Yuda Hende Cu No Ta Cla pa Studia e Buki Bijbel Ta Siña

1. Dicon na prome instante algun hende no ta acepta e buki Bijbel Ta Siña?

¹ Pa un hende por bira un sirbidor di Jehova, e tin cu haya sa kico Bijbel ta siña. Pero, tin hende ta pertenece na un religion no cristian y no ta mira Bijbel como e Palabra di Dios. Otronan no ta kere den Dios mes y no ta mira Bijbel como un buki sagrado. Tin publicacion cu nos por uza pa yuda hende cu na prome instante no kier acepta e buki Bijbel Ta Siña? Wel, e siguiente sugerencianan ta basa riba declaracionnan cu nos a ricibi di publicadornan for di 20 pais.

2. Kico nos tin cu purba di haya sa si un hende bisa nos cu e no ta kere den Dios, y dicon?

² Hende Cu No Ta Kere den Dios: Si un hende bisa cu e no ta kere den Dios, lo ta bon pa haya sa e motibo. Ta den evolucion e ta kere? Ta e inhusticia cu tin den mundo of e hipocresia cu tin den religion a pon’e stop di kere den Dios? Ta di un pais caminda hende no ta kere den Dios e ta? Kisas e no ta keda insisti cu Dios no ta existi, pero nunca e no a sinti e necesidad pa kere den dje tampoco. Hopi publicador ta haya cu si bo puntra e hende “Semper bo a pensa asina?” esaki ta habri caminda p’e expresa su mes. Scuch’e sin interumpie. Ta ora nos compronde e motibo pakico e no ta kere den Dios, nos lo sa kico pa bis’e y ki publicacion pa ofrec’e.​—⁠Prov. 18:⁠13.

3. Con nos por demostra cu nos ta respeta hende y nan creencianan?

³ Tene cuidou pa loke nos ta bisa hende no pone nan sinti cu nos ta ataca nan punto di bista. E siguiente sugerencia a bin for di e sucursal di Merca: “Ta masha importante pa respeta e libertad cu cada hende tin pa scoge den kico e ta kere. En bes di purba di gana e discusion, ta mihor pa haci e hende pregunta cu ta lag’e pensa y yega na su mes conclusion.” Un superintendente di circuito ta conta cu e tin e custumber di laga e doño di cas expresa su mes mientras cu e ta scucha. Y despues di scuch’e e ta puntr’e: “Bo a yega di pensa riba e siguiente posibilidad?”

4. Con nos por yuda un budista?

⁴ E idea cu tin un Dios ta algo desconoci pa hopi budista. Algun publicador na Gran Britania ta gusta uza e foyeto Cómo hallar paz y felicidad duraderas ora nan ta predica na e hendenan ey. Despues di trata e introduccion, nan ta analisa e seccion “¿Existe un Creador todopoderoso?” anto despues e seccion “Una guía para toda la humanidad.” Cu tempo, nan por ofrece e buki Bijbel Ta Siña y bisa e hende: “Hasta si bo no ta kere den Dios, un estudio di Bijbel lo ta bon pasobra e tin hopi conseho practico.” Un pionero na Merca cu ta sirbi den e campo Chines a bisa: “Hopi Chines den nos teritorio ta gusta lesa. Pues hopi bes nan ta lesa henter e publicacion prome cu nos bay bek cerca nan. Pero kisas nan no ta compronde e idea di un estudio di Bijbel. Pesey, na e prome bishita mi ta prefera di ofrece e foyeto Bon Noticia, pasobra e ta skirbi na un manera cu ta anima hende pa combersa.” Un superintendente di circuito na Merca cu ta sirbi den un circuito di e idioma Chines ta bisa cu bo por introduci e buki Bijbel Ta Siña for di e prome bishita. Pero, en bes di cuminsa na capitulo 1, cu ta papia tocante Dios, lo ta mihor pa cuminsa na capitulo 2, pa laga e hende cera conoci cu Bijbel.

5. Dicon nos mester tin pasenshi?

⁵ Pa un hende cuminsa kere den Dios, ta tuma tempo, pues tene pasenshi. Un hende lo no acepta for di e prome combersacion cu ta existi un Creador. Pero cu tempo e por cuminsa reconoce cu kisas esey ta posibel of e por bisa cu awor e ta compronde dicon hende por yega na e conclusion ey.

