Petrolio—Con Nos Ta Hay’e?

“LAGA tin lus.” Den siglo 19 na Merca, nan tawatin mester di un fuente nobo di lus artificial pa remplasa e incumbiniencianan di lus instabil cu tawata sende paga, esta, lus produci door di vet, azeta di bayena y otro substancianan. Kico tawata e solucion? Petrolio! Unda por a hay’e?

Na aña 1859, Edwin L. Drake, un conductor di trein pensiona, uzando un motor di stoom bieu, a bora un pos di 22 meter hundo y a haya e prome azeta crudo descubri serca di Titusville, Pennsylvania, Merca. Esei a marca principio di e era di petrolio. Segun cu petrolio a keda descubri den hopi parti di mundo, e tawatin gran impacto riba tereno economico y politico. El a resulta di ta e fuente di lus artificial di calidad halto cu mundo tawata spera ansiosamente riba dje.

No a tarda hopi cu cumpramento di tereno y boramento di pos pa loco tawata e actividad principal den e asina yama regionnan petrolero na Merca. Den e añanan ei tawata comun pa tende di hendenan cu diripiente a bira rico y di otronan cu despues a perde nan fortuna. Ta un ironia cu Edwin Drake, e homber cu a bora e prome pos na Pennsylvania, mes tawata un di esnan cu a perde tur cos.

Apesar di e aumento extraordinario den e industria petrolero na Pennsylvania, of podise net debi na esei, despues di poco tempo el a experencia su prome caida. Prijs di petrolio a cai di $20 pa bari te na 10 cen pa bari! Overproductie y transaccionnan riscante a pone prijs cai, y algun pos a agota rapidamente. Un luga cu specialmente ta recorda nos di e tempo ei ta Pithole City, Pennsylvania, cu awe ta un stad bandona. Den poco mas cu un aña y mei, e stad ei a ser estableci, a prospera y a ser bandona. E ups and downs nan ei ta algo cu lo a caracterisa e historia di petrolio.

Na 1870, John D. Rockefeller y algun socio a lanta Standard Oil Company. E compania aki a domina e mercado di kerosin te ora cu otro competidonan a aparece, specialmente e industria petrolero di Rusia. Un otro rival tawata Marcus Samuel, fundado di loke awe ta conoci como Koninklijke/Shell Groep. Ademas, como resultado di e ingeniosidad di e rumannan Nobel,a un empresa petrolero poderoso a keda estableci na Rusia cu petrolio cu nan tawata saca for di e camponan na Baku.

Esei tawata principio di e historia di un serie di empresa petrolero. Entre tanto, hende a forma aliansanan y organisacionnan pa evita e instabilidad di prijs y produccion cu tawatin na comienso. Un di nan ta e Organisacion di Paisnan Exportado di Petrolio (OPEP), kende su 11 miembronan colectivamente ta posee mayoria di e reservanan confirma di azeta crudo.—Wak e cuadro na pagina 7.

Cuanto Petrolio Tin Disponibel, y Unda E Ta?

Pa fin di siglo 19, e uzo general di electricidad lo por a nifica e bancarota di e empresanan petrolero. Sinembargo, un otro invento extraordinario a cambia e situacion drasticamente: motor den cua combustion ta tuma luga (verbrandingsmotor), uza principalmente den auto. Gasolin, un derivado di petrolio, tawata esencial awor pa vehiculonan cu tawata core sin tin cu wordo lastra. Ya pa fin di decada di 1920 nan tawata disponibel caba den mayoria nacion industrialisa. Awor hende tawatin mester di hopi mas tanto petrolio pa nan por a sigui move, pero unda lo a hay’e?

Segun cu tempo a pasa, petrolio su supremacia riba mercado mundial a ser reforsa door di descubrimento continuo di camponan nobo di petrolio den varios parti di mundo, na tur un 50.000 campo! Pero pa loke ta produccion, e factor importante no ta e cantidad di campo di petrolio cu nan descubri, sino nan tamaño. Con grandi e camponan aki ta?

Camponan di petrolio cu ta contene por lo menos cinco mil miyon bari di petrolio cu hende por saca y uza—yama campo supergigante—ta esnan mas grandi, mientras cu esnan na di dos luga (entre cincoshen miyon y cinco mil miyon bari) ta ser yama gigantenan di taya mundial. Aunke e lista di “Encuesta Geologico Mericano di Evaluacion di Petrolio Mundial 2000” ta menciona rond di 70 pais cu tin algun reserva di petrolio, ta solamente un par di nan tin camponan di petrolio gigante. (Wak e cuadro na pagina 7.) E cantidad mas grandi di campo di petrolio supergigante ta agrupa den e area den Golfo Persico y rond di e golfo, caminda tin e formacion di sedimento di e region Arabe-Iranes.

