Awa A Caba Cu Un Mundo—E Cos Ei Lo Bolbe Sosode?

BO A yega di tende hende papia di fin di mundo?— Tin hopi hende ta papia di e cos ei awendia. Tin hende ta kere cu mundo ta bai caba door di un guera cu bom nuclear. Bo ta kere cu un dia Dios ta bai laga hende caba cu nos bunita tera?—

Manera nos a siña, Bijbel ta bisa cu lo tin un fin di mundo. E ta bisa: “E mundo ta pasa bai.” (1 Huan 2:17) Abo ta kere cu fin di mundo kiermen cu tera lo no existi mas?— No, Bijbel ta bisa cu Dios a traha tera “pa e wordo habita.” (Isaias 45:18) Si, el a trah’e pa hende biba ariba y gosa di dje. Salmo 37:29 ta bisa: “E hustonan lo hereda e tera, y lo biba den dje pa semper.” Ta pesei Bijbel ta bisa tambe cu tera lo keda pa semper.—Salmo 104:5; Eclesiastes 1:4.

Pero si fin di mundo no kiermen cu e tera aki no ta bai existi mas, ta kico e kiermen anto?— Nos por haya sa si nos paga bon tino na loke a pasa den tempo di Noe. Bijbel ta bisa: “E mundo di e tempo ei a wordo destrui, siendo inunda [of, tapa] cu awa.”—2 Pedro 3:6.

Tin hende cu a scapa e fin di e mundo ei, e gran Dilubio den tempo di Noe?— Bijbel ta bisa cu Dios a ‘scapa Noe, un predicado di husticia, hunto cu shete otro hende mas, ora cu el a trece un dilubio riba e mundo di mal hende.’—2 Pedro 2:5.

Pero ta cua mundo a caba anto? Tera, of e mal hendenan?— Bijbel ta bisa cu ta e ‘mundo di mal hende’ a caba. Anto wak: E ta bisa cu Noe tawata “un predicado.” Kico bo ta kere cu Noe a predica?— El a spierta hende tocante e fin di “e mundo di e tempo ei.”

Ora Hesus a papia di e gran Dilubio, el a conta su disipelnan kico e hendenan tawata haciendo net prome cu e fin a yega. Esaki ta loke el a bisa nan: “Den e dianan ei cu tawata prome cu e dilubio, nan tawata come y bebe, nan tawata casa y duna pa casa, te dia cu Noe a bai den e arca, y nan no a compronde [“haci caso”, NW] te ora cu e dilubio a bini y a bai cu nan tur.” E ora ei Hesus a bisa cu prome cu e mundo aki caba, hende lo ta haciendo mescos.—Mateo 24:37-39.

Loke Hesus a bisa ta laga nos compronde cu nos por siña un les for di e cosnan cu e hendenan tawata haci prome cu e Dilubio. Den Capitulo 10 di e buki aki nos a lesa kico nan tawata haci. Bo ta corda ta kico?— Tawatin homber abusado, y nan tawata haci cos violento. Pero Hesus a bisa cu tawatin hopi otro hende cu gewoon no a scucha ora Dios a manda Noe predica na nan.

Awel, un dia Yehova a bisa Noe cu E ta bai manda un dilubio pa caba cu e mal hendenan. Awa tawata bai tapa tera full; asta e seronan lo a tapa. Yehova a bisa Noe pa e traha un arca grandi, un cos manera un caha grandi y largo. Bo por wak e riba e plachi na pagina 238.

Dios a bisa Noe traha un arca suficiente grandi pa Noe, su famia y yen di bestia por a bai aden, pa nada no pasa nan. Noe cu su famia a traha hopi duro riba dje. Nan a kap palo grandi, anto nan a cuminsa traha e arca cu nan. Nan a tarda hopi, hopi aña pa caba e arca, pasobra e tawata masha grandi mes.

Bo ta corda kico mas Noe a haci tur e añanan cu e tawata trahando e arca?— El a predica. El a spierta hende cu un Dilubio ta bin. Tawatin hende cu a haci caso di Noe? No, ningun hende. Su famia so. E otro hendenan tawata mucho druk haciendo otro cos. Bo ta corda kico Hesus a bisa cu nan tawata haci?— Nan tawata come, bebe y casa, y nan tawata laga e cosnan aki tuma tur nan tempo. Nan no a haya cu nan ta dje malo ei, y nan no a tuma tempo pa scucha Noe. Awel, ban wak kico a pasa cu nan.

