E Punto di Bista Biblico

Duna Mucha e Atencion Cu Nan Mester

E Yiu di Dios tawatin tempo pa dedica na mucha? Algun di su disipelnan a pensa cu no. Na un ocasion nan a purba stroba e chikitinnan di yega serca di Hesus. Pero el a reacciona bisando: “Laga e muchanan bin serca mi; no stroba nan.” E ora ei, cu amor el a ricibi un grupo di mucha y a papia cu nan. (Marco 10:13-16) Asina Hesus a mustra cu e ta dispuesto pa duna atencion na mucha. Con mayornan awe por sigui su ehempel? Door di educa nan yiunan corectamente y dedica tempo na nan.

Ta claro cu mayornan responsabel ta haci tur esfuerso pa percura bon pa nan yiunan y ta evita di maltrata nan. Nos por asta bisa cu ta “natural” pa mayornan mustra respet y consideracion pa nan yiunan. Sinembargo, Bijbel ta spierta cu hopi hende den nos tempo lo no tin “cariño natural” mas. (2 Timoteo 3:1-3, NW) Y pa esnan cu si tin un interes amoroso den nan yiunan, semper tin algo mas pa siña pa asina bira un miho mayor. Pesei, e siguiente principionan di Bijbel ta recordatorionan cu ta bonbini serca mayornan cu kier lo miho pa nan yiunan.

Educa Nan sin Irita Nan

Dr. Robert Coles, un famoso maestro y psikiatra cu ta haci investigacion, a yega di bisa: “Mucha tin un sentido moral cu ta desaroyando. Na mi opinion ta Dios ta duna nan e sentido aki, y nan tin un deseo fuerte pa guia moral.” Ken tin cu satisface e hamber y sed aki pa guia moral?

Na Efesionan 6:4, e Scritura ta urgi: “Boso, tatanan, no proboca [“irita”, NW] boso yiunan na rabia, ma lanta nan den e disiplina y instruccion di Señor.” Bo a ripara cu e texto ta encarga e tata particularmente cu e responsabilidad di inculca den su yiunan un amor pa Dios y un aprecio profundo pa Su normanan? Den e prome versiculo di Efesionan capitulo 6, apostel Pablo a referi na tanto e tata como e mama ora el a bisa yiunan pa nan ta ‘obedecido na nan mayornan.’a

Claro cu si e tata ta ausente, ta e mama e ora ei tin cu asumi e responsabilidad aki. Hopi mama soltera tawatin exito den lanta nan yiunan den e disiplina y instruccion di Yehova Dios. Sinembargo, si e mama casa, ta e esposo cristian mester hiba delantera. Di buena gana e mama mester sigui e guia cu e esposo ta duna pa educa y disiplina nan yiunan.

Con bo ta disiplina of educa bo yiunan sin “irita” nan? No tin formulanan secreto, specialmente pasobra cada yiu ta diferente. Pero mayornan mester pensa bon con nan ta duna disiplina, pa semper nan hacie cu amor y respet pa nan yiunan. Ta interesante cu e asunto di no proboca boso yiunan ta ser ripiti den e Scritura na Colosensenan 3:21. Einan, Pablo ta bolbe spierta e tatanan: “No proboca boso yiunan, pa nan no perde animo.”

Tin mayornan ta grita nan yiunan. Esaki sin duda ta proboca of irita nan yiunan. Pero Bijbel ta urgi: “Laga tur amargura, furia, rabia, griteria y calumnia wordo kita for di boso, hunto cu tur malicia.” (Efesionan 4:31) Bijbel ta bisa tambe cu un “sirbido di Señor no mester ta pleitado, ma cariñoso cu tur hende.”—2 Timoteo 2:24.

Duna Nan Bo Tempo

Duna bo yiunan e atencion cu nan tin mester ta nifica tambe cu bo ta dispuesto pa sacrifica placer y comodidadnan personal na fabor di e bienestar di bo yiunan. Bijbel ta bisa: “E palabranan aki, cu mi ta ordena bo awe, mester ta riba bo curason. Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.”—Deuteronomio 6:6, 7.

Awendia obligacionnan financiero cu ta exigi hopi tempo y esfuerso di hende ta pone cu ta masha poco mayor por ta hunto cu nan yiunan henter dia. Apesar di esei, e buki di Deuteronomio ta enfatisa cu mayornan tin cu busca manera pa haya tempo pa dedica na nan yiunan. Pa nan por haci esei, nan mester ta bon organisa y dispuesto pa haci sacrificio. Pero mucha tin mester di e atencion ei.

Considera e resultadonan di un estudio cu nan a haci cu mas di 12.000 teenager. E conclusion di e investigadonan tawata: “Un relacion emocional fuerte cu un mayor ta e miho garantia pa salu di un teenager y e barera di mas fuerte pa evita cu e mucha ta comport’e di un manera cu su bienestar ta na peliger.” Si, yiunan tin un deseo fuerte pa atencion di nan mayornan. Un mama a yega di puntra su yiunan: “Si boso por a haya tur loke boso ta desea, kico ta e cos cu boso lo tin mas gana di dje?” Nan tur cuater a responde: “Mas tempo hunto cu Mami cu Papi.”

Pues ser un mayor responsabel ta nifica cu bo ta haci sigur cu e necesidadnan di bo yiunan ta ser satisface, incluso nan necesidad di educacion spiritual y di tin un relacion estrecho cu nan mayornan. E ta nifica yuda bo yiunan bira adultonan capas, respetuoso y honesto cu ta trata nan prohimo cu bondad y cu ta duna gloria na nan Creador. (1 Samuel 2:26) Si, ta ora cu mayornan ta educa y disiplina nan yiunan di acuerdo cu e principionan di Dios, nan ta mayornan responsabel.

[Nota]

[Plachi na pagina 13]

Gritamento por causa angustia pa un mucha

[Plachi na pagina 13]

Dedica tempo na bo yiunan