Ora un Calamidad Tuma Luga

“Na prome instante nos tabata sinti nos echt desespera. Inundacion y avalancha di lodo a destrui tur loke nos tabatin.” —Andrew, Sierra Leone.

“Ora nos a bay cas bek despues di e horcan, nada no a keda. Nos a keda boca habri. Mi yiu muher a sak den otro y a cuminsa yora.” —David, Islanan Virgenes.

ABO a yega di pasa den algo asina? Si esey ta e caso, sin duda bo ta compronde kico sobrevivientenan di un calamidad ta pasa aden: shock, confusion, ansiedad, pesadiya y dificultad pa acepta loke a sosode. Hopi victima ta sinti nan asina desanima y cansa cu nan ta sinti cu bida no tin sentido mas.

Si bo a perde tur cos den un calamidad, kisas bo tambe ta sinti cu bo no por mas. Bo por cuminsa sinti cu no ta bale la pena pa sigui biba. Pero Bijbel si ta siña cu ta bale la pena pa sigui biba y cu tin bon motibo pa confia den un mihor futuro.

E PROMESANAN DI BIJBEL TA DUNA NOS SPERANSA

Eclesiastes 7:8 ta bisa: “Fin di un asunto ta mihor cu su principio.” Si bo a bira victima di un calamidad y bo tin cu cuminsa di nobo, kisas bo ta sinti cu nunca mas bo bida lo bira normal bek. Pero cu pasenshi y esfuerso, bo situacion por mehora.

Bijbel ta predeci cu e tempo lo yega cu “e zonido di yoramento lo no wordo tendi mas.” (Isaias 65:19) E palabranan aki lo cumpli ora e Reino di Dios comberti Tera den un paradijs. (Salmo 37:11, 29) Nunca mas calamidad lo tuma luga. Y tur e mal recuerdonan y e dolor fisico lo disparce pa semper, pasobra e Dios Todopoderoso ta priminti: “E cosnan di antes lo no wordo recorda mas ni bin na memoria.”—Isaias 65:17.

Pensa riba esaki: Nos Creador a haci tur loke ta necesario pa nos por tin “un futuro y un speransa”, esta pa nos por biba na paz bou di su gobierno perfecto. (Jeremias 29:11) Bo ta kere cu e speransa aki por duna bo motibo pa biba? Sally, kende nos a menciona den e prome articulo, a bisa: “Ora bo pensa riba tur e cosnan maraviyoso cu e Reino di Dios ta bay haci den futuro, esey por yuda bo pa stop di pensa riba pasado y focus riba presente.”

Lo bo kier haya sa kico mas e Reino di Dios lo haci pronto? Nos ta anima bo pa busca mas informacion tocante e topico ey. Pasobra si bo haci esey, lo bo mira cu ta bale la pena pa biba a pesar di loke bo a sufri y cu pronto ningun calamidad lo sosode mas. Mientrastanto, Bijbel su consehonan practico por yuda bo deal cu bo situacion. Laga nos wak algun ehempel.

Texto di Bijbel Cu Ta Duna Bon Conseho

Drumi suficiente.

“Un man yen di sosiego ta mihor cu dos mokete yen di trabou y coremento tras di biento.”—Eclesiastes 4:6.

Segun algun investigador, “si bo drumi poco y malo, ... esey por empeora e sintomanan causa pa un experencia traumatico y lo ta mas dificil pa bo mantene bo balansa emocional.” Pesey lo ta bon pa drumi suficiente.

Desahoga bo mes.

“Ansha den curason di hende ta hacie abati [of “deprimí”, BPK], ma un bon palabra ta hacie contento.”—Proverbionan 12:25.

Papia cu un famia of amigo cu bo ta confia. Nan lo por scucha bo, anima bo y duna bo bon conseho.a

Pensa riba e tempo ora cu cos lo mehora.

“Segun [Dios] su promesa nos ta spera cielo nobo y un Tera nobo, y den esakinan husticia lo biba.”—2 Pedro 3:13.

a Lo ta bon pa un hende cu ta sufri di stress of di ansiedad grave pa un tempo mucho largo bay cerca su dokter.