Sea Puntual!

“DIRECTORNAN di empresa tin un problema cronico cu yegamento laat”, segun USA Today. Citando un encuesta serca 2.700 director, e ta agrega: “Di cada 10 reunion, na seis nan ta yega laat.”

E mundo di comercio ta mira yegamento laat como algo hopi mas serio cu djis un muestra di mal manera. Un estudio cu nan a efectua entre 81.000 persona cu ta busca trabou a conclui: “E oranan cu ta bai perdi na yegamento laat y ausencia sin permit ta un fuente principal di perdida financiero.” Claro cu no ta den e mundo di comercio so yegamento laat ta crea problema. Un encuesta cu a ser haci cu cabesnan di scol secundario a mustra cu “yegamento laat di studiantenan tawata e motibo principal y mas frecuente pakico nan ta haya straf.”

Nos Creador tawata kier pa nos ta conciente di tempo. Pesei el a traha “e dos lusnan grandi”—solo cu luna—pa yuda nos midi tempo. (Genesis 1:14-16) Awendia, oloshinan moderno ta permiti nos midi nos tempo den minuut y seconde. Sinembargo, apesar di tecnologia, toch hopi di nos tin problema pa yega na tempo na trabou, scol of otro citanan importante.

E problema realmente ta falta di tempo? No tin duda cu trabou y famia por ta exigiendo hopi tempo di nos. No obstante, Wanda Rosseland, un mama cu ta traha, a bisa: “Dia mi a realisa cu nos tur tin 24 ora pa dia, mi a stop di keha tocante falta di tempo. Mi a pensa riba esaki y mi a yega na e conclusion cu den nos mundo moderno, e problema no ta cu nos tin tiki tempo, sino cu nos tin hopi cos cu ta kita nos tempo y distrae nos.”

Considera tambe e caso di Renee,a un Testigo di Yehova, mama di cinco yiu. E ta corda: “Tempo mi yiunan tawata chikito, no tawata facil pa prepara nan pa scol y pa reunionnan cristian. Toch, mi no tawatin problema pa yega na tempo. Pero awor cu nan tur a bira grandi, mi a crea e mal custumber di yega laat.” Abo tambe tin e mal custumber aki? Si ta asina, ta posibel pa cambia! Aki ta sigui algun cos cu por yuda bo.

● PENSA RIBA E CONSECUENCIANAN. Yegamento laat por parce un cos insignificante. Pero pensa riba e siguiente palabranan di Bijbel: “Musca morto ta haci azeta di un trahado-di-perfume hole malo; asina un poco bobedad ta pisa mas cu sabiduria y honor.” (Eclesiastes 10:1) Si, djis “un poco bobedad” den e forma di falta di consideracion pa otro hende por daña bo reputacion serca un meneer di scol of doño di trabou.

Tempo cu un señora cu yama Marie tawata sigui algun curso na un scol local, el a ripara cu algun di su coleganan di klas “no tawata worry masha cu ora.” Hopi bes nan tawata yega les laat. El a sigui bisa: “Pero no a dura hopi cu nan mester a cambia pasobra dos di e maestronan si tawata hopi exigente tocante puntualidad. Si un studiante a yega djis un par di minuut laat, nan tawata marc’e como ausente. Y pa cada tanto biaha ausente, e studiante tawata haya un mal punto.”

Ora bo ta semper laat, bo por haya mal nomber serca bo amigonan tambe. Un homber di rond di cuarenta aña cu yama Joseph ta corda un ruman cristian cu el a conoce hopi aña pasa. Aunke e homber aki a gosa di respet pa su habilidadnan como maestro, e tawatin un debilidad fastioso. Segun Joseph: “Semper e tawata laat. Mi kiermen laat pa tur cos! Y aparentemente nunca e no tawata worry cu esei. E hendenan tawata haci wega cu su yegamento laat.” Kico di abo? Hende a cuminsa referi na bo como un persona cu semper ta laat? Si ta asina, facilmente nan por pasa bo bon cualidadnan por halto.

● TENE CUENTA CU OTRO HENDE. Yegamento laat ta un muestra di mal manera y e ta distrae otro hende. Tambe e por duna e impresion cu bo ta sinti bo mas importante cu otro hende. Splicando pakico asina tanto ehecutivo di negoshi tin tendencia di yega laat pa reunion, un comerciante a admiti: “Mayoria di nos ta simplemente arogante.” Na contraste, cristiannan ta trata otro hende como superior na nan. (Filipensenan 2:3) Tambe nan ta aplica e Regla di Oro y ta trata otro hende manera nan kier wordo trata. (Mateo 7:12) Bo no ta disgusta ora bo tin cu warda riba otro hende? Anto, no pone otro hende warda riba bo.

● SIÑA MANEHA BO TEMPO. Bo sa pospone cosnan y core haci cosnan pura pura na ultimo ora? Bo ta programa mucho cos di haci, purbando pa haci mucho cos den un tempo mucho cortico? E principio na Eclesiastes 3:1 por ta util pa bo: “Tin un tempo stipula pa tur cos.” Ora bo tin “un tempo stipula” pa cada cos, lo bo por haci nan na un manera ordena.

Na prome luga, traha un lista di tur loke bo tin cu haci. Despues, sigui e principio na Filipensenan 1:10 [NW]: “Haci sigur di e cosnan mas importante.” Si, sigui un orden di prioridad. Kico ta e cosnan cu bo tin cu haci sin falta? Kico ta algun di e cosnan cu bo por pospone trankilamente pa mas despues? Finalmente, calcula cuanto tempo bo mester pa cada cos y ki ora of dia bo por haci nan. Sea realistico y evita di programa mucho cos den mucho tiki tempo.

Un señora cu yama Dorothy a bisa cu ta danki na su mayornan cu e ta puntual. E ta conta: “Si nos mester tawata na un reunion cristian 7:30 p.m., mi mama tawata cuminsa prepara nos 1 ora y 45 minuut prome cu esaki. Nos tawatin cu aparta tempo pa come, pa laba cos, pa bisti y pa core yega e luga di reunion. Tawata algo normal pa nos ta na ora.” Tin biaha ta bon pa tene cuenta cu cosnan inespera. Dorothy a bisa: “Resientemente mi tawatin cu pasa busca un par di hende pa un reunion. Riba caminda mi a haya un flat tire. Mi a cambia tire y toch yega na tempo pa recohe e hendenan. Wak, semper mi ta sali mas tempran, teniendo cuenta cu un posibel problema cu auto of trafico pisa.”

● PIDI OTRO HENDE SUGERENCIA. Bijbel ta bisa na Proverbionan 27:17: “Manera hero ta mula hero, asina un hende ta mula cara di su amigo.” Na harmonia cu e principio ei, papia cu otro hende cu tin casi mesun circunstancianan cu bo, pero cu toch semper sa ta na tempo. Hopi bes nan lo por tin algun sugerencia util.

Renee, cita anteriormente, ta determina pa cambia su actitud di yega laat. El a bisa: “Resientemente mi a pone pia abou pa mehora. Aunke no tawata facil, pocopoco mi ta bayendo dilanti.” Bo tambe por. Cu e actitud corecto y cu esfuerso, bo por siña ser puntual!

[Nota]

[Plachinan na pagina 18]

Un empleado cu semper ta laat por causa un mal impresion serca su doño di trabou y ta mustra cu e no tin cu nes cu otro hende

[Plachi na pagina 19]

Bon organisacion personal por yuda bo evita di perde tempo