For di Nos Lectornan

Comunicacion Mi tin cu skirbi boso tocante e serie di articulo “Comunicacion Ta Vital pa Bida.” (8 di october 2003) Nan a describi e patronchi cu bo por mira den henter creacion—criaturanan ta yuda otro. Asta mata ta manda señal pa spierta otro pa bestia cu ta come nan! Lo ta maraviyoso ora cu hende tambe siña yuda otro.

C. C., Merca

Mi a gusta masha hopi e descripcion cu boso a duna di e manera cu bestia ta comunica cu otro. Nos no por yega na ningun otro conclusion cu no ta esaki: tin un Dios cu ta e fuente di tur e cosnan maraviyoso aki.

R. Z., Alemania

Mi no tin palabra pa expresa e goso cu mi a sinti segun cu mi a lesa e articulonan ei. Ki un privilegio increibel nos tin di por comunica cu Dios!

A. W., Sur Africa

Awemainta ora cu mi a cuminsa lesa e articulo mi tawata hopi down. Pero mi mester a hari ora mi a lesa e informacion tocante e manera cu insectonan ta comunica cu otro! Mi a sali bai trabou cu un sonrisa riba mi cara.

L. L., Francia

Tatu Masha danki pa e articulo “Hobennan Sa Puntra . . . Mi Mester Pone Tatu?” (8 di october 2003) Ami tawata echt pensa cu tatu ta great y mi kier a plak un tatu temporal. Sinembargo, e declaracion cu nos lo no kier marca nos curpa “ni sikiera temporalmente” cu cosnan cu ta deshonra Dios, a dal mi duro. Ora mi a pensa con un tatu lo por pone otro hende trompica y por laga nan mira mi como rebelde, mi a dicidi pa no hacie.

A. K., Japon

Mi tawatin hopi gana di pone un tatu. Pero e articulo aki a yuda mi realisa cu podise lo mi bai lamenta esei despues. Tambe boso a menciona e peligernan pa salu, locual ta algo cu mi no a pensa ariba. Masha danki pa un articulo asina combencente.

D. T., Francia

Piñata Mi a lesa cu interes e articulo “Piñata—Un Tradicion Bieu.” (8 di october 2003) Despues di a les’e, mi a keda cu algun pregunta. Piñata su conexion cu religion falso ta bon documenta. Pero e articulo ta manera indica cu tanten cu uzo di piñata no ta molestia un hende su consenshi, e por dal bai cu ne numa. Ta mescos ta conta pa cumpleaño y dianan di fiesta manera Pasco?

S. W., Merca

“Spierta!” ta contesta: Cristiannan ta rechasa cualkier celebracion of custumber cu actualmente ta conecta cu creencianan religioso falso of cu actividadnan cu ta viola principionan biblico. Por ehempel, Bijbel definitivamente ta considera celebracion di cumpleaño como inaceptabel. (Genesis 40:20; Mateo 14:6-10) Sinembargo, si ta masha cla cu un custumber actualmente no tin ningun nificacion religioso falso conecta cu ne y no ta viola principionan biblico, ta keda na cada cristian pa dicidi personalmente si lo e sigui tal custumber.

Moda Mi kier expresa mi aprecio pa e serie di articulo “Bo Ta Catibo di Moda?” (8 di september 2003) Como teenager, mi ta sinti e presion di mundo pa cumpra loke ta e ultimo moda y pa mantene e figura “perfecto.” Pero e articulonan aki a yuda mi cambia mi manera di cumpra cos y pa bisti mas modera.

M. B., Merca

Mi tin dies aña, y mi juffrouw di scol a pidi nos trece informacion tocante moda. Mi a bai cu un copia di e articulo “E Banda Scur di Encanto Fisico.” Juffrouw a saca copia di e articulo pa henter klas!

G., Belgica