Pornografia—Ta Inofensivo of Perhudicial?

Unda cu bo bira bo ta haya pornografia.a Bo ta hay’e tanto den propaganda, moda, pelicula, musica, revista, como den weganan di video, na television, riba smartphone, tablet, website y awor via un servicio pa comparti potret online. Ta parce cu pornografia a bira algo masha comun. Actualmente, mas y mas hende ta entretene nan mes cu mas y mas pornografia compara cu cualkier otro tempo den historia.—Wak e cuadro “Estadistica di Pornografia.”

E opinion di hende tocante pornografia tambe ta cambiando. Profesor Gail Dines a skirbi: “Awe e imagennan a bira asina extremo cu loke antes hende tabata considera como pornografia grafico awor a bira normal.”

Kico abo ta pensa di e tendencia aki? Pornografia ta un forma di diberticion inofensivo, perhudicial of e no ta dje malo ey? Hesus a bisa: “Tur bon palo ta pari bon fruta, ma tur palo putri ta pari fruta cu no ta sirbi.” (Mateo 7:17) Ki sorto di “fruta” pornografia ta produci? Pa nos por haya e contesta, laga nos trata algun pregunta basico tocante pornografia.

Con pornografia ta afecta hende individual?

LOKE EXPERTONAN TA BISA: Pornografia ta sclavisa hende. Pesey, algun investigador y terapista ta hasta compar’e cu crack, un tipo di cocaina.

Brian,b kende tabata sclavisa na pornografia via Internet, a bisa: “Nada no por a pone mi stop. Mi tabata sinti comosifuera mi tabata droga. Mi tabata sinti mi asina culpabel cu mi curpa tabata tembla y mi tabata haya dolor di cabes. Mi a lucha pa stop, pero a dura hopi aña prome cu mi por a vence mi adiccion.”

Hende cu ta bicia na pornografia hopi bes ta practic’e na scondi. Nan ta isola nan mes y no ta honesto. Pues, no ta nada straño anto cu nan ta solitario, ta sinti berguensa, ansiedad, depresion y rabia. Den algun caso, nan tin e tendencia di comete suicidio. Sergio, kende tabata download pornografia riba su telefon celular casi tur dia, a bisa: “Mi a isola mi mes y tabata desespera. Mi tabata sinti mi culpabel, solitario y tabata sinti cu mi no tabatin ningun salida. Ademas, mi tabata sinti cu mi no ta bal nada. Mi tabatin asina tanto berguensa cu mi tabatin miedo di pidi yudansa.”

Hasta si un hende wak pornografia djis un rato so of pa casualidad, esey por tin resultado lamentabel. Dr. Judith Reisman, kende ta bon conoci pa su investigacion riba tereno di pornografia, a duna un splicacion dilanti di un comite di Senado Mericano, y a bisa: “Imagennan visual pornografico ta keda graba den bo mente y ta cambia bo manera di pensa. E ta graba un imagen instantaneo y permanente den bo memoria contra bo boluntad, y esaki ta hopi dificil of imposibel pa elimina.” Susan, kende tin 19 aña di edad y cu a hay’e cu pornografia riba Internet, a bisa: “E imagennan ey ta graba den mi mente y nan ta presenta diripiente. Ta parce cu nunca mas lo mi por elimina nan completamente for di mi mente.”

CONCLUSION: Pornografia ta sclavisa hende y ta haci hopi daño na su victimanan.—2 Pedro 2:19.

Con pornografia ta afecta famianan?

LOKE EXPERTONAN TA BISA: “Pornografia ta kibra matrimonio y ta kibra famia.”—The Porn Trap, di Wendy y Larry Maltz.

Pornografia ta causa daño na matrimonio y na famianan, pasobra e ...

• ta debilita e confianza, amor y e relacion intimo entre pareha.—Proverbionan 2:12-17.

• ta promove egoismo y ta pone e usuario distancia su mes emocionalmente for di su casa y no ta keda satisfecho mas cu ne.—Efesionan 5:28, 29.

• ta stimula fantasia y deseo sexual robes.—2 Pedro 2:14.

• ta incita e persona pa obliga su casa pa comete actonan sexual baho cu ne.—Efesionan 5:3, 4.