E buskeda pa fuentenan nobo di petrolio no a stop. Al contrario, el a haya sosten di tecnologia supermoderno. Actualmente e region di Lama Caspio, cu ta consisti di e nacionnan Azerbaiyan, Iran, Kazakhstan, Rusia, Turkmenistan y Uzbekistan, a capta e atencion di productornan di petrolio. Segun e Administracion di Informacion di Energia Mericano, e region aki tin un tremendo potencial pa explotacion di petrolio y gas natural. Tambe nan ta investigando rutanan alternativo pa exportacion, por ehempel via Afganistan. Nan a haya mas posibel camponan pa explotacion na Medio Oriente, Groenland y partinan di Africa. Pero e proceso di comberti hidrocarburo of petrolio cu nan descubri, den energia y articulonan di uzo diario ta un historia riba su mes.

Con Nan Ta Extrae Petrolio?

Geologonan y mididonan di tereno ta busca luganan caminda lo por tin azeta crudo atrapa bou di tera. Despues cu nan haci algun midimento spesifico y tuma muestra, nan ta bora pa confirma cu di berdad tin petrolio. Den cuminsamento, ora a bora y logra haya un campo di petrolio esei a nifica un baño di lodo y petrolio pa e hendenan. Consecuentemente, tur e petrolio cu inicialmente tawata spuit sali for di e pos tawata bai perdi y tambe tawatin e peliger cu un explosion por tuma luga. Sinembargo, awendia e mashinnan di bora ta evita cu esaki ta sosode door cu nan tin instrumentonan pa midi y valvenan special. Tambe ta posibel awor pa nan bora buraco mas chikito y mas hundo.

Cu tempo, e presion cu ta pone e petrolio y gas bin ariba ta baha, y mester mantene e presion door di inyecta awa, kimiconan, kooldioxide of otro gasnan, manera nitrogeno. Dependiendo di e area, petrolio por tin diferente grado di densidad. Ta claro cu productornan ta prefera petrolio liviano, ya cu ta mas facil pa obten’e y rafin’e.

Manera e Instituto Mericano di Petrolio ta splica, tecnologia moderno ta inclui boramento horizontal, cu ta ser haci casi paralelo cu e casca di tera, y esei ta reduci e cantidad di pos cu mester bora. Extraccion di petrolio dilanti costa, cu a cuminsa na 1947 den Golfo di Mexico, a contribui masha hopi na e aumento di produccion di petrolio. Ta claro cu e metodo cu nan uza pa extrae e petrolio tin un efecto direct riba e prijs di e producto final.b

Con Ta Transporta Petrolio?

Na 1863 na Pennsylvanilia, nan a traha tubonan di palo cu un diameter chikito pa transporta petrolio, ya cu esei tawata mas barata y menos molester compara cu e uzo di barinan di 42 galon (159 liter) transporta riba kitoki.c Awendia e red di tuberia a bira mas sofistica y mas hopi. Segun e Asociacion di Red di Tuberia di Petrolio, Merca so caba tin un red di 300.000 kilometer di tuberia di petrolio.

E red di tuberia ei, construi principalmente di metal, no solamente ta transporta crudo pa refinerianan sino tambe productonan final deriva di petrolio pa distribuidonan. Tecnologia moderno di tubo ta permiti nan uza sistemanan automatisa cu ta controla e fluho y presion. Tambe hende a desaroya e asina yama “pig” inteligente (aparatonan cu ta ser uza pa inspecciona centenares di kilometer di tubo). Tambe tin e sistema di inspecciona tubo yama Magnetic Flux Leakage y esun ultrasonico. Sinembargo, tur loke e consumido comun di e productonan final probablemente lo mira ta un borchi cu ta indica cu bou di tera tin un tubo di petrolio ta pasa y e spiertamento pa no coba na e sitio ei.

Pa util cu e red di tuberia ta, e no ta practico pa transporta cantidad grandi di petrolio pa otro banda di lama. Pero e empresarionan di antes a haya un solucion pa esei tambe: tankernan inmenso di petrolio. Esakinan ta barconan specialmente diseña cu por ta te 400 meter largo. Tankernan ta e barconan mas grandi cu ta nabega oceano y nan por carga un miyon of mas bari di petrolio. Desafortunadamente, pa poderoso cu nan ta parce, tankernan tin un debilidad cu hende no a vence, manera e cuadro “Derame di Petrolio” ta mustra. Barconan plat y wagon di trein tambe ta medionan comun pa transporta petrolio na gran cantidad. No obstante, den petrolio su biahe for di pos pa consumido, transportacion ta solamente mitar di e historia.

