Petrolio—Un Bendicion y un Maldicion?
TE NA ki grado nacionnan industrialisa ta depende di petrolio y su derivadonan? Petrolio—y gas natural—ta esencial pa nan, y esaki a crea un “Sosiedad Hidrocarburo”, manera Daniel Yergin a declara den su buki The Prize (E Premio). Pensa por ehempel riba combustibel pa sende verwarming, grease, wax, asfalt, y e cosnan traha di kimiconan deriva di petrolio: avion, auto, boto, lijm, ferf, paña di poliester, kets, co’i hunga, tiña, aspirin, deodorante, make-up, disco, computer, television, telefon. Tur dia hopi hende ta uza un cantidad di e mas cu 4.000 producto- of articulonan deriva di petrolio cu tin un gran influencia riba bida moderno. Pero kico di e daño na e ecosistema di e tera, algo cu a caracterisa e historia di petrolio for di su principio?
Un Rei Cu “No Ta Goberna cu Bondad”
Na fin di 1940, ora cu un guera entre Rumania y Hungria tawata parce inminente, e dictado Nazi Adolf Hitler a actua lihe como arbitro. Esei tawata un gesto di buena boluntad? Loke Hitler realmente kier a evita tawata pa posnan di petrolio di Rumania cai bou di control di Union Sovietico. Petrolio tawata tambe un motibo principal cu Irak a invadi Kuwait na 1990 y cu otro nacionnan a tuma parti den e contra atake. Anto esakinan sigur no ta casonan isola. E deseo pa haya control riba petrolio tawata masha hopi biaha e causa di conflicto y sufrimento.
Petrolio no solamente ta esencial pa bida moderno, sino tambe ta e cuestion central den asuntonan politico y e interes special di algun hende poderoso. Manera e Organisacion di Paisnan Exportado di Petrolio (OPEP) a declara resientemente, petrolio no ta un producto comun y coriente, sino “un recurso strategico.” E nacionnan a uza petrolio como un palanca pa haya bentaha politico, door di establece embargo- y sancionnan. Ademas, posnan di petrolio, refinerianan y tankernan tawata e blanco di atake terorista, causando hopi bes daño teribel na medioambiente.
E industria petrolero a ser acusa di ta aumenta e daño na medioambiente door cu nan plantanan ta saca kooldioxide, locual kisas ta contribui na cambionan mundial den clima. Segun un informe di PEMEX (Petroleos Mexicanos), un di e empresanan petrolero mas grandi na mundo, contaminantenan ta drenta medioambiente durante varios fase di procesa petrolio. Aunke awor gasolin ta causa menos contaminacion, toch hopi hende ta haya cu masha tiki cos a cambia despues di casi seis aña di e Protocol di Kyoto. E tempo ei 161 nacion a reuni na Hapon pa tuma medidanan pa reduci e menasa di e clima mundial cu ta birando mas cayente. Di otro banda, OPEP ta bisa cu “ta petrolio ta crea e rikesa y prosperidad” cu hopi pais ta disfruta di dje awe. Pero ta semper esaki ta e caso?
Tin hende ta señala e daño cu boramento di posnan di petrolio y di construccion di red di tuberia ta causa. Otro hende kisas ta hala atencion na e aumento di desempleo na Saudi Arabia, e pais cu tin mas tanto reserva di petrolio na mundo. Alí Rodríguez Araque, presidente di OPEP, a bisa: “E gobiernonan di e nacionnan industrialisa ta probechando enormemente di e sacrificionan cu nan ta exigi di productor, rafinado y consumido.”
CorpWatch, un organisacion cu ta wak pa corporacionnan cumpli cu cuestionnan manera husticia ambiental y duna cuenta pa nan echonan, a declara: “Ainda petrolio ta rei. Pero e no ta goberna cu bondad.”
Kico lo ta e futuro pa petrolio?