LES 16
Kico Hesus A Haci Tempo Cu E Tabata Riba Tera?
Hopi hende a yega di tende tocante Hesus. Algun hende sa loke a pasa cu Hesus tempo e tabata baby. Otro hende sa cu e tabata un profeta sabi. Anto tin otro hende sa solamente tocante Hesus su morto. Bo ta kere cu nos por siña conoce Hesus mas mihor si nos analisa loke Bijbel ta bisa di su bida riba Tera? Den e les aki, nos lo wak algun cos importante cu Hesus a haci. Ademas, nos lo wak con e cosnan cu el a haci por beneficia bo.
1. Kico tabata e trabou di mas importante cu Hesus a haci?
E trabou di mas importante cu Hesus a haci tabata “declara e bon noticia di e Reino di Dios.” (Lesa Lucas 4:43.) E bon noticia cu Hesus a predica ta cu Dios lo a forma un reino, of gobierno, cu lo soluciona tur problema di humanidad.a Hesus a comparti e mensahe positivo aki cu otro hende pa tres aña y mey sin cansa.—Mateo 9:35.
2. Dicon Hesus a haci milager?
Bijbel ta bisa cu “pa medio di [Hesus], Dios a haci obra poderoso, cos impresionante y milager.” (Echonan 2:22) Dios a duna Hesus poder pa calma un tormenta fuerte, pa duna cuminda na miles di hende, pa cura hende malo y hasta pa lanta hende for di morto. (Mateo 8:23-27; 14:15-21; Marco 6:56; Lucas 7:11-17) E milagernan cu Hesus a haci a demostra bon cla cu ta Dios a mand’e na Tera. Ademas, e milagernan ey a proba cu Dios tin poder pa soluciona tur nos problemanan.
3. Kico nos por siña for di e manera cu Hesus a hiba su bida?
Hesus semper a obedece Jehova. (Lesa Juan 8:29.) Hasta ora otro hende a purba di strob’e, Hesus a haci tur loke su Tata a pidie. El a keda fiel te na morto. Hesus a demostra cu hende por sirbi Dios hasta ora nan haya nan den situacion dificil. Pues, Hesus a laga “un ehempel pa [nos] sigui su pasonan fielmente.”—1 Pedro 2:21.
KICO MAS NOS POR SIÑA?
Laga nos wak con Hesus a predica e bon noticia tocante e Reino di Dios. Ademas, wak dicon e por a haci milager.
4. Hesus a papia cu otro hende tocante e bon noticia
Hesus a cana miles di kilometer riba caminda di tera pa papia tocante e bon noticia cu mas tanto hende posibel. Lesa Lucas 8:1. Despues, analisa e siguiente preguntanan:
Hesus a predica solamente na hende cu a bin pa scuch’e?
Cuanto esfuerso Hesus a haci pa predica na otro hende?
Dios a bisa di antemano cu e Mesias lo a hiba e bon noticia pa otro hende. Lesa Isaias 61:1, 2. Despues, analisa e siguiente preguntanan:
Con Hesus a cumpli cu e profecia aki?
Bo ta kere cu awe tambe hende mester tende e bon noticia ey?
5. Hesus a siña hende les valioso
Hesus no solamente a predica e bon noticia tocante e Reino di Dios, sino tambe el a siña hende varios les practico. Wak ehempel di algun les practico cu el a siña hende durante su famoso Sermon Riba Sero. Lesa Mateo 6:14, 34 y 7:12. Despues, analisa e siguiente preguntanan:
Ki bon conseho Hesus a duna den e versiculonan aki?
Bo ta kere cu e consehonan ey por yuda hende awe?
6. Hesus a haci milager
Jehova a duna Hesus poder pa haci hopi milager. Pa wak ehempel di un milager cu Hesus a haci, lesa Marco 5:25-34 of pasa e VIDEO. Despues, analisa e siguiente preguntanan:
Segun e video, kico e señora cu tabata malo tabata convenci di dje?
Kico ta impresiona bo di e milager aki?
Lesa Juan 5:36. Despues, analisa e siguiente pregunta:
Ki testimonio, of evidencia, e milagernan a duna di Hesus?
Bo tabata sa?
Nos ta haya mayoria di informacion tocante Hesus su bida den e cuater Evangelionan, esta, e bukinan di Bijbel cu yama Mateo, Marco, Lucas y Juan. Cada escritor a skirbi algun detaye tocante Hesus cu e otronan no a skirbi. Ora bo lesa tur e cuater bukinan aki, bo ta haya un bista completo di Hesus su bida.
MATEO
a skirbi e prome Evangelio. Den e buki di Mateo, nos ta haya varios di Hesus su siñansanan, specialmente loke Hesus a siña hende tocante e Reino di Dios.
MARCO
a skirbi e Evangelio di mas cortico. Den e buki di Marco, nos ta haya varios suceso interesante di e bida di Hesus.
LUCAS
a skirbi con importante oracion tabata pa Hesus y cu Hesus a trata hende muher bon.
JUAN
ta conta nos tocante varios combersacion cu Hesus tabatin cu su bon amigonan y cu otro hende. Esey ta laga nos mira ki tipo di persona Hesus ta.
LOKE HENDE SA BISA: “Hesus no tabata e Mesias; e tabata djis un bon hende.”
Kico abo ta pensa?
RESUMEN
Hesus a predica tocante e Reino di Dios, a haci milager y a obedece Jehova na tur momento.
Repaso
Kico tabata e trabou di mas importante cu Hesus a haci tempo cu e tabata riba Tera?
Kico e milagernan cu Hesus a haci a demostra?
Ki les valioso Hesus a siña hende?
MAS INFORMACION INTERESANTE
Wak e mensahe principal cu Hesus a predica tempo cu e tabata riba Tera.
“Dicon e Reino di Dios Ta Importante pa Hesus?” (E Toren di Vigilancia di 1 di october 2014)
Wak ki bon motibo nos tin pa kere cu Hesus su milagernan realmente a tuma luga.
“E Milagernan di Hesus—Kico Bo Por Siña for di Nan?” (E Toren di Vigilancia di 15 di juli 2004)
Wak con un homber a cambia su bida ora el a haya sa cuanto interes Hesus tin den otro hende.
“Mi Tabata Pensa Solamente Riba Mi Mes” (E Toren di Vigilancia di 1 di october 2014)
Wak suceso principal di Hesus su sirbishi aki riba Tera den e orden cu nan a tuma luga.
“Sucesonan Principal di Hesus Su Bida Riba Tera” (Guia pa Studia e Palabra di Dios, Parti 4-B)