“Nos A Haya e Mesias!”

Shete shen aña despues cu Mikeas a profetisa cu e Mesias lo a nace na Betlehem, e profecia aki a cumpli. Un 30 aña despues, na aña 29 di prome siglo, e prome parti di e profecia di Daniel tocante e yegada di e Mesias tambe a cumpli. Hesus a batisa y Dios a ungie cu spirito santo. Asina, e “descendiente”, e Mesias tan spera, a yega net na e tempo stipula!

Di biaha Hesus a cuminsa predica “e bon noticia di e Reino di Dios.” (Lucas 8:1) Manera Bijbel a bisa di Hesus, e tabata un homber bondadoso y amabel, y e tabatin interes sincero den hende. Cu amor el a siña nan lesnan practico y el a cura “tur sorto di maleza y tur sorto di enfermedad” cu nan tabatin. Tur esaki a duna prueba cu e tabatin Dios su aprobacion. (Mateo 4:23) Hende di tur edad cu a acerca Hesus a yega na e mesun conclusion cu un di su discipelnan: “Nos a haya e Mesias!”—Juan 1:41.

Hesus a profetisa cu un poco prome cu su Reino tuma mando completo lo tin guera, temblor y hopi otro dificultad. Pesey el a urgi tur su siguidornan pa “keda vigila.”—Marco 13:37.

Hesus tabata un homber perfecto cu semper a obedece Dios, pero e tabatin enemigonan cu despues a laga mat’e. Su morto a percura e sacrificio perfecto cu por yuda nos haya bek loke Adam cu Eva a perde: bida pa semper den Paradijs.

Hesus su morto y tambe su resureccion como un criatura spiritual poderoso a cumpli cu profecia. Despues cu Hesus a resucita, el a aparece na mas cu 500 di su discipelnan. Prome cu el a subi na cielo, el a manda su siguidornan pa hiba e bon noticia tocante dje y su Reino na “hende di tur nacion.” (Mateo 28:19) Te na ki grado nan a cumpli cu e asignacion ey?

​—Basa riba Mateo, Marco, Lucas, Juan y 1 Corintionan.