Dios Su Nomber Riba un Kasteel di Edad Media

DI UN ESCRITOR DI SPIERTA! NA SLOVAKIA

SLOVAKIA ta un pais chikito pero cu paisahe masha bunita cu ta keda den curason di Europa. E paisahe pintoresco di cunucu ta dorna cu varios kasteel cu ta para como evidencia di e region su historia largo y rico. Un di e kasteelnan mas remarcabel ta Kasteel Orava, construi na un haltura di 112 meter riba baranca di calki, y e ta sobresali riba e pueblito pega cu ne.

E prome registronan tocante Kasteel Orava ta data di aña 1267. Atrabes di tempo el a pasa den masha hopi man. Na 1556 un famia rico, famia Thurzó, a bira doño di e kasteel. E famia a drecha y agrega varios cos na e kasteel, entre otro, nan a construi e kasteel su capia.

Tur aña Kasteel Orava y su exhibicionnan ta atrae dies di miles di bishitante for di hopi pais. Den e patio di e kasteel, bishitantenan por mira algo di interes special cu a keda conserva den un relieve di piedra di e escudo di famia Thurzó. E relieve ta contene e nomber biblico di Dios—Yehova—na Latin.