Dicon Hende Ta Bira Malo

BO CONOCE un hende cu ta malo?— Casi sigur bo mes tambe sa bira malo. Bo por bira ferkout, of bo por haya dolor den bo bariga. Tin hende cu ta hopi malo. Nan no por ni lanta para sin cu un hende yuda nan. Hopi bes e cos ei ta pasa ora hende bira hopi bieu.

Tur hende ta bira malo de bes en cuando. Bo sa ta dicon hende ta bira malo, bira bieu y muri?— Un dia, ora un par di hende a trece un homber cu no por a cana serca Hesus, Hesus a mustra ta dicon hende ta bira malo y muri. Laga mi conta bo con el a haci esei.

Hesus tawata kedando na un cas den un pueblo serca di Lama di Galilea. Masha hopi hende a bin serca dje. Asina tanto hende a bin, cu no tawatin luga pa mas hende drenta e cas. Ningun hende no por a ni sikiera yega serca di e porta. Y toch mas hende a sigui bin! Un par di hende a trece un homber lam cu no por a ni cana. Cuater homber mester a carg’e riba un kot, un cos manera un cama chikito.

Bo sa ta dicon nan kier a trece e homber malo serca Hesus?— Nan tawatin fe cu Hesus por a yud’e. Nan a confia cu Hesus por a cur’e di su enfermedad. Bo sa con nan a logra hiba e homber lam serca Hesus maske e cas tawata yen yen di hende?—

Wel, e plachi cu bo ta mira aki ta mustra con nan a hacie. Prome nan a carga e homber hiba riba dak di e cas. E dak tawata plat. E ora ei nan a traha un buraco grandi den e dak. Caba nan a baha e homber malo cu tawata riba e kot door di e buraco, te abou den e cas. Nan tawatin hopi fe mes!

Tur hende den e cas a keda sorprendi ora nan a mira loke tawata pasa. E homber lam riba e kot a baha te abou meimei di nan. Hesus a rabia ora el a mira kico e hombernan a haci?— Claro cu no! El a keda contento di mira cu nan tin fe. El a bisa e homber lam: “Bo picanan ta pordona.”

Un par di e hendenan den e cas a haya cu e cos cu Hesus a bisa no ta bon. Nan no a kere cu e por pordona pica. Pesei, pa e mustra nan cu e por, Hesus a bisa e homber: “Lanta, cohe bo cama y bai bo cas.”

Ora Hesus a bisa e cos ei, e homber a cura! E no tawata lam mas. Awor e por a lanta cana su so. E hendenan cu a mira e milager aki a keda babuca. Nunca di nan bida nan no a yega di mira un cos asina maraviyoso! Nan a alaba Yehova, pasobra el a duna nan un Gran Maestro cu por a asta cura hende malo.—Marco 2:1-12.

Kico e milager aki ta siña nos?— E ta siña nos cu Hesus tin poder pa pordona pica y pone hende malo bira bon. Pero nos ta siña un cos mas tambe, un cos hopi importante. Nos ta siña cu ta pica ta pone hende bira malo.

Tur hende ta bira malo de bes en cuando. Esei kiermen cu nos tur ta pecado?— Si, Bijbel ta bisa cu nos tur a nace cu pica. Bo sa kico kiermen nace cu pica?— E kiermen cu nos a nace imperfecto. Tin biaha nos ta haci cos robes maske nos no kier. Bo sa ta con bin nos tur ta pecado?—

Nos ta pecado door cu e prome homber, Adam, no a obedece Dios. El a peca, pasobra el a kibra Dios su lei. Y nos tur a haya pica for di Adam. Bo sa con nos a haya pica for di dje? Laga mi purba splica bo na un manera cu bo por compronde.

Kisas bo a yega di mira un hende traha pan den un forma. Kico ta pasa cu e pan si e forma tin un dobla aden? Abo sa?— Tur e pannan cu bo traha den e forma lo sali cu e mesun dobla. Of no?—

Adam tawata manera e forma, anto nos ta e pan. Ora el a kibra e lei di Dios el a bira imperfecto. Ta como si fuera el a haya un dobla of un marca. Pesei, ora el a bira tata, con e yiunan a sali?— Tur su yiunan a sali cu e mesun marca di imperfeccion cu e tawatin.

Mayoria mucha no ta nace cu un imperfeccion grandi cu bo por mira. Nan no falta un man of un pia. Pero e imperfeccion cu nan tin ta grave si, pasobra e ta pone nan bira malo, y muri un dia.

Manera bo mes sa, tin hende ta bira malo mas cu otro. Ta dicon? Ta door cu nan a nace cu mas hopi pica?— No, tur hende ta nace cu mes hopi pica. Nos tur a nace imperfecto. Pesei, tardi of tempran, tur hende ta haya un of otro malesa. Asta hende cu ta purba cumpli cu tur Dios su leinan, y cu no ta haci nada cu ta hopi malo, tambe por bira malo.

Pero ta dicon anto tin hende ta bira malo mas cu otro?— Tin hopi motibo. Tin hende cu no tin suficiente cuminda pa come. Of kisas e cuminda cu nan ta come no ta bon. Kisas nan ta come mucho bolo cu mangel. Un otro motibo por ta cu nan ta bai drumi mucho laat y nan ta drumi mucho tiki. Of kisas nan no ta tapa nan curpa bon ora awa ta yobe. Tin hende cu ta asina suak di salu cu nan no por bringa malesa, maske nan purba cuida nan curpa.

Lo yega un dia cu nos lo no bira malo mas? Nos ta bai scapa di pica un dia?— Wel, kico Hesus a haci pa e homber lam?— Hesus a pordona su picanan y el a cur’e. Asina Hesus a mustra kico e ta bai haci un dia pa tur hende cu ta haci nan best pa haci bon.

Si nos mustra cu nos no kier haci pica y cu nos tin rabia riba cos malo, Hesus ta bai cura nos. Den futuro e ta bai kita e imperfeccion cu nos tin awor. E ta bai haci e cos aki como Rei di e Reino di Dios. Pero no ta tur nos picanan ta bai kita pareu. Pocopoco nan ta bai kita. Anto ora tur nos picanan caba di kita, nos lo no bira malo nunca mas. Nos lo tin salu perfecto. Esta dushi e cos ei lo ta!