Uza Nos Tempo Bon den Sirbishi
Durante e aña di sirbishi 2014, testigonan di Jehova a dedica 1.945.487.604 ora na e trabou di predica y di haci discipel. Esey sin duda ta demostra cu nos ta determina pa keda activo den nos sirbishi na Jehova. (Sal. 110:3; 1 Cor. 15:58) Y como cu “no a [resta] mucho tempo mas”, lo ta bon pa uza nos tempo valioso den sirbishi pa papia cu mas tanto hende posibel.—1 Cor. 7:29.
Pa uza nos tempo bon den sirbishi, nos mester ta flexibel. Por ehempel, por sosode cu regularmente nos ta pasa un of mas ora den un rasgo di sirbishi sin haya hende pa papia cu ne. Nos por haci ahuste pa haya mas hende pa papia cu ne? Circunstancianan ta varia di un luga pa otro. Sinembargo, e siguiente sugerencianan por yuda nos uza nos tempo bon pa asina evita cu nos ta “dal den bashi.”—1 Cor. 9:26.
Predica di Cas pa Cas: Pa hopi aña, publicadornan tin e custumber di cuminsa nan dia di sirbishi predicando di cas pa cas. Sinembargo, hopi hende ta traha durante dia. Pesey, dicon no purba di predica di cas pa cas mas atardi of prome cu bira scur? Den e oranan ey tin mas hende na cas y nan ta menos ocupa. Di otro banda, predica durante dia riba caya of na negoshi ta duna mihor resultado.
Predica na Luganan Publico: Nos mester pone e standnan portatil na un sitio caminda hopi hende ta pasa, basta ta den e teritorio di nos congregacion. (Wak Nos Ministerio di Reino di juli 2013, pag. 5.) Si e cantidad di hende cu ta pasa eynan baha, e Comite di Sirbishi di Congregacion por dicidi di cambia e sitio cu ta pone e stand portatil pa un sitio caminda tin mas hende ta pasa.
Rebishita y Curso di Bijbel: Durante cierto oranan di dia algun rasgo di sirbishi no ta asina productivo. Pues, dicon no plania pa haci rebishita y duna curso di Bijbel den e oranan ey? Por ehempel, si diasabra mainta sirbishi di cas pa cas ta mas productivo, lo ta mas practico pa nos duna cursonan di Bijbel atardi of anochi. Ora nos ta uza auto pa haci rebishita, lo ta mihor pa limita e cantidad di publicador cu ta bay hunto pa asina nos por logra mas den sirbishi.
Ta berdad cu nos por conta nos oranan tur biaha cu nos participa den sirbishi. Pero nos goso ta aumenta ora nos ta mira fruta di nos trabou. Si na un cierto ora di dia un rasgo di sirbishi no ta productivo, purba un otro rasgo. Laga nos pidi Jehova, “Doño di e cosecha”, pa yuda nos uza nos tempo bon den sirbishi.—Mat. 9:38.