Desaster Riba Lama Tragedia Riba Tera

DI UN ESCRITOR DI SPIERTA! NA SPAÑA

DIA 13 di november 2002 a surgi un desaster ecologico y economico, ora cu den lama bruto e tanker Prestige a haya un lekkage. Esfuersonan pa rescata e barco cu a sufri daño a fracasa, y despues di seis dia—durante cua casi 20.000 ton di fuel oil (un tipo di combustibel pisa) a lek—e tanker finalmente a kibra na dos y sink rond di 200 kilometer pafo di costa di Spaña.

E tanker a bai abou cu mas cu 50.000 ton di fuel oil, y a sigui lek rond di 125 ton pa dia. Cada bes tawata forma mancha nobo di azeta y no por a evita cu esakinan tawata drif yega costa. Door cu e combustibel pisa aki ta sumamente pegahoso y venenoso, su impacto riba medio ambiente tawata hopi desastroso.

E gasnan cu e tawata produci a stroba hopi boluntario cu a purba limpia e beachnan. Ademas, e fuel oil a forma un capa diki di breu cu a pega riba e barancanan mescos cu bals preto. Michel Girin, director di e Centro di Dokumentacion, Investigacion y Experimentonan Riba Polucion Accidental di Awa, a lamenta: “E ta un di e piyo deramenan di combustibel den historia.”

Esfuersonan Heroico

Pa simannan largo, centenares di piscado tawata subi lama pa combati mancha di azeta cu a pone nan pan di cada dia na peliger. E piscadonan a lucha heroicamente pa saca e azeta prome cu esaki por a haci nan beachnan preto y ruina un di e regionnan mas rico na pisca na mundo. Algun homber tawata saca clompi di lodo di grease cu man for di awa. Segun Antonio, un piscado local, “tawata un trabou hopi duro, pero nos cu tawata den boto chikito no tawatin otro opcion.”

Mientras e piscadonan a lucha duro pa elimina e fuel oil riba lama, miles di boluntario for di rond Spaña a bin duna un man cu limpiesa di e beachnan. Den nan coverall blanco desechabel y cu masker bisti, nan a keda manera hende cu tawata hibando un guera biologico. Nan tawatin e trabou duro di hisa e azeta cu shobel y bash’e den emmer pa hiba otro caminda. Mescos cu e piscadonan, tawatin algun boluntario cu a uza asta nan mannan pa elimina e azeta cu a susha e beachnan.

Efectonan Desastroso

“Mi a kere sigur cu lo mi a muri di tristesa ora mi a mira e olanan preto benta petrolio contra e waf na Muxía”, segun Rafael Mouzo, e alcalde di Corcubión na nort Galicia. Ei e costa a keda un desaster completo. “E derame a afecta pan di masha hopi hende den nos pueblo.”

Lamentablemente, e bunita parke nacional nobo di Spaña, Las Islas Atlánticas, a sufri gran parti di e daño di un di e manchanan di azeta. Colonianan inmenso di parha di lama tawata traha nan neishi riba e cinco islanan aki cu anteriormente tawata ‘birgen’, pafo di e costa di Galicia. E awanan seco rond di e islanan aki tawata hopi rico na varios tipo di bestia di lama.

Pa cuminsamento di december, 95 porshento di e costa di e parke tawata contamina cu fuel oil. Expertonan di parha a calcula cu mas o menos 100.000 parha lo keda afecta. Sambuyadonan a mira asta clompinan grandi di crudo cu a bira duro den fondo di lama y cu ta causa daño na e ecosistema delicado di bou di awa.

Jay Holcomb, kende a lanta un centro pa rescata parha, a informa: “Por lo general, e parhanan ta muri sea hoga of door cu nan temperatura di curpa ta baha bou di normal. Azeta ta papa tur e plumanan y caba cu nan sistema di isolacion y resistencia contra awa. Ademas, e azeta pisa ta sink nan, mescos cu paña papa muha por sink un landado. . . . Ta un fuente di gran satisfaccion pa rescata algun parha, asta si e cantidad ta relativamente chikito.”

“Un Accidente Cu Por Sosode un Ora pa Otro”

Mundo ta depende riba combustibel pa haya energia, pero pa mantene e gastonan abou, hopi bes nan ta transporta esaki den barconan peligroso y mal manteni. Pesei The New York Times a describi e situacion ei como “un accidente cu por [a] sosode un ora pa otro.”

Prestige ta e di tres tanker cu a sink dilanti costa di Galicia den e ultimo 26 añanan. Rond di dies aña pasa, e barco Aegean Sea a sink banda di La Coruña den nort Galicia y 40.000 ton di crudo a bin resulta den lama. Ainda tin partinan grandi di e costa eibanda cu no a recupera. Y na 1976 e barco Urquiola a sink den e mesun lama, causando un derame desastroso di mas cu 100.000 ton di crudo.

En conexion cu e ultimo desaster, Union Europeo a dicidi di prohibi tur tanker di combustibel cu no tin un ‘casca’ dobel. Pero ta di wak ainda si e medida ei lo ta suficiente pa proteha e costa asota di Europa.

Tur cos ta mustra anto cu gobiernonan humano no por garantisa un mundo liber di contaminacion—sea di mancha di azeta, desperdicio venenoso of contaminacion atmosferico. Sinembargo, cristiannan ta anhela e tempo ora e Reino di Dios lo supervisa e transformacion di nos planeta den un paradijs cu nunca mas lo wordo contamina.—Isaias 11:1, 9; Revelacion 11:18.

Prestige a bai abou cu 50.000 ton di fuel oil

[Reconocemento]

AFP PHOTO/DOUANE FRANCAISE