E Punto di Bista Biblico

Dios Ta Tur Caminda?

D IOS ta ser describi apropiadamente como omnipotente y omnisapiente, esta, cu e ta todopoderoso y cu e sa tur cos. Sinembargo, algun hende cu kier purba describi e grandesa di Dios mas aleu, ta agrega un di tres palabra—omnipresente. Nan ta kere cu Dios ta presente tur caminda na e mesun momento.

Aunke Bijbel no ta menciona ningun di e palabranan descriptivo aki, siñansa biblico claramente ta apoya e dos promenan. (Genesis 17:1; Hebreonan 4:13; Revelacion 11:17) Dios realmente ta omnipotente, y e ta omnisapiente den e sentido cu nos no por sconde nada p’e. Pero e ta omnipresente? Dios ta tur caminda, of e ta un persona cu tin un luga spesifico di biba?

Unda Dios Ta?

Varios versiculo di Bijbel ta menciona “shelo” como Dios su “luga di biba.” (1 Reinan 8:39, 43, 49; 2 Cronicanan 6:33, 39) Sinembargo, un relato di Bijbel ta describi e magnitud di Yehova Dios cu e siguiente palabranan: “Di berdad Dios lo biba riba tera serca hende? Mira, shelo y e shelo di shelonan no por contene bo.”—2 Cronicanan 6:18.

Bijbel ta bisa: “Dios ta Spirito.” (Huan 4:24) Pesei, e ta biba den un region spiritual independiente di e universo fisico. Ora Bijbel ta menciona “shelo” como Dios su luga di biba, e ta referi na e echo cu caminda Dios ta biba ta hopi mas eleva na comparacion cu e ambiente fisico cu nos ta biba aden. Loke ta mas importante, Bijbel ta siña nos cu Dios su luga di biba ta claramente distinto for di e universo fisico, aunke alabes e ta un luga masha spesifico.—Job 2:1, 2.

Dios Ta un Persona

Hesus a papia di Yehova su luga di biba ora el a bisa su disipelnan: “Den cas di mi Tata tin hopi luga-di-biba. . . . Mi ta bai pa prepara un luga pa boso.” (Huan 14:2) Unda Hesus a bai? Cu tempo el a “drenta . . . den shelo mes, awor pa aparece den e presencia di Dios pa nos.” (Hebreonan 9:24) E relato aki ta siña nos dos factor importante tocante Yehova Dios. Prome, e tin un luga literal di biba, y di dos, e ta un persona y no simplemente un forsa indefinibel cu ta biba tur caminda.

Ta pesei Hesus a siña su disipelnan haci oracion di e manera aki: “Nos Tata cu ta den shelo.” Nan mester a dirigi nan oracion na un persona, Yehova, kende ta na un luga, esta, e luga spiritual describi como “shelo” den Bijbel. (Mateo 6:9; 12:50) E siñansa aki tawata na harmonia cu e manera cu e pueblo di Dios a ser siña pa haci oracion pa mas cu 1.500 aña. E scrituranan di mas bieu inspira door di Dios ta contene e siguiente oracion: “Wak abou for di bo habitacion santo, for di shelo, y bendiciona bo pueblo.”—Deuteronomio 26:15.

Dios Su Spirito Santo Cu Ta Yega Tur Caminda

Aunke semper Bijbel ta indica cu Dios tin un luga spesifico di biba, hopi bes e ta bisa di e spirito santo cu e ta tur caminda. E salmista David a puntra: “Na unda mi por bai for di bo spirito? Of na unda mi por hui bai for di bo presencia?” (Salmo 139:7) Textonan manera esaki a confundi algun hende y podise nan ta yega na e conclusion cu Dios ta omnipresente. Pero ora nos considera e contexto di e versiculo aki y di otro texto, ta bira bisto cu Yehova su spirito santo—of su poder den accion—por ser extendi di Yehova su luga fiho pa cualkier otro luga den e universo fisico.

Mescos cu un tata ta saca su man pa yega na su yiunan pa consola nan y apoya nan, Yehova por saca su man—of spirito santo—pa yega te na cualkier parti di e region spiritual of di e universo fisico pa cumpli cu Yehova su proposito. Pesei e salmista por a bisa: “Si mi tuma hala di marduga, si mi bai biba den e partinan mas aleha di lama, ayanan tambe bo man lo guia mi, y bo man drechi lo cohe mi tene.”—Salmo 139:9, 10.

Bo Por Ta Amigo di Dios

Humildemente y amorosamente Yehova Dios a permiti hende describi e y su luga di biba uzando terminonan humano cu mas aptamente ta laga nos compronde unda e ta biba y ki clase di persona e ta. Di e manera aki y tambe den otro manera, ta como si fuera e ta “humilia su mes pa mira e cosnan cu ta den shelo y riba tera.” (Salmo 113:6) Pero toch, apesar di esei hende lo no por tin un comprondemento completo di Dios su naturalesa.

Yehova simplemente ta demasiado magnifico, demasiado grandi y demasiado maraviyoso pa wordo describi plenamente cu terminonan humano. Pues, aunke e Scritura ta papia di Dios su luga di biba como un sitio spesifico, ta simplemente imposibel pa hende compronde e dimension spiritual ei completamente.—Salmo 139:6.

Sinembargo, toch ta un gran consuelo cu te na cierto grado nos ta compronde Yehova su berdadero naturalesa, y cu nos ta realisa cu e no ta un forsa impersonal y indefinibel cu ta den tur cos den universo. Mas bien, e ta un persona cu un luga spesifico di biba y un personalidad defini cu ta ser caracterisa pa amor y ternura. E conocemento ei ta habri caminda pa e oportunidad di mas grandi cu cualkier hende por tin—e chens di tin un amistad personal y pa semper cu e Soberano Todopoderoso di universo.—Santiago 4:8.