Con Mi Sed Spiritual A Ser Sacia

SEGUN E RELATO DI LUCIA MOUSSANETT

SITUA den e seronan di e skina nortwest di Italia, serca di Alpen di Suisa y pega cu e famoso Mont Blanc di Francia, bo ta haya e region di Valle d’Aosta. Ei mi a nace na 1941 den e comunidad chikito di Challant St. Anselme.

Mi tawata yiu mayo, y mi cuater otro rumannan tawata mucha homber. Mama tawata un mohe trahado y un catolico deboto. Tata tambe a bini di un famia religioso. Dos di su ruman mohenan tawata soeur. Mi mayornan a haci hopi sacrificio material pa mi, y asta a percura pa mi por a haya un educacion. Den nos comunidad chikito no tawatin scol, pesei ora mi tawatin 11 aña mi mayornan a manda mi un internat dirigi door di soeur.

Einan mi a siña Latin y Frances, y tambe otro vak. Anto ora mi a haci 15 aña, mi a cuminsa pensa seriamente riba con mi ta bai sirbi Dios. Mi a rasona cu e miho manera pa sirbie lo ta di drenta un combento. Pero, mi mayornan no a gusta e idea aki, ya cu ta Mama so lo mester a keda cuida mi ruman hombernan. Mi mayornan a spera cu mi educacion lo a yuda mi haya un bon trabou y asina yuda mi famia financieramente.

Aunke e reaccion di mi mayornan a duel mi, mi tawata kier tin un berdadero proposito den bida y mi a sinti cu Dios mester ta na prome luga. Pesei na 1961, mi a drenta un combento catolico Romano.

Mi Bida di Soeur

E prome lunanan mi a studia e norma- y reglanan di iglesia y a haci trabou manual den e combento. Na augustus 1961 mi a cuminsa mi novisiado, es decir e periodo di siña, y a cuminsa bisti e paña tipico di soeur. Tambe mi a propone nan pa mi duna mi mes un nomber nobo, Ines, nomber di mi mama. Ora nan a acept’e, mi a bira conoci como Soeur Ines.

Aunke mayoria novisia ta traha den combento, mi tawatin suficiente educacion pa traha como maestra di scol basico. Dos aña despues, na augustus 1963, mi a haci mi votonan y a bira soeur den e orden di Monhanan di San Giuseppe na Aosta, Italia. Mas despues e combento a financia mi educacion adicional door di manda mi na e Universidad di Maria Santissima Assunta na Roma.

Ora mi a regresa Aosta na 1967, despues di a caba mi estudio na Roma, mi a cuminsa duna les na un scol secundario. Na 1976, nan a ofrece mi e puesto di cabes di scol. Aunke ainda mi tawata duna algun les, mi a wordo encarga cu administracion di e scol y a bira miembro di directiva di scol di e region di Valle d’Aosta.

Mi berdadero deseo tawata di yuda hende pober. Mi tawata sinti masha hopi pa nan. Pesei mi a organisa varios programa social, entre otro, un programa pa yuda hende sin famia cu tawatin un malesa mortal. Tambe mi a cuminsa un programa pa duna les na yiunan di imigrante. Fuera di esei, mi tawata busca trabou y cas pa hende pober y a yuda percura asistencia medico pa esnan den necesidad. Mi a purba hiba mi bida na harmonia cu e principionan religioso di iglesia.

E tempo ei mi a acepta teologia catolico, incluso e siñansanan di iglesia manera Trinidad, alma inmortal y e punto di bista catolico tocante hende su futuro eterno. Ya pa e tempo ei, teologia catolico tawata permiti tambe puntonan di bista manera por ehempel cu por tin mas cu un religion, locual a nifica acepta otro religion y existi hunto cu nan.

Cosnan Cu A Cuminsa Molestia Mi

Sinembargo, algun cos den Iglesia Catolico a molestia mi. Por ehempel, prome cu bautismo y confirmacion, mayornan y yiunan supuestamente mester studia kico e pasonan aki ta nifica. Sinembargo, mayoria di nan nunca no tawata bin les, y otronan no a haci un esfuerso pa studia. Ademas, tawatin hende cu ora un parokia no acepta pa batisa y confirma nan, nan a simplemente bai un otro parokia pa batisa of confirma einan. Pa mi, esei tawata un cos superficial y hipocrita.