Un vlam chikito saliendo for di un schoorsteen halto—cu ta actua como un valve di siguridad—ta un bon indicacion cu bo ta mirando un refineria di petrolio. Basicamente, den e facilidadnan inmenso aki di refinacion, nan ta keinta azeta crudo y mand’e den un toren di destilacion atmosferico, caminda e ta ser dividi den varios fraccion of componente. E fraccionnan aki ta varia for di esnan mas liviano—gasnan, manera butano—te na esnan mas pisa, manera entre otro grease. (Wak pagina 8-9.) Pero toch e pregunta ta keda: Petrolio ta un bendicion y a la bes un maldicion?

[Nota]

[Cuadro/Plachi na pagina 5]

BARI OF TONELADA?

E prome companianan petrolero di Pennsylvania tawata transporta petrolio den barinan di biña di 48 galon (180 liter). Pero cu tempo nan tawata pone solamente 42 galon di petrolio den e bari pa asina e no plama durante cargamento. Te awe ainda nan ta uza bari (42 galon) den comercio di petrolio.

For di comienso nan tawata transporta petrolio pa Europa via lama y por lo general nan tawata midie na peso, na tonelada, manera ta e practica te awe.

[Reconocemento]

Fuente: Instituto Mericano di Petrolio

[Cuadro na pagina 6]

CON PETROLIO A FORMA?

E opinion cu tawata predomina entre mayoria cientifico desde 1870 ta wordo yama e teoria biogenic, es decir, cu petrolio a origina di actividad biologico of di organismonan bibiente. Segun e teoria aki, “desperdicio biologico dera den sedimento ta putri bira azeta crudo y gas natural atrabes di un periodo largo di tempo, y e petrolio aki e ora ei ta cuminsa consentra den e buraconan chikito di barancanan di sedimento cu tin den e capanan mas ariba di e casca [di planeta Tera].” E proceso aki ta produci petrolio, cua su componente principal ta hidrocarburo, esta, hidrogeno (waterstof) y carbon. Sinembargo, for di decada di 1970 tin algun cientifico cu tempo tempo a cuestiona e teoria aki.

Den e edicion di 20 di augustus 2002, di e revista Proceedings of the National Academy of Sciences, nan a publica e articulo “E Genesis di Hidrocarburo y e Origen di Petrolio.” E autornan ta argumenta cu e origen di petrolio natural mester ta tuma luga na profundidadnan cu ta “te abou den e parti central di e Tera” y no na e profundidadnan menos hundo cu generalmente ta ser acepta.

Fisico Thomas Gold a presenta algun teoria controversial y ta splica su motibonan detayadamente den su buki The Deep Hot Biosphere—The Myth of Fossil Fuels (E Biosfera Profundo y Cayente—E Mito di Combustibel di Fossiel). El a skirbi: “Merca y gran parti di Europa tawata asina na fabor di e teoria di e origen biologico di hidrocarburonan, cu esei de echo a stop tur investigacion y debate riba e punto di bista contrario. Esaki no tawata e caso den paisnan di ex Union Sovietico.” Esei tawata “probablemente pasobra Mendeleyev, e kimico Ruso altamente respeta, a apoya e punto di bista abiogenic [di origen cu no ta biologico]. E argumentonan cu el a presenta ta asta mas fuerte awe, considerando e informacion hopi mas amplio cu nos tin awor.” Kico ta e punto di bista abiogenic?

Gold a declara: “E teoria abiogenic ta bisa cu hidrocarburonan tawata un componente di e material cu a forma e tera, mediante acumulacion gradual di substancianan solido, un 4,5 mil miyon aña pasa.” Segun e teoria aki, e elementonan di petrolio tawata profundamente den tera desde formacion di e tera.d

[Nota]

[Cuadro/Plachi na pagina 10, 11]

DERAME DI PETROLIO

◼ E cantidad total di petrolio cu a basha for di tanker entre aña 1970 y 2000 ta 5.322.000 tonelada

◼ E derame mas grandi di petrolio a tuma luga na 1979 ora cu e tanker Atlantic Empress a dal den Aegean Captain den Caribe, resultando den un derame di 287.000 tonelada di petrolio

◼ E caso di Exxon Valdez tawata solamente e di 34 derame mas grandi di petrolio for di tanker

◼ Aunke mayoria derame di tanker ta tuma luga ora nan ta carga, descarga y yena combustibel, e deramenan di mas grandi ta pasobra nan ta dal den otro barco of pega riba baranca

◼ Algun derame grandi cu no tawata causa door di tanker:

● Erupcion di e pos di exploracion Ixtoc I na 1979, den Golfo di Mexico. Total di e derame: 500.000.000 liter

● Erupcion di un plataforma den un pos den Golfo Persico na 1983. Total di e derame: 300.000.000 liter

● Derame ocasiona deliberadamente na 1991, den Golfo Persico. Total di derame: 900.000.000 liter

[Plachi]

Tanker “Erika” ta sink serca di Punto Penmarch, Francia, 13 di december 1999

[Reconocemento]

