Hobennan Sa Puntra . . .

Dicon Ta Asina Dificil pa Biba cu Mi Compañero di Cuarto?

“Mi ta un hende cu gusta masha pa mi cosnan ta na ordo y limpi. Pero ora mi yega cas, mi compañero di cuarto ta benta riba flur ta wak television; corant, papel y popcorn benta tur caminda. Tur biaha ora mi ta bai cas, mi ta imagina mi caba kico ta warda mi, y mi ta bisa mi mes: ‘Mi no tin gana di drenta den e cuarto ei.’”—David.

“Mi compañera di cuarto tawata un mucha mohe masha malcria. Mi ta pensa cu el a kere cu ta un cria e tawatin ta biba hunto cu nos. Y semper e tawata kier pa cos bai na su manera.”—Renee.a

“SIÑA tolera e peculiaridadnan di un hende desconoci por siña [nos] flexibilidad y e arte di tuma y duna”, segun un articulo den U.S.News & World Report. “Pero hopi bes e proceso ei ta doloroso.” Hende cu a yega di comparti cuarto cu un compañero kisas ta di acuerdo cu esei.

Hopi studiante di universidad ta comparti cuarto cu un compañero pa baha e gastonan halto di scol. Otro hobennan ta hacie pasobra nan kier ta independiente di nan mayornan. Bou di hobennan cristian, hopi a scohe un compañero di cuarto pa nan por a dedica nan mes na interesnan spiritual. (Mateo 6:33) Nan ta haya cu nan por sirbi mas lihe como predicado di tempo completo si nan tin un hende pa yuda nan carga e gastonan di costo di bida. Tin biaha tambe un compañero di cuarto ta parti di bida como misionero of di sirbishi di Betel na e varios sucursalnan di Testigonan di Yehova.b

Spierta! a papia cu varios mucha homber y mucha mohe cu tin un compañero of compañera di cuarto. Nan tur ta di acuerdo cu un compañero di cuarto por ta mas cu un hende cu ta yuda paga e cuarto, e por ta un compaño, un hende pa papia cu ne y pa haci cos hunto cu ne. Segun Lynn: “Nos tawata keda lanta te laat y papia tocante cos cu mucha mohe gusta papia di dje of djis wak pelicula.” Y Renee ta bisa: “Un compañera di cuarto por anima bo. Tin biaha ora bo ta traha pa gana bo pan y ta purba paga tur bo resibonan y ta purba predica, ta dushi pa bo tin un compañera cu ta anima bo.”

No obstante, biba cu un compañero di cuarto—specialmente uno cu na principio casi bo no conoce—por ta un gran desafio. U.S.News & World Report a comenta riba e situacion na universidadnan: “Apesar di e gran esfuerso cu hopi scol ta haci pa asigna compañeronan di cuarto cu ta bai cu otro, tin hopi combinacion cu ta resulta insatisfactorio.” Si, tawatin casonan caminda conflicto entre compañeronan di cuarto a escala den violencia! Pesei a lanta hopi Web site riba Internet cu ta permiti studiantenan desahoga nan frustracion (aparentemente constant) relaciona cu nan compañero di cuarto. Dicon hopi bes ta resulta asina dificil pa biba cu un compañero di cuarto?

Biba cu un Hende Desconoci

Segun Mark: “Bai biba den un cuarto cu un hende desconoci ta un experencia un tiki interesante. Bo no sa realmente ki sorto di hende lo e ta.” De echo, djis pensa cu bo ta bai biba cu un hende cu ken kisas bo tin masha tiki of nada en comun por laga bo sinti masha incomodo. Ta cierto cu cristiannan lo mester tin hopi cos en comun y hopi cos pa papia over di dje. Asina mes, David ta admiti: “Mi tawatin masha miedo cu mi mester a biba cu un compañero di cuarto.”

Sinembargo, a resulta cu David su compañero di cuarto a bini di mesun stad cu ne. Pero no ta tur combinacion ta duna bon resultado. Mark ta conta: “Mi prome compañero di cuarto no tawata gusta papia. Ora bo ta comparti un cuarto cu un hende, bo tin cu papia. Pero e no kier a papia. E cos ei a echt cuminsa irita mi.”

Antecedente distinto for di otro por causa otro tension. Segun Lynn: “Ora bo bai biba pa prome bes riba bo mes, bo kier haci cosnan na bo manera. Pero pronto bo ta realisa cu bo tin cu tene cuenta cu otro hende.” En berdad ta asina cu ora bo sali for di e proteccion di bo cas di famia, por ta un shock grandi ora bo descubri con otro hende por tin puntonan di bista completamente distinto for di bo.