Tin biaha mi tawata puntra mi mes y otro soeurnan: “Nos no mester ta predicando e Evangelio en bes di dedica nos mes na tur tipo di otro actividad?” Nan tawata contesta mi: “Nos ta predica door di haci bon obra.”

Ademas, tawata dificil pa mi kere cu mi mester bai confesa mi picanan serca un pasto. Mi a rasona cu mi mes mester por papia cu Dios tocante tal asuntonan personal. Ademas, e idea di siña oracion for di cabes y keda ripiti nan, tawata dificil pa mi acepta. Tambe tawata duro pa mi kere cu papa ta infalibel. Na dado momento, mi a dicidi cu lo mi tin mi propio creencianan tocante e asuntonan ei y cu lo mi djis sigui cumpli cu mi bida religioso.

Sed pa Conocemento Biblico

Semper mi tawatin un respet profundo pa Bijbel y e deseo di conoc’e. Ki ora cu mi tawatin cu tuma un decision of cu mi a sinti cu mi mester di Dios su sosten, mi a lesa Bijbel. Aunke nunca nos no a studi’e den combento, mi a les’e riba mi mes. E relato di Isaias 43:10-12, caminda Yehova Dios ta bisa: “Boso ta mi testigonan”, semper a impresiona mi. Sinembargo, na e tempo ei mi no a compronde e pleno nificacion di e palabranan ei.

Tempo cu mi a bai universidad na Roma den decada di 1960, mi a sigui un curso di cuater aña den teologia, patrocina door di Vaticano. Pero Bijbel no tawata un di e bukinan di instruccion. Despues cu mi a regresa Aosta, mi a asisti na hopi conferencia ecumenico, asta na esnan patrocina pa organisacionnan cu no tawata catolico y tambe di esnan cu a consisti di varios denominacion. Esei a duna mi mas gana di conoce e siñansanan di Bijbel. Tawatin mucho hopi confusion entre gruponan cu a pretende di ta siña tocante e mesun Bijbel!

Siñando Mas Tocante Bijbel

Na 1982, un Testigo di Yehova a bishita e centro caminda mi tawata haci trabou social y a purba cuminsa un combersacion tocante Bijbel cu mi. Aunke mi tawata hopi druk, mi a gusta e idea di siña tocante Bijbel. Pesei mi di: “Pasa serca mi na mi scol, y ora mi tin un ora liber nos por papia.”

Aunke e señora a pasa, mi no tawatin ningun “ora liber” den mi programa. Net den e tempo ei mi mama a haya sa cu e tin cancer, pesei poco dia despues mi a tuma verlof pa yud’e. Despues di su morto na april 1983, mi a bolbe bek na trabou, pero pa e tempo ei e Testigo a perde contacto cu mi. Pero un poco despues, un otro mucha mohe Testigo di binti pico aña a pasa pa papia tocante Bijbel. Den e dianan ei mi tawata lesa e buki biblico di Revelacion riba mi mes, pesei mi a puntr’e: “Ken ta e 144.000 menciona aki na Revelacion capitulo 14?”

Mi a siña cu tur bon hende ta bai shelo, y pesei mi no por a compronde dicon aparentemente e 144.000 aki ta ser separa for di e otronan den shelo. Mi tawata puntra mi mes: ‘Ta ken e 144.000 aki ta? Kico nan ta haci?’ E preguntanan aki a keda bai bin den mi mente. E Testigo a sigui purba haya mi, pero mi tawata asina ocupa cu nunca e no a logra.

Cu tempo, e Testigo a duna Marco (un anciano den su congregacion) mi adres. Finalmente, na februari 1985, Marco a topa mi. Como cu mi tawata druk nos a papia solamente un par di minuut, pero nos a traha un cita. Despues Marco cu su casa Lina, a cuminsa bishita mi regularmente, y a yuda mi compronde Bijbel. Den poco tempo mi por a mira cu siñansanan catolico basico manera Trinidad, alma inmortal y fierno di candela claramente no tawata basa riba Bijbel.

Asociacion cu e Testigonan

Ora mi a bai un reunion di Testigonan di Yehova na nan Salon di Reino, tawata bisto cu cosnan tawata hopi otro for di Iglesia Catolico. Tur hende, no solamente un koor, a canta y participa den e reunion mes. Tambe mi a cuminsa mira cu henter e organisacion tawata consisti di “ruman.” Di berdad nan tawata interesa den otro. E cosnan aki a impresiona mi.

