Uza e Foyeto Kico Nos Por Siña for di e Palabra di Dios? pa Cuminsa Combersacion
1. Cua foyeto nobo nos tin pa yuda nos den sirbishi?
1 Parti dilanti di e edicion revisa di e New World Translation tin un seccion cu tin 20 pregunta. Nos a haya e seccion aki na Papiamento den forma di e foyeto: Kico Nos Por Siña for di e Palabra di Dios? Con nos por uza e foyeto aki ora nos ta prepara presentacion pa sirbishi? Mirando cu e ta agrupa texto di Bijbel bou di varios tema, mescos cu e buki Razonamiento, e foyeto por ta util pa cuminsa combersacion.
2. Con nos por uza e foyeto Kico Nos Por Siña for di e Palabra di Dios? den sirbishi?
2 Por ehempel, si nos uza pregunta 8 nos por bisa: “Segun cu nos ta papia cu varios hende nos a ripara cu hopi ta puntra nan mes: ‘Ta Dios ta pone hende sufri?’ [Den algun teritorio ta mihor pa mustra e persona e pregunta.] Kico abo ta pensa? [Permiti e persona contesta.] Bijbel ta duna nos un contesta satisfactorio tocante esey.” Lesa un of mas di e textonan cita for di Bijbel y trata nan. Si e persona mustra interes bo por mustr’e e lista di e 20 preguntanan na e prome pagina y pidie scoge un di nan pa trata na e siguiente bishita. Of bo por ofrec’e un di nos publicacionnan di estudio cu tin mas informacion tocante e tema cu boso a trata.
3. Con nos por uza e foyeto Kico Nos Por Siña for di e Palabra di Dios? pa cuminsa combersacion den teritorio unda tin hende cu ta pertenece na un religion cu no ta cristian?
3 E preguntanan 4 y 13 te cu 17 por ta di gran yudansa ora nos ta predica den teritorio unda tin hende cu ta pertenece na un religion cu no ta cristian. Por ehempel, bo por uza e informacion relaciona cu pregunta 17 y bisa: “Awe nos bishita ta pa yuda famianan. Bo ta di acuerdo cu famia awendia ta enfrenta mas y mas problema? [Permiti e persona contesta.] Hopi pareha a haya cu e siguiente conseho a yuda nan bon: ‘E esposa mester tin respet profundo pa su esposo.’ [No tin nodi bisa cu e palabranan aki ta di Efesionan 5:33. Si ta cu un hende muher bo ta papia bo por menciona e palabranan di Efesionan 5:28.] Bo ta kere cu ta bale la pena pa parehanan aplica e conseho ey?”
4. Kico bo por haci na final di bo combersacion cu un persona cu ta pertenece na un religion cu no ta cristian?
4 Na final di bo combersacion, traha un afspraak pa sigui papia di e tema. Na e siguiente bishita kisas bo por papia tocante un di e otro textonan di Bijbel cu tin bou di e pregunta cu bo a trata. Ora bo ta sinti cu ta apropia, laga e persona sa cu e palabranan cu bo a comparti cu ne ta di Bijbel. A base di bo combersacionnan anterior y e manera cu e persona ta mira Bijbel, ofrec’e un publicacion cu bo ta pensa cu por interes’e.—Wak e suplemento den Nos Ministerio di Reino di december 2013.