Fuente: International Tanker Owners Pollution Federation Limited, “Oil Spill Intelligence Report”, “The Encarta Encyclopedia”

© La Marine Nationale, France

[Diagram/Plachinan na pagina 8, 9]

(Pa e texto den su formato completo, wak e publicacion)

PRODUCCION DI PETROLIO—SIMPLIFICA

1—EXPLORACION

SATELLITE

E Sistema di Posicion Global (GPS) ta percura señalnan exacto cu ta ser uza pa localisa y marca tereno

GEOFON (PA DETECTA VIBRACION)

TRUCK DI VIBRACION

HIDROFON (PA DETECTA ZONIDO BOU DI AWA)

BARCO SISMICO

Midimento sismico, un di e metodonan uza, ta registra e refleho bou di tera di onda di zonido genera artificialmente

2—EXTRACCION

POS RIBA TERA

PLATAFORMA DILANTI COSTA

POS BOU DI AWA

Metodonan pa extrae azeta crudo ta inclui uzo di posnan di petrolio riba tera, dilanti costa y bou di awa. Nan sa inyecta sea gas of awa den e posnan pa mantene e presion den nan

[Plachi]

POS DI PETROLIO BOU DI AWA

Hende ta uza submarino maneha via remote control pa construi facilidadnan di produccion den fondo di lama

[Plachi]

BORAMENTO HORIZONTAL

Motornan cu un ingeniero ta dirigi via remote control ta drei e cabes di boor, y tin censor cu ta detecta e caracteristica di e baranca

3—TRANSPORTACION

RED DI TUBERIA

TANKER

Pa transporta petrolio ta uza red di tuberia riba tera, bou di tera y den lama. Otro forma di transporte ta inclui tanker, barco plat y wagon di trein

4—REFINACION

REFINERIA

Azeta crudo ta ser keinta, destila y dividi den fraccionnan cu por ser uza pa traha productonan comun y coriente

TOREN DI DESTILACION

Ora keinta azeta crudo diki y preto den forno hopi cayente, e hidrocarburonan ta bira gas. E gas ta condensa bek bira likido na diferente temperatura. Di e manera ei ta dividi e azeta den su varios fraccion- of componentenan

20°C. → GASNAN DI REFINERIA Esakinan ta inclui metano, etano, propano, butano

↑ ↑

↑ ↑

↑ ↑

↑ ↑

↑ ↑

CATALYTIC CRACKER

E hidrocarburonan ta ser keinta cu stoom, y mescla cu e catalisado cayente, esta, un gel den forma di puiro di aluminiumoxide y siliciumdioxide. E proceso aki ta kibra of krak (crack) e hidrocarburonan den moleculenan mas chikito y mas util

Catalisado na puiro ta mescla cu hidrocarburo den stoom

↓ ↓ ↓

ETANOL PLESTIK AGREGACION NA GASOLIN

[Reconocemento]

Potret pa Cortesia di Phillips Petroleum Company

[Grafiek na pagina 7]

(Pa e texto den su formato completo, wak e publicacion)

FUENTENAN PRINCIPAL DI PETROLIO

Cantidad total ta na mil miyon bari. Esaki no ta inclui fuentenan cu no a ser descubri

▪ Miembro di OPEP

• Pais cu tin un of mas campo di petrolio supergigante

Produccion acumula

◆ Reservanan

▪ • ◆ 332,7 SAUDI ARABIA

• ◆ 216,5 ESTADOS UNIDOS

• ◆ 192,6 RUSIA

▪ • ◆ 135,9 IRAN

▪ • ◆ 130,6 VENEZUELA

▪ • ◆ 125,1 KUWAIT

▪ • ◆ 122,8 IRAK

▪ • ◆ 113,3 EMIRATONAN ARABE UNI

• ◆ 70,9 MEXICO

• ◆ 42,9 CHINA

▪ • ◆ 41,9 LIBIA

▪ ◆ 33,4 NIGERIA

◆ 21,2 CANADA

▪ ◆ 21,0 INDONESIA

◆ 20,5 KAZAKHSTAN

▪ • ◆ 18,3 ALGERIA

◆ 17,6 NORWEGA

◆ 16,9 GRAN BRETANIA

[Plachinan na pagina 4]

Prome pos di azeta crudo, Titusville, Pennsylvania, 1859

Petrolio ta spuit sali for di un pos na Texas

[Reconocemento]

Brown Brothers

[Plachi na pagina 5]

Un di e prome camponan di petrolio, Beaumont, Texas

[Plachi na pagina 5]

Kitoki transportando bari di petrolio

[Plachi na pagina 10]

Pos di petrolio na candela na Kuwait

[Reconocemento pa Potret na pagina 5]

Tur potret: Brown Brothers