Durante e tempo ei, mi tawata asisti na e reunionnan den mi paña di soeur. Mi por a mira cu algun di nan a keda impresiona pa mira un soeur na Salon di Reino. Mi a sinti e mesun goso y satisfaccion cu bo ta sinti ora bo ta rondona pa e amor di un famia grandi. Tambe, segun cu mi a studia, mi a cuminsa mira cu hopi di e principionan riba cua mi a basa mi bida no tawata na harmonia cu e Palabra di Dios. Por ehempel, Bijbel no ta bisa cu sirbidonan di Dios mester bisti paña special. E sistema di puesto y rango den Iglesia y e splendor ceremonial tawata basta diferente for di loke Bijbel ta bisa tocante ancianonan humilde cu ta hiba delantera den e congregacion.

Mi a sinti como si fuera mi tawata sink, manera cos cu mi no tin tera firme bou di mi pia. A parce imposibel cu pa 24 aña mi a biba den creencianan robes. Sinembargo, mi a reconoce bon cla cu esaki tawata e berdad. Mi tawatin miedo di pensa cu na edad di 44 aña, mi mester a cuminsa mi bida di nobo. Pero con lo mi por a sigui cana cu wowo sera awor cu mi a mira kico Bijbel realmente ta siña?

Un Decision Crucial

Mi tawata sa cu si mi bandona e combento, esei lo a nifica cu lo mi keda sin ningun recurso material. Sinembargo, mi a corda e palabranan di David cu ta bisa cu ‘nunca e husto lo keda desampara ni su desendientenan lo tin cu cana pidi pan.’ (Salmo 37:25) Mi tawata sa cu lo mi perde un cierto grado di comodidad y siguridad material, pero mi a pone mi confiansa den Dios y a rasona: ‘Di kico mi mester tin miedo?’

Mi famia a pensa cu mi a bira loco. Aunke esei a molestia mi, mi a corda e palabranan di Hesus: “Esun cu stima tata of mama mas cu mi, no ta digno di mi.” (Mateo 10:37) Na mesun tempo, gestonan simpel di e Testigonan a curasha mi y fortalece mi. Ora mi tawata cana riba caya den mi paña di soeur, nan tawata haci sigur di bin cuminda mi. Esaki a laga mi sinti asta mas serca di e hermandad y como parti di nan famia.

Finalmente mi a bai serca e Madre Superiora y a splic’e dicon mi a dicidi di bandona e combento. Aunke mi a ofrece pa mustr’e den Bijbel dicon mi a tuma e decision aki, el a nenga di scucha, bisando: “Si mi kier compronde cualkier cos den Bijbel, mi por yama un experto di Bijbel!”

Iglesia Catolico a keda den shock pa mi decision. Nan a acusa mi di ta inmoral y di a bira loco. Sinembargo, hende cu tawata conoce mi tawata sa cu e acusacionnan ei ta falso. Hende cu mi tawata traha cu ne a reacciona den diferente manera. Tin di nan a considera loke mi ta haci como un acto di curashi. Otronan a sinti pena, pensando cu mi ta bai den un caminda robes. Algun di nan asta tawatin masha duele di mi.

Dia 4 di juli 1985, mi a bandona Iglesia Catolico. Sabiendo con otro personanan cu a tuma e decision ei a ser trata, e Testigonan tawata teme pa mi siguridad y a sconde mi pa mas o menos un luna. Nan tawata bin busca mi pa bai reunion y despues tawata hiba mi bek caminda mi tawata biba. Mi a keda for di bista te ora cu cos a plakia. Anto, dia 1 di augustus 1985 mi a cuminsa sali den sirbishi cu e Testigonan di Yehova.

Ora mi a asisti na un Congreso di Districto di Testigonan di Yehova mas laat den augustus, medionan di comunicacion a haya sa cu mi a bandona iglesia y a publica e relato. Ora cu mi a batisa dia 14 di december 1985, e television y corant local a haya esei asina escandaloso cu nan a bolbe publica e relato, haciendo sigur cu tur hende sa kico mi a haci.

Ora mi a bandona e combento, mi tawata bashi bashi. Mi no tawatin trabou, ni cas ni pension. Pesei pa mas o menos un aña, mi a traha cuidando un persona paralisa. Na juli 1986, mi a bira un pionero, manera Testigonan di Yehova ta yama nan predicadonan di tempo completo. Mi a muda bai un area caminda tawatin un congregacion chikito cu a caba di ser forma. Einan mi tawata duna les priva di idioma y otro les mas, probechando asina di mi educacion. Esaki a duna mi chens di tin un programa flexibel.