6. Dicon algun hende no ta interesa den Bijbel?

⁶ Hende Cu No Ta Interesa of Cu No Ta Kere den Bijbel: Na algun ocasion nos por haya un hende cu ta reconoce cu tin un Dios pero cu no ta kere cu Bijbel ta e Palabra di Dios. Podise e ta biba den un pais no cristian y e ta conecta Bijbel cu cristiandad. Of kisas e ta biba den un pais supuestamente cristian caminda hende ta hopi inclina na cosnan mundano, y pesey e no ta kere cu Bijbel ta masha util p’e. Con nos por yuda un hende asina haya interes den Bijbel y eventualmente acepta un estudio den e buki Bijbel Ta Siña?

7. Con algun publicador ta logra lanta interes di hende den Bijbel?

⁷ E sucursal di Grecia a skirbi: “E mihor manera pa yuda hende cu no ta interesa den Bijbel ta di djis habrie y mustra nan su contenido. Hopi publicador a nota cu e efecto cu e mensahe di Bijbel tin riba ­curason di hende ta mucho mas poderoso cu cualkier cos cu nan mes por bisa. (Heb. 4:⁠12) Ora nan mira e nomber di Dios den Bijbel, hopi di nan kier sa mas di loke Bijbel ta papia di dje.” E sucursal di India a skirbi: “E berdad tocante bida y morto y e promesa di Bijbel cu lo tin un mundo sin discriminacion ta atra’e hopi hindu.” Ora e publicadornan referi na problemanan di interes local, nan ta haya oportunidad pa mustra kico Bijbel ta bisa cu e Reino di Dios lo haci pa drecha e situacion.

8. Kico nos por bisa hende cu tin un punto di bista negativo tocante Bijbel pa motibo di cristiandad?

⁸ Si un hende tin un punto di bista negativo tocante Bijbel pa motibo di cristiandad, lag’e sa cu cristiandad a duna hende un concepto robes tocante Bijbel y su siñansanan. E sucursal di India a skirbi: ‘Tin biaha, nos tin cu yuda hende mira cu net e iglesianan di cristiandad no ta practica loke Bijbel ta siña.’ Segun e informe di e sucursal, hindu sa keda impresiona cu e seccion 4 di e foyeto ¿Qué propósito tiene la vida? ¿Cómo descubrirlo?, cu ta splica con iglesianan a purba contamina y destrui e Palabra di Dios. Un pionero na Brazil ta bisa hende: “Bo no ta haya cu ta bon pa abo mes haya sa kico tin den Bijbel? Hopi hende ta haci esaki cu un mente habri, sin afilia na un religion. Lo bo keda hopi sorprendi di loke bo lo siña.”

9. Dicon nos no mester entrega si na cuminsamento un hende no ta interesa den kico Bijbel ta siña?

⁹ Jehova ta wak curason di cada hende. (1 Sam. 16:⁠7; Prov. 21:⁠2) E ta hala tur hende cerca dje cu tin e condicion di curason corecto pa sirbie. ( Juan 6:⁠44) Hopi di e hendenan aki nunca no a siña tocante Dios of no sa casi nada di Bijbel. Nos trabou di predica ta duna nan e chens pa “ser salba y yega na un conocemento exacto di e berdad.” (1 Tim. 2:⁠4) Pesey, si na cuminsamento un hende no ta interesa den kico Bijbel ta siña, no entrega! Uza un di nos publicacionnan pa lanta su interes. Cu tempo, lo bo por pasa di e publicacion ey pa esun principal: e buki Kico Bijbel Ta Siña Realmente?

[Kuadro na pagina 4]

Si un hende no ta kere den Dios, purba esaki:

• Pa haya sa kico ta su motibo, puntr’e, “Semper bo a pensa asina?”

• Si e ta budista, uza pagina 9-⁠12 di e foyeto Cómo hallar paz y felicidad duraderas.

• Si ta den evolucion e ta kere, e siguiente publicacionnan por ta util:

E serie ¿Casualidad o diseño?” den ¡Despertad!

E DVD Las maravillas de la creación revelan la gloria de Dios

Parti 4 di e foyeto Cómo lograr una vida llena de satisfacción; e foyetonan Bida Ta Obra di un Kreador? y El origen de la vida. Cinco cuestiones dignas de análisis

• Si el a stop di kere den Dios pa motibo di inhusticia y sufrimento, e siguiente publicacionnan por ta util:

Capitulo 10 di e buki ¿Existe un Creador que se interese por nosotros?