Despues cu Noe y su famia a bai den e arca, Yehova a sera e porta. Ainda e hendenan pafo di e arca no a kere cu e Dilubio ta bin. Ma diripiente awa a cuminsa cai for di shelo! E no tawata un gewoon awasero. Basha awa tawata basha! Prome cu nan kier sa, e awa a cuminsa core manera riu grandi y haci hopi boroto. Awa tawata tumba palo grandi y lastra baranca bai cu ne manera piedra chikito. Anto kico a pasa cu e hendenan cu tawata pafo di e arca?— Hesus a bisa: “E dilubio a bin y a bai cu nan tur.” Tur hende pafo di e arca a muri. Dicon?— Hesus mes a bisa cu nan no a “compronde”, y esei ta pasobra nan no a haci caso. Nan no kier a tende!—Mateo 24:39; Genesis 6:5-7.

Pero corda esaki: Hesus a bisa cu loke a pasa e hendenan ei ta un les pa nos cu ta biba awendia. Ki les nos por saca?— Wel, no ta door cu nan tawata mal hende so e hendenan ei a bai destrui. Hopi di nan a bai destrui door cu nan tawata gewoon mucho druk pa nan tuma tempo pa siña tocante Dios y tocante loke e tawata bai haci. Nos mester paga bon tino pa nos no ta manera nan, bo no ta haya?—

Bo ta kere cu Dios lo bolbe caba cu mundo door di un dilubio?— No, Dios a priminti cu e no ta hacie. El a bisa: “Mi ta pone mi regenboog den e nubianan, y esaki lo ta un señal.” Yehova a bisa cu e regenboog ta un señal di cu “nunca mas e awa lo no bira un dilubio pa destrui tur carni.”—Genesis 9:11-17.

Kiermen, nos por tin sigur cu nunca mas Dios lo no bolbe caba cu mundo door di un dilubio. Pero manera nos a mira, Bijbel ta bisa cu lo bin un fin di mundo si. Ken Dios ta bai scapa ora e caba cu e mundo aki?— E ta bai scapa hende cu ta asina interesa den otro cos, cu nunca nan no kier siña tocante Dios? E ta bai scapa hende cu tur ora ta mucho druk pa studia Bijbel? Kico bo ta kere?—

Nos si kier ta un di e hendenan cu Dios ta bai scapa. Of no?— Bo no ta kere cu lo ta hopi dushi si nos famia por ta manera e famia di Noe, anto Dios scapa nos tur?— Pa nos scapa fin di mundo, nos mester compronde ta con Dios ta bai caba cu ne y bin cu su mundo nobo di husticia. Laga nos wak con e ta bai hacie.

Bijbel ta bisa nos con, na Daniel capitulo 2, versiculo 44. E texto aki ta papia di nos tempo, y e ta bisa: “Den e dianan di e reinan ei e Dios di shelo lo lanta un reino [un gobierno] cu nunca lo no wordo destrui, y e reino ei lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.”

Bo a compronde loke e texto ta bisa?— Bijbel ta bisa cu e gobierno di Dios ta bai caba cu tur gobierno na tera. Dicon?— Door cu nan no ta obedece Esun cu Dios a haci Rei. Anto ta ken esei ta?— Si, Hesucristo!

Yehova Dios tin derecho di dicidi ta ki sorto di gobierno ta bai goberna, y el a scohe su Yiu Hesus pa bira Rei. Pronto Hesucristo, e Gobernante cu Dios a scohe, lo dirigi Dios su angelnan pa caba cu tur gobierno di e mundo aki. Na Revelacion capitulo 19, versiculo 11 pa 16, Bijbel ta conta nos con e ta bai hacie. E plachi aki ta mustra nos loke e texto ei ta bisa. Bijbel ta yama e guera di Dios pa caba cu tur gobierno di mundo “Armagedon.”

Dios ta bisa cu su Reino ta bai caba cu e gobiernonan di hende. Pero, ta nos e ta manda pa caba cu e gobierno nan?— No, Bijbel ta bisa cu Armagedon ta “e guera di e gran dia di Dios Todopoderoso.” (Revelacion 16:14, 16) Si, Armagedon ta e guera di Dios, y e ta uza Hesucristo pa guia su ehersito di angel den shelo pa bringa. E guera di Armagedon ta serca? Ban wak con nos por haya sa.