Otro Antecedente, Otro Manera di Haci Cosnan

Con cos ta bai ta depende hopi di e entrenamento cu un persona ta haya of ta keda sin haya di su mayornan. (Proverbionan 22:6) Segun e hoben Fernando: “Ami ta un persona cu gusta cos na ordo y limpi, y mi compañero tawata masha slons. Tuma por ehempel e cashi di paña: E ta gusta benta cos tur caminda. Ami gusta colga mi pañanan.” Tin biaha e diferencia den norma ta hopi extremo.

Renee ta corda: “Mi tawatin un compañera kende su cuarto literalmente a parce un chike di porco! Tambe mi tawatin compañeranan di cuarto cu no tawata limpia mesa despues di come of cu tawata laga nan tayonan den e labaplato pa dos of tres dia.” Si, pa loke ta trata trabou di cas, tin algun compañero di cuarto ta precis manera Proverbionan 26:14 ta bisa: “Manera porta ta drai riba su scarnirnan, asina e floho ta drai riba su cama.”

Di otro banda, si bo ta comparti camber cu un persona cu ta demasiado ordena, tampoco no ta dushi. Un mucha mohe cu yama Lee ta bisa di su compañera di cuarto: “E tawata haya cu mester limpia despues di cada ora. Di ningun manera mi no ta un hende porco, pero tin biaha mi por laga cos riba mi cama, por ehempel buki. Y e tawata haya cu e tin cu controla e situacion.”

Tambe compañeronan di cuarto por tin nan propio idea tocante kico ta higiena personal. Mark ta splica: “Mi compañero di cuarto ta lanta na ultimo momento, core bai na e labamano, sprengo poco awa riba su cabei, y sali bai.”

Diferencia den antecedente y personalidad por influencia loke nos ta scohe como dibirticion y recreo. Mark ta bisa cu e cu su compañero di cuarto “no ta gusta e mesun tipo di musica.” Sinembargo, ora ambos compañero ta respeta otro, e diferencianan ei por ta beneficioso y por asta yuda nan tur dos amplia nan gusto. Pero mayoria biaha e diferencianan aki ta resulta den conflicto. Segun Fernando: “Mi gusta musica Spaño, pero mi compañero semper ta critic’e.”

Telefon—Un Problema

Uso di telefon por ta un di e causanan mas grandi di conflicto. Mark ta bisa: “Mi gusta drumi tempran. Pero mi compañero ta keda lanta te laat papiando na telefon. Despues di poco tempo esei por cuminsa irita bo.” Lynn ta bisa mescos: “Tin biaha mi compañera su amiganan tawata bel e tres or of cuat’or di marduga. Si e no ta na cas, ami tawatin cu lanta pa contesta e telefon.” Con nan a soluciona esei? “Nos a percura pa nos cada un tin nos mes telefon.”

Sinembargo, no ta tur hoben por afford nan mes telefon, y hopi di nan ta haya nan obliga na comparti e telefon. Esaki por hiba na momentonan hopi tenso. Renee ta corda: “Un di mi compañeranan di cuarto tawatin un mucha homber, y hopi bes e tawata papia na telefon pa oranan largo. Un luna el a papia mas cu 160 florin na telefon anto e tawata kier pa nos paga parti di e resibo ya cu nos a palabra di partie entre nos.”

Djis haya chens cu e telefon por ta un otro problema. Lee ta corda: “Mi tawata comparti cuarto cu un persona mas grandi cu mi. Y nos tawatin un telefon so. Mi tawata papia tur ora na telefon pasobra mi tawatin hopi amiga. Nunca e no a bisa nada. Ami a pensa cu si e kier a uza e telefon e ta laga mi sa. Awor mi ta realisa cu loke mi a haci a mustra un falta di consideracion.”

Falta di Privasidad

“Tur hende mester di poco privasidad”, segun David. “Tin biaha hewon mi tin cu relax y no haci absolutamente nada.” Sinembargo, por ta dificil pa haya privasidad ora bo ta comparti bo camber cu un persona. Mark tambe ta bisa: “Mi tin gana di ta mi so de bes en cuando. Pesei e cos di mas duro pa mi tawata e falta di privasidad. Ami cu mi compañero di cuarto tin mesun orario. Pues ta dificil pa haya privasidad.”

Asta Hesucristo de bes en cuando tawatin mester di tempo pa ta su so. (Mateo 14:13) Pesei por ta hopi frustrante ora cu e presencia di bo compañero di cuarto ta stroba bo di lesa, studia of medita. Segun Mark: “Ta duro pa studia pasobra semper tin algo ta pasando den e camber. El a invita amigonan, e ta na telefon, of e ta wak television of scucha radio.”

Pero toch pa dificil cu por ta pa soporta un compañero di cuarto, miles di hoben a logra esei cu exito. Otro articulonan den e serie aki lo trata algun manera practico pa beneficia di e situacion ora bo ta comparti cuarto cu un persona.

[Nota]

[Plachi na pagina 16]

Por ta un desafio ora boso no tin mesun gusto den musica

[Plachi na pagina 18]

Falta di consideracion por crea tension