Ora Bo Baby Ta Yora sin Stop

DI UN ESCRITOR DI SPIERTA! NA CANADA

E DOCTER a confirma loke e mama tawata sospecha caba. Su baby tawatin e caso tipico di colico, cu ta un dolor fuerte den bariga. Segun un corant di Canada, Globe and Mail, e malesa aki ta afecta “un di cada cuater mucha.” Un di e sintomanan di colico ta cu e baby ta yora por lo menos tres bes pa siman pa varios ora largo sin kier stop. Kico un mayor precupa por haci? Segun docternan di mucha den hopi caso tanto e mayornan como e yiu tin cu spera te ora cu e colico kita. Pero pa cuanto tempo?

Un estudio resien cu nan a haci na Canada—di mamanan cu tin yiu cu colico—ta revela cu den mas cu 85 porshento di e casonan e colico a kita ora e babynan tawatin tres luna. E investigacion, inicia door di dr. Tammy Clifford, directora di e departamento di epidemologia na Instituto di Investigacion di e Hospital di Mucha di Oost Ontario, a revela tambe cu e echo cu un mama tin un yiu cu a haya colico no tin un efecto permanente riba e mama su salu mental. Segun dr. Clifford, “rond di seis luna despues cu e yiu a nace, e mama ta bira mescos cu e Maminan cu si no tawatin yiu cu colico. Ta parce como si fuera nan ta lubida tur cos, asina cu e yoramento stop.”

Segun Globe, e investigacion resien aki, publica door di dr. Clifford y su coleganan, “ta agrega detayenan importante na e conocemento cientifico tocante colico. Pasobra e ta mustra cu tin tres clase di baby cu colico: esnan cu ta haya e malesa y cura di dje durante e prome tres lunanan di nan bida; esnan cu tin colico persistente cu ta dura varios luna sin stop; y un grupo chikito cu ta haya colico relativamente laat, esta, un par di luna despues cu nan a nace.” Nan ta haciendo un otro estudio pa sigui e desaroyo di muchanan cu colico segun cu nan ta crece, y ta e di tres grupo ta esun cu nan ta haya specialmente interesante.

Nan ta kere cu ta e yoramento sin stop ta un di e cosnan cu ta pone cu babynan ta wordo sagudi y door di esei ta sufri daño. Manera Globe, ta informa, “e yoramento mes no ta haci e mucha daño. Pero si bo sagudi un baby na un manera violento, asta si ta pa un lapso di tempo cortico, e por causa daño na su sistema nervioso y asta su morto.”

Di otro banda, e yoramento di un yiu—asta si e ta yora sin stop—por tin un bentaha. “Investigacion a mustra cu, en realidad, babynan cu ta yora hopi ta haya mas atencion di esnan cu ta cuida nan”, segun Globe. “Nan ta mishi cu nan mas tanto, smile cu nan mas tanto, papia cu nan mas tanto y brasanan mas tanto.”