• ta pone e hende bira infiel na su casa tanto emocionalmente como literalmente.—Mateo 5:28.

Bijbel ta bisa parehanan casa pa no ‘traiciona’ otro. (Malakias 2:16) Infieldad ta un forma di traicion cu por kibra un matrimonio y por hiba na separacion y divorcio. Ora esey sosode, e yiunan ta bira victima.

Pornografia por afecta yiunan directamente tambe. Brian, kende nos a menciona anteriormente, ta splica: “Ora mi tabatin mas o menos dies aña di edad, pa casualidad mi a topa cu un par di revista pornografico di mi tata mientras mi tabata hunga caco di sconde. Mi a cuminsa wak nan den secreto sin cu mi a compronde pakico e potretnan ey tabata atrae mi. Asina mi a cuminsa cu un bicio masha destructivo cu mi mester a sigui lucha cu ne como adulto.” Varios estudio riba e tereno aki ta mustra cu pornografia por influencia adolescentenan pa bira sexualmente activo na edad mas jong. Ademas, nan ta cuminsa hiba un bida inmoral, ta bira violento den asunto sexual, y ta bira mentalmente y emocionalmente instabil.

CONCLUSION: Pornografia ta ruina e relacion entre miembronan di famia y ta causa hopi dolor y sufrimento.—Proverbionan 6:27.

Kico Bijbel ta bisa tocante pornografia?

E PALABRA DI DIOS TA BISA: “Mata e inclinacionnan di boso curpa pa loke ta fornicacion, impureza, pasion, mal deseo y golosidad, locual ta idolatria.”—Colosensenan 3:5.

Cu poco palabra, Jehovac Dios ta odia pornografia. Esey no kiermen cu Jehova ta desaproba di relacion sexual. Ta e mes a crea hende cu e organonan sexual cu por ser uza den matrimonio como fuente di placer, pa un pareha casa por hala mas cerca di otro y pa nan por sinti e goso di haya yiu.—Santiago 1:17.

Pero, con nos por sa cu Jehova ta condena pornografia? Laga nos wak algun motibo.

• Jehova sa cu pornografia por daña bida di hende.—Efesionan 4:17-19.

• E ta stima nos y kier proteha nos.—Isaias 48:17, 18.

• E kier pa nos matrimonio bay bon y pa famianan keda hunto.—Mateo 19:4-6.

• E kier pa nos ta moralmente limpi y respeta derecho di otro hende.—1 Tesalonicensenan 4:3-6.

• E kier pa nos respeta nos capacidad di procrea y uz’e na un manera honorabel.—Hebreonan 13:4.

• E sa cu pornografia ta un refleho di e punto di bista troci, egoista y satanico cu hende tin di sex.—Genesis 6:2; Judas 6, 7.

CONCLUSION: Pornografia ta daña un hende su amistad cu Dios.—Romanonan 1:24.

Sinembargo, Jehova tin hopi compasion pa hende cu kier libra nan mes for di e gara di pornografia. Bijbel ta bisa: “SEÑOR ta yen di compasion y gracia, kende no ta rabia lihe, y ta abunda den misericordia. Pasobra e sa di kico nos ta traha; e ta corda cu ta stof nos ta.” (Salmo 103:8, 14) Jehova ta invita hende humilde pa hala cerca dje pa ‘haya misericordia y ricibi bondad inmereci pa yuda nan na e momento apropia.’—Hebreonan 4:16; wak e cuadro “Con pa Vence Adiccion na Pornografia.”

Hopi hende a acepta e yudansa di Dios. Pero su yudansa tabata beneficioso? Wak kico Bijbel ta bisa tocante algun hende cu a vence nan bicio: “Dios a haci boso limpi, ... el a santifica boso ..., a declara boso husto den nomber di nos Señor Hesucristo hunto cu [Dios] Su spirito.” (1 Corintionan 6:11) Mescos cu apostel Pablo, e personanan ey por bisa: “Pa tur cos mi tin forsa pa medio di esun cu ta duna mi poder.”—Filipensenan 4:13.

Susan, kende a logra vence su adiccion na pornografia, a bisa: “Jehova ta e unico persona cu por yuda bo vence bo adiccion. Si bo resa pidie su guia y yudansa, bo por haya un posicion limpi su dilanti. E lo no laga bo na caya.”