Sirbiendo den Teritorio Stranhero

Awor cu mi a siña e berdad di Bijbel, mi kier a compartie cu mas tanto hende posibel. Como cu mi por a papia Frances, mi a pensa di bai sirbi den un pais Africano caminda nan ta papia Frances. Pero na 1992, Testigonan di Yehova a haya reconocemento legal den e pais biciña Albania. Na fin di e aña ei, un grupo chikito di pionero di Italia a ser asigna pa bai predica einan. Entre e pioneronan ei tawatin Mario y Cristina Fazio di mi congregacion. Nan a invita mi pa bishita nan y pa pensa riba e posibilidad di sirbi na Albania. Pesei despues di a evalua esei cuidadosamente y haci oracion, mi a bandona na edad di 52 aña e siguridad relativo di mi pais pa bai den un mundo completamente diferente.

Esei a tuma luga na maart 1993. Ora mi a yega Albania mi a ripara mesora cu maske geograficamente mi no tawata mucho leu for di mi pais natal, toch mi tawata den un otro mundo. E hendenan tawata bai tur caminda na pia, y nan tawata papia Albanes, un idioma completamente incomprendibel pa mi. E pais tawata pasando door di cambionan grandi, bayendo di un sistema politico pa un otro. Sinembargo, e hendenan tawatin hopi sed pa e berdad di Bijbel, y nan tawata gusta lesa y studia. Studiantenan di Bijbel tawata haci progreso spiritual masha lihe mes, y esei a haci mi curason contento, y a yuda mi ahusta na e ambiente nobo aki.

Ora mi a yega Tiranë, e ciudad capital, na 1993, tawatin un congregacion so na Albania, y un poco mas cu 100 Testigo plama rond e pais. E luna ei, na e prome dia special di asamblea cu nan a tene na Tiranë, tawatin 585 persona presente y 42 a batisa. Maske mi no a compronde nada, tawata masha conmovedor pa tende e Testigonan canta y mira nan paga asina bon tino. Na april tawatin celebracion di e conmemoracion of Memorial di e morto di Hesucristo, y 1.318 persona a asisti! For di e tempo ei padilanti e actividad cristian a prospera na Albania.

Mi tawatin custumber di para wak e stad di Tiranë for di mi balcon na di cuater piso y puntra mi mes: ‘Ki dia nos lo logra predica na tur e hendenan aki?’ Yehova Dios a percura pa esei. Awor tin 23 congregacion di Testigonan di Yehova na Tiranë. Den henter e pais tin 68 congregacion y un 22 grupo, pa un total di 2.846 Testigo. Tur e crecemento aki a tuma luga den solamente un par di aña! Y nos tawatin 12.795 hende na e Memorial di aña 2002!

Durante e dies añanan aki na Albania, mi tawatin e gran privilegio di yuda por lo menos 40 persona yega te na bautismo. Varios di nan ta sirbi awor como pionero y den otro rasgonan di sirbishi di tempo completo. Atrabes di añanan, nan a asigna seis grupo di pionero Italiano pa yuda cu e predicacion na Albania. Pa cada grupo nan a prepara un curso di tres luna pa siña e idioma, y mi a haya e invitacion pa duna e cuater ultimo cursonan.

Na principio ora mi amistadnan a tende tocante mi decision pa bandona iglesia, nan reaccion tawata sumamente dramatico. Pero despues di tur e añanan aki, nan actitud a suavisa ora nan a mira cu mi ta na pas y tin un bida trankil. Felismente, mi famia ta apoya mi mucho mas tanto awor, incluso un tanta di 93 aña cu ainda ta soeur.

For di dia cu mi a conoce Yehova, el a cuida mi bon y a yuda mi pasa door di hopi diferente circunstancia! El a dirigi mi pasonan na su organisacion. Ora mi wak bek riba mi pasado, mi ta corda con mi tawata anhela di por yuda e pobernan, esnan menos privilegia y esnan den necesidad. Tambe mi a desea di por a dedica mi completamente den sirbishi na Dios. Pesei mi ta gradici Yehova, pasobra el a percura pa mi sed spiritual wordo sacia.

[Plachi na pagina 21]

Un famia Albanes cu mi a studia Bijbel cu ne. Diesun di nan a batisa

[Plachi na pagina 21]

Mayoria di e señoranan aki cu mi a studia Bijbel cu ne na Albania, awor ta den sirbishi di tempo completo