Nos Lo Hala Cerca Dios ora Nos Siña Conoc’e

Nos Creador no ta djis un forsa impersonal. E ta un persona cu bunita cualidad. Ademas, e kier pa nos siña tocante dje y bira su amigo. (Juan 17:3; Santiago 4:8) Pesey, el a laga nos sa hopi cos tocante dje.

Nos Creador Tin un Nomber

“Bo ta digno, Jehova, nos Dios, di ricibi alabanza pa bo gloria, honor y poder, pasobra ta abo a crea tur cos, y pa motibo di bo boluntad nan ta existi y a ser crea.”—REVELACION 4:11.

Bijbel ta siña cu Jehova ta e unico Dios berdadero. El a crea universo y tur ser bibo. Ta e so merece nos adoracion.

Jehova Ta un Dios Amoroso

Nomber di Jehova, e Creador, skirbi na Hindi, Punjabi, Gujarati, Telugu, Tamil, y Papiamento.

“Dios ta amor.”—1 JUAN 4:8.

Jehova ta uza Bijbel y e cosnan cu el a crea pa siña nos ki tipo di persona e ta. Amor ta su cualidad di mas importante. Tur loke e ta haci ta motiva pa amor. Mas nos siña tocante Jehova, mas nos lo stim’e.

Jehova Ta un Dios Cu Ta Cla pa Pordona

“Bo ta un Dios di pordon.”—NEHEMIAS 9:17.

Jehova sa cu nos ta imperfecto, pesey e ta cla pa pordona nos. Ora nos bis’e cu e ta duel nos y nos haci nos best pa stop di haci loke ta malo, lo e pordona nos. E no ta sigui castiga nos pa e picanan cu nos a comete den pasado.—Salmo 103:12, 13.

Jehova Kier pa Nos Haci Oracion na Dje

“SEÑOR ta cerca di tur esnan cu ta sclama na dje ... E lo tende nan sclamacion.”—SALMO 145:18, 19.

Nos no mester di un ceremonia special, imagen ni otro obheto pa adora Jehova. E ta scucha nos oracionnan mescos cu un mayor amoroso ta scucha su yiunan.