbionan 11:2) Corda tambe cu bo compañero di cuarto mester di privasidad. Mustra cortesia basico manera bati prome cu bo drenta su camber. Ora bo ta mustra respet, bo compañero probablemente tambe lo haci mescos. David ta conta: “No ta problema pa un di nos studia na cas. Nos tur dos ta respeta otro completamente y lo keda keto pa e otro por studia. Pero tin biaha ami ta bai biblioteca pa studia pa por si acaso mi compañero di cuarto kier haci algo otro.”

Sigui e Regla di Oro ta ensera tambe ser responsabel ora ta trata cosnan manera paga bo parti di huur na tempo of haci bo parti di trabou di cas.

Con pa Atende Pleito

Den tempo di Bijbel, Pablo cu Barnabas—dos homber cristian hopi respeta—tawatin ‘un pleito hopi fuerte.’ (Echonan 15:39, Beibel na papiamentu koriente) Kico si algo similar pasa entre boso dos? Podise tin un clash di personalidad of un custumber personal iritante cu ta caba cu bo pasenshi. Pero un solo desacuerdo of pleito ta nifica cu boso mester stop di comparti cuarto? No necesariamente. Evidentemente Pablo cu Barnabas a logra resolve nan desacuerdo. Podise bo por haci mescos prome cu bo dal e paso drastico di bai biba otro caminda. At’aki algun principio biblico cu por yuda.

● ‘No haci nada cu un actitud di egoismo of orguyo, ma cu humildad considera e otro mas importante cu bo mes.’—Filipensenan 2:3.

● “Laga tur amargura, furia, rabia, griteria y calumnia wordo kita for di boso, hunto cu tur malicia. Y sea cariñoso cu otro, misericordioso, pordonando otro, mescos cu Dios den Cristo tambe a pordona boso.”—Efesionan 4:31, 32.

● “Pesei, si bo presenta bo ofrenda na altar, y ayanan bo corda cu bo ruman tin algo contra bo, laga bo ofrenda ayanan dilanti di altar, y bai; reconsilia cu bo ruman prome, y despues bin presenta bo ofrenda.”—Mateo 5:23, 24; Efesionan 4:26.

E Beneficionan

Hopi cristian hoben (y tambe esnan no dje hoben ei) cu tin compañero di cuarto a siña personalmente ki cierto ta e palabranan di e Rei sabi Salomon: “Dos ta miho cu un.” (Eclesiastes 4:9) Si, hopi a descubri cu e experencia di comparti cuarto cu un hende tin beneficio. Mark ta bisa: “Mi a siña adapta mi mes y trata miho cu hende.” Renee ta agrega: “Bo ta siña hopi tocante bo mes. Y na mesun tempo, compañeronan di cuarto por tin un influencia positivo cu ta stimula bon comportacion.” Lynn ta admiti: “Mi tawata hopi malcria ora mi a bai biba cu mi compañeranan di cuarto. Pero mi a siña di no ta asina inflexibel. Awor mi ta realisa cu djis pasobra un hende ta haci algo diferente for di e manera cu ami ta hacie, no kiermen cu e ta robes.”

Ta cierto cu pa bo bai bon cu un compañero di cuarto ta rekeri esfuerso y sacrificio. Pero si bo traha duro pa aplica principionan biblico, bo por experencia mas cu solamente biba na pas cu otro; kisas lo bo haya cu ta asta dushi pa bo tin un compañero di cuarto.

[Nota]

[Plachi na pagina 14]

Cohe cos cu no ta di bo sin pidi por causa tension

[Plachi na pagina 15]

Mustra consideracion na otro