Miyones di Hende Lo Bai Abo Lo T’Ei?
NA UNDA? Na un di e Congresonan di Districto “Duna Gloria na Dios” cu lo ser teni na centenares di sitio rond mundo. E programa di tres dia, organisa door di Testigonan di Yehova, a ser prepara specialmente pa yuda tur hende cu stima Dios pa biba di tal manera cu nan ta honra nan Creador manera e merece.
E prome dia di e congreso lo enfoca riba e tema “Digno Bo Ta Yehova, pa Ricibi Gloria.” (Revelacion 4:11) “Creacion Ta Declara e Gloria di Dios” ta titulo di un discurso cu lo yuda nos mira con e cualidadnan di Yehova ta “wordo mira claramente” of ser “comprendi door di loke a wordo traha.” (Romanonan 1:20) E discurso clave animador, “Visionnan Profetico Glorioso Ta Stimula Nos!”, lo urgi tur presente pa tene masha na mente e susesonan sumamente significante cu e Palabra di Dios ta profetisa pa nos tempo. “E Profecia di Amos—Su Mensahe pa Nos Tempo” ta titulo di e simposio di tres parti cu lo enfatisa con e spiertamentonan di e profeta di pasado aki ta aplica na nos tempo. “‘E Tera Bunita’—Un Bista Delanta di Paradijs” lo aumenta nos aprecio pa e region cu Yehova a duna na su pueblo di pasado.
E di dos dia di congreso lo carga e tema “Conta di Su Gloria Meimei di e Nacionnan”, basa riba Salmo 96:3. Entre e puntonan sobresaliente lo tin un simposio titula “Refleha Manera Spiel e Gloria di Yehova.” E presentacion aki di tres parti lo describi con nos por efectua nos sirbishi mas eficasmente. Despues di e discurso “Odia sin Motibo”, lo tin e discurso di dedicacion y e bautismo, cu ta parti di tur congreso di Testigonan di Yehova. E discurso di atardi “Tene Cuidou cu ‘Bos di Hende Straño’” lo duna spiertamento oportuno relaciona cu “siñadonan falso” cu ta purba gaña e pueblo di Dios cu “palabranan di engaño.” (2 Pedro 2:1, 3) “Nos Yiunan—Un Herencia Precioso” lo ta e ultimo parti riba programa pa e dia ei. Lo e ta un dushi ocasion pa mayornan y tambe pa e chikitinnan.
E ultimo dia di congreso lo desaroya e tema “Haci Tur Cos pa e Gloria di Dios.” (1 Corintionan 10:31) Un serie di entrevista lo compaña e discurso titula “Con Hobennan Ta Alabando Yehova.” E sesion di mainta lo tin tambe un drama di 45 minuut titula “Nan A Duna Testimonio cu Curashi Apesar di Oposicion.” Como cu religion ta constantemente den noticia, e discurso publico lo trata e pregunta: “Ken Awe Ta Duna Gloria na Dios?” E discurso “Sigui ‘Duna Hopi Fruta’ pa e Gloria di Yehova” lo hiba e congreso na un final emocionante.
Esakinan ta djis algun di e presentacionnan motivador cu lo bo por scucha na e Congreso di Districto “Duna Gloria na Dios” di Testigonan di Yehova. Sigur lo bo kier ta presente tur e tres dianan. Si bo kier sa cua ta e congreso mas serca di bo, tuma contacto cu e Salon di Reino local di Testigonan di Yehova of skirbi e publicadonan di e revista aki.