Parti 6 di e foyeto Dios Realmente Ta Interesá den Nos? y seccion 6 di e foyeto ¿Qué propósito tiene la vida? ¿Cómo descubrirlo?

• Na momento cu e persona cuminsa acepta e idea cu ta existi un Dios, cambia mesora pa e buki Bijbel Ta Siña. Lo ta bon pa cuminsa na capitulo 2 of cualkier otro tema cu ta apropia p’e.

[Kuadro na pagina 5]

Purba esaki si un hende no ta kere den Bijbel:

• Analisa capitulo 17 y 18 di e buki La vida... ¿cómo se presentó aquí? ¿Por evolución, o por creación?

• Si e ta hindu, uza e foyeto ¿Por qué debemos adorar a Dios con amor y verdad?

• Si e ta hudiu, bay na pagina 3-11 di e foyeto Hamas Lo Yega di Tin un Mundu Sin Guera?

• Trata e beneficionan di e siguiente principionan di Bijbel. Algun publicacion cu bo por uza pa mustra un hende con practico Bijbel ta:

E serie “Ayuda para las familias” den ¡Despertad!

E DVD La Biblia: el poder que ejerce en su vida

Les 9 y 11 di e foyeto Dios Tin Bon Noticia pa Nos!; pagina 22-26 di e foyeto Un Buki pa Tur Hende y parti 2 di e foyeto Cómo lograr una vida llena de satisfacción

Si e ta budista, bay na pagina 3-7 di e foyeto El camino de la paz y la felicidad

Si e ta moslim, bay na seccion 3 di e foyeto La fe verdadera, la puerta a una vida feliz

Si bo ta predica den teritorio caminda hende no kier tende di Bijbel, lo ta mihor pa bo no menciona di unda bo a haya e bon informacion cu bo ta compartiendo cu nan, sino te despues di algun bishita.

• Splica con profecianan di Bijbel a cumpli. Publicacionnan cu bo por uza ta:

E DVD La Biblia: historia exacta, profecía confiable

Pagina 27-29 di e foyeto Un Buki pa Tur Hende

• Si e persona cuminsa puntra kico Bijbel ta siña tocante cierto topico, cambia mesora pa e buki Bijbel Ta Siña.

[Kuadro na pagina 6]

Si un hende bisa: “Mi no ta kere den Dios”, bo por puntr’e:

• “Mi por splica bo brevemente kico a convence ami pa kere den un Creador?” Anto mustr’e algun punto for di e buki Rasonamento, na Spaño, pagina 87-⁠89, of haci areglo pa trece un publicacion cu a yuda bo.

• “Pero si di berdad tin un Dios, ki clase di Dios lo bo a desea p’e ta?” Hopi hende lo bisa cu nan lo sinti nan atrai na un Dios di amor, di husticia y di misericordia, y cu no ta haci distincion di persona. Mustr’e for di Bijbel cu Dios tin e cualidadnan ey. (Kisas bo por hasta uza capitulo 1 for di e buki Bijbel Ta Siña, cuminsando cu paragraf 6.)

Si un hende bisa: “Mi no ta kere den Bijbel”, bo por bis’e:

• “Hopi hende ta pensa mescos. Algun tin e pensamento cu Bijbel no ta un buki cientifico y cu su normanan no ta practico. Pero, abo a yega di lesa Bijbel? [Permiti e persona contesta. Anto mustr’e e introduccion na pagina 3 di e foyeto Un Buki pa Tur Hende y ofrec’e e foyeto.] Hopi hende no ta kere den Bijbel pasobra religion a duna Bijbel un mal nomber. Otro biaha lo mi kier a trata cu bo e ehempel cu tin na pagina 4 y 5.”

• “Hopi hende ta comparti bo punto di bista. Mi por mustra bo algo cu a impresiona ami di Bijbel? [Lesa Job 26:⁠7 of Isaias 40:⁠22, cu ta proba cu Bijbel ta cientificamente exacto.] Pero Bijbel tin consehonan practico tambe pa yuda famianan. Un otro biaha lo mi kier mustra bo un par di ehempel.”

• “Danki pa bisa mi esey. Si Dios a skirbi un buki pa humanidad, kico bo ta kere lo el a contene?” Anto mustra e persona un texto di Bijbel cu ta cuadra cu loke